U dziciačaj turhrupy ź Biełarusi na adpačynku ŭ Italii skrali pašparty
Hrupa padletkaŭ ź Biełarusi ŭ žniŭni adpraviłasia ŭ arhanizavany tur u Italiju: 3 dni ŭ Rymie i 12 dzion na mory. Usio išło pa płanie roŭna da apošniaha dnia. Prosta pierad adjezdam u ich skrali pašparty. Padrabiaznaściami historyi z «Anłajnieram» padzialiłasia dyrektarka kampanii «Smajł Chaŭs», jakaja arhanizoŭvała tur. Alena ŭ hetaj pajezdcy była adnoj z supravadžajučych hrupy.
«Usio adbyłosia nie toje što ŭ apošni dzień — u apošnija paŭhadziny. Kali my vyjazdžali z hatela, aŭtobus spyniŭsia krychu voddal. Va ŭsich pa dva čamadany, ručnaja pakłaža, pačałasia sapraŭdnaja mituśnia. Chłopčyki dapamahali dziaŭčynkam z rečami, chtości zhubiŭ kartu ad numara… I akazałasia, pakul my z usim hetym raźbiralisia, niejkaja žančyna vyciahnuła papku z pašpartami z sumki — heta my potym pa kamierach ubačyli. Napeŭna, dumała, što tam hrošy, ale jany jakraz zastalisia niekranutymi».
Alena pryznajecca, što za 11 hadoŭ pracy ź dziciačymi hrupami jana padrychtavałasia da lubych niepradbačanych abstavin. Tamu pačała dziejničać apieratyŭna — adrazu ž źviazałasia z pasolstvam Biełarusi ŭ Italii. I zamiest aeraporta turysty — usiaho 24 čałavieki — adpravilisia tudy.
Niekatoryja ŭdzielniki hrupy byli paŭnaletnimi, inšyja padarožničali razam z baćkami, tamu pašparty zastalisia ŭ ich na rukach — častka hrupy zmahła palacieć svaim rejsam.
«U pasolstvie nas užo čakali, vielmi ciopła i pa-dobramu pryniali. I hałoŭnaje — zrabili ŭsio, kab u maksimalna karotkija terminy aformić novyja dakumienty (u hetym vypadku vydajecca paśviedčańnie na viartańnie). Naturalna, u mianie byli kopii dakumientaŭ na kožnaje dzicia, dazvołu ad baćkoŭ. Heta vielmi spraściła praces. Zastałosia tolki zrabić fota.
Dzieci paviačerali prosta ŭ pasolstvie, ad čaho byli ŭ poŭnym zachapleńni. A jašče ad taho, što jany znachodziacca na terytoryi Biełarusi, choć i ŭ Italii. Byŭ ceły škvał pytańniaŭ», — uśmichajecca kiraŭnica turfirmy.
Pieranačavała hrupa ŭ hateli niepadalok ad ambasady, a ŭžo nastupnaj ranicaj zmahła vyjechać u aeraport — usiu noč Alena zajmałasia kuplaj kvitkoŭ. Nie abyšłosia biez pryhod i tut — to nie prachodzili karty, to nie paśpiavali ŭsich zarehistravać, — ale ŭ vyniku ŭsie padletki ščaśliva viarnulisia dadomu. I navat nie prapuścili nivodnaha dnia vučoby.
Usie dadatkovyja vydatki turfirma ŭziała na siabie.
U Italii turystam zabaranili budavać piasočnyja zamki. Uviali i inšyja abmiežavańni
Turyst u Kienii napaiŭ pivam słana i spravakavaŭ skandał
Biełaruskija sanatoryi raskuplajuć za paŭhoda, ceny na vosień vyraśli
«Ultraekzotyka dla samotnaha turysta». Ci zacikavić Iran biełarusaŭ i ci pajeduć turysty ź Irana ŭ Biełaruś
Kamientary