Transhiendarnaja dačka Iłana Maska žyvie z tryma susiedziami i charčujecca tannaj ježaj z dastaŭki
Jaje baćka — samy bahaty čałaviek u śviecie i adzin z hałoŭnych krytykaŭ transsupolnaści. Dačka Iłana Maska, 21-hadovaja Vivijan Uiłsan, jakaja ŭ 16 hadoŭ zrabiła transhiendarny pierachod, ciapier imkniecca žyć zvyčajnym žyćciom.
Sa starejšaj dačkoj Iłana Maska Vivijan pahavaryła žurnalistka vydańnia The Cut. Ich sustreča pačałasia ŭ zakusačnaj z morapraduktami, dzie Vivijan ź niedavieram razhladała zamoŭlenyja joju ž vustrycy.
«Jak, blin, ich jaduć? Boža moj! Jany pachnuć akijanam!» — kaža jana. Pa słovach dziaŭčyny, jana daŭno nie jeła ničoha «vytančanaha» i navat nie ŭpeŭnienaja, ci možna vustrycy ličyć takoj ježaj.
Napačatku Vivijan trymajecca vielmi zakryta, amal nie hladzić u vočy i razmaŭlaje šeptam. Svoj stan jana tłumačyć tym, što była pad kajfam i da piataj hadziny ranicy hladzieła «Hałodnyja hulni».
«Ja mahu być krychu zamknionaj, — pryznajecca jana. — U mianie mienš sacyjalnaj enierhii, čym u bolšaści ludziej».
Pastupova, za kaktejlem «Pina kałada», jana raskryvajecca. Vivijan raskazvaje, što pieravažna charčujecca ježaj z dastaŭki, u asnoŭnym tannymi sušy, redka telefanuje maci, lubić videahulni, K-pop i šou Drag Race.
U dziaŭčyny sindrom deficytu ŭvahi i hipieraktyŭnaści (SDVH), tamu joj ciažka siadzieć na miescy. Kali mima prajazdžaje asabliva hučnaja mašyna, jana pačynaje kryčać na jaje: «Chočaš uvahi? Idzi ŭ sacsietki, jak usie astatnija!».
«Ja adčuvaju siabie darosłaj, ale taksama adčuvaju, što inšyja ludzi nie ličać mianie darosłaj. I heta razdražniaje», — kaža jana.
Dziacinstva
Vivijan — starejšaja ŭ vialikim siamiejstvie Iłana Maska (pa jaje słovach, jana navat nie viedaje dakładna, kolki maje zvodnych bratoŭ i siaścior). Jaje maci — piśmieńnica-fantastka Džaścin Uiłsan, jakaja paśla šlubu z Maskam adčuvała siabie «adnarazovaj». Baćki razyšlisia, kali Vivijan było čatyry; praz šeść tydniaŭ baćka ŭžo zaručyŭsia z aktrysaj Tałułaj Rajli.
Dziaŭčynka vučyłasia spačatku ŭ elitnaj škole, a potym u Ad Astra — ekśpierymientalnaj ustanovie, jakuju jaje baćka stvaryŭ dla dziaciej supracoŭnikaŭ SpaceX, bo, jak jon kazaŭ presie, jaho dzieci «nie rabili taho, što, na maju dumku, pavinny byli rabić» u zvyčajnaj škole. Tam nie było adznak, a ŭpor rabiŭsia na dakładnyja navuki. U starejšych kłasach jana pierajšła ŭ škołu Crossroads.
«Heta było mienavita toje, što vy čakali b ad pryvatnaj škoły, poŭnaj nepa-dzietak, — kaža Vivijan. — Ludzi byli nieŭraŭnavažanyja, a ja nie była papularnaj. Ja ni z kim nie razmaŭlała».
Adzinaje miesca, dzie joj było kamfortna, — školnaje abjadnańnie kvir-moładzi (Queer Student Union), dzie jana ŭpieršyniu pačuła pra papularnaje amierykanskaje telešou pra dreh-kulturu Drag Race.
Kaminh-aŭt i vajna ŭ sacsietkach
Kali Vivijan było 16 hadoŭ, jana zrabiła kaminh-aŭt jak transhiendarnaja dziaŭčyna.
«U mianie była vielmi, vielmi, vielmi, vielmi drennaja hiendarnaja dysfaryja (zmročny nastroj. — NN)», — emacyjna raspaviadaje jana.
Imia Vivijan jana abrała ŭ honar piersanaža sa svajoj lubimaj videahulni Paladins.
Da 18 hadoŭ adnosiny z baćkam sapsavalisia kančatkova. U svaim chadajnictvie ab źmienie imia i proźvišča na Vivijan Uiłsan (Uiłsan — dziavočaje proźvišča maci) jana napisała sudździ:
«Ja bolš nie žyvu z maim bijałahičnym baćkam i nie žadaju być źviazanaj ź im nijakim čynam, ni ŭ jakoj formie».
Spačatku, pa słovach dziaŭčyny, Mask publična nibyta padkreślivaŭ jaje prava na pryvatnaść, ale paźniej jaho rytoryka stała bolš žorstkaj. U 2024 hodzie Mask u intervju nazvaŭ Vivijan jaje starym imiem Ksaŭje i zajaviŭ, što jaho dzicia «zabita virusam woke».
Vivijan, pa jaje słovach, vyrašyła adkazać sa złości.
«Apošni raz, kali ja praviarała, ja nasamreč nie miortvaja», — napisała jana ŭ Threads, a nie na baćkavym X, dadaŭšy, što jaje baćka «ŭ kietaminavym tumanie adčajna maje patrebu va ŭvazie i pryznańni z boku armii dehienieratyŭnych incełaŭ».
Kanflikt z baćkam pryciahnuŭ da jaje vielizarnuju ŭvahu, u tym liku pravych trolaŭ.
«Šmat chto sprabavaŭ pierakrucić maje słovy», — kaža jana. Jaje pačali praśledavać paparacy, a ŭ asabistyja paviedamleńni pasypalisia abrazy.
«Ludzi pišuć samyja ahidnyja, ašalełyja rečy, jakija jany b sa mnoj zrabili. Ad hetaha mnie ahidna», — dzielicca Vivijan.
Hety dośvied prymusiŭ Vivijan stać bolš strymanaj. Jana bolš nie choča abmiarkoŭvać svaju siamju. Kali žurnalistka pytajecca, jak jana spraŭlajecca z usiudyisnaściu baćki — ad navin da aŭtamabilaŭ Tesla na vulicach, — jana prosta maŭčyć i prosić źmianić temu.
Žyćcio siońnia: hrošy, mary i pošuki siabie
Kab adździalić siabie ad baćki, dziaŭčyna pajechała vučycca ŭ Kanadu, u Kviebiek: chacieła padciahnuć francuzskuju i ź dziacinstva maryła stać pierakładčycaj (Vivijan maje i kanadskaje hramadzianstva praz maci). Jana ažyŭlajecca padčas razmovy pra movy: karejskuju, kitajskuju, japonskuju, ispanskuju.
«Stanavicca zaŭvažna lepšaj u movie — heta, napeŭna, samaje pryjemnaje, što ja kali-niebudź rabiła. Mahčymaść razmaŭlać z kimści, chto nie razmaŭlaje pa-anhlijsku, — heta vielmi, vielmi kruta», — kaža Vivijan.
Adnak kaledž, asabliva padčas pieršaj kviebiekskaj zimy, akazaŭsia dla jaje «depresiŭnym». Jana pierajechała ŭ Tokia, u filijał Univiersiteta Tempł, kab praktykavać japonskuju.
«Mianie pastajanna spakušajuć inšyja movy. Ja vyvučaju ich hod, a potym pieraklučajusia», — kaža jana.
Praz paŭtara hoda jana kinuła vučobu, bo, pa jaje słovach, vykarystańnie štučnaha intelektu inšymi studentami źniščyła jaje matyvacyju. Minułaj viasnoj jana viarnułasia ŭ Łos-Andželes, niekatory čas žyła z maci, pierš čym źjechać uletku.
Vosieńniu jana spadziajecca pastupić u kaledž, kab praciahvać vyvučać inšyja movy. «Vučoba ŭ kaledžy — darahaja. U mianie niama takoj spadčyny», — kaža jana.
Niahledziačy na toje, što Vivijan — dačka samaha bahataha čałavieka ŭ śviecie, jana, zdajecca, vielmi chvalujecca pra hrošy. «Ludzi dumajuć, što ŭ mianie šmat hrošaj. U mianie niama socień tysiač dalaraŭ u rasparadžeńni», — kaža jana.
Ciapier Vivijan žyvie z tryma susiedziami, tamu što heta tańniej, i spadziajecca nie prasić zanadta šmat u maci.
«Maja mama bahataja, tak? Ale, vidavočna, toj druhi — nievierahodna bahaty», — tłumačyć jana, ni razu nie nazvaŭšy baćku pa imieni.
Pry hetym Vivijan nastojvaje, što nie złujecca z-za hetaha. Jana nie imkniecca być zvyšbahataj.
Słava adkryła dla jaje novyja mahčymaści: u jaje jość ahient, jana ŭžo padpisała partniorskija damovy ź niekalkimi brendami — Boy Smells, TomBoyX i Wildfang — i navat debiutavała ŭ dreh-šou, što, pa jaje słovach, było samym ščaślivym momantam hoda.
Adnak hałoŭnaje, na čym ciapier zasiarodžvajecca Vivijan, — heta staleć u samych zvyčajnych rečach.
«Mnie treba stać bolš arhanizavanaj. Mnie treba, narešcie, prybrać u svaim pakoi», — pryznajecca jana. Navat u śpisie žadańniaŭ u jaje značycca punkt: «Razabracca, što ŭ mianie ŭ śpisie žadańniaŭ».
Słava i nianaviść
Paśla viačery Vivijan, pa słovach žurnalistki, była hatovaja viartacca dadomu, kab pahladzieć svoj novy lubimy sieryjał na Netflix — «Alisa ŭ pamiežžy» (Alice in Borderland). Ale spačatku jany zajšli ŭ kramu pa ałkahol.
«Davaj voźmiem tannaje vino, — prapanavała jana. — Tannaje vino — adna z najlepšych rečaŭ, stvoranych Boham».
Pa słovach dziaŭčyny, jana nie adroźnivaje ni čyrvonaje ad biełaha, ni darahoje ad tannaha. Tamu spyniłasia na butelcy Cabernet Santa Carolina Reserva za dzieviać dalaraŭ.
U kramie jaje paznaje pradaviec. «Vy nie dačka Iłana?» — pytajecca jon. Jana niaŭpeŭniena admaŭlaje, ale mužčyna ŭsio roŭna doryć joj dva biaspłatnyja šoty tekiły, kažučy, što jana — jaho «lubimy čałaviek».
Kab supakoicca paśla sustrečy ŭ kramie i zekanomić na Uber, Vivijan z žurnalistkaj vyrašyli prajścisia pieššu prykładna try kiłamietry da jaje doma.
«Ja nie vielmi dobra ŭmieju być znakamitaj. Heta navyk», — razvažaje jana pa darozie, z sumam zhadvajučy časy, kali jaje nichto nie viedaŭ, ale pryznaje, što słava dapamahaje zarablać hrošy.
Pa darozie z mašyny, jakaja spyniłasia na śviatłafory, danosiacca transfobnyja abrazy. Upieršyniu za viečar Vivijan złujecca i pačynaje kryčać u adkaz: «Zatknisia! Vali ŭ svoj Techas!».
Situacyja była niepryjemnaja, i im abiedźvium zachaciełasia zakuryć. Svaje Marlboro Vivijan pakinuła doma, ale ŭ jaje surazmoŭnicy jakraz byli cyharety. Kali dziaŭčyna zaŭvažyła zapalničku z fatahrafijaj śpiavački Ścivi Niks, jana zaśmiajałasia i nazvała jaje «stereatypam».
Na pytańnie pra toje, što ŭ samoj Vivijan najbolš stereatypnaje, jana adkazała imhnienna, navat nie dačakaŭšysia kanca farmuloŭki: «Prablemy z tatam».
Ciapier čytajuć
Andrej Pavuk uładkavaŭsia kiroŭcam tralejbusa ŭ Vilni i raskazaŭ, jak jano19
Kamientary
Takomu chłopcu nielha było dazvalać mianiać hiendar.
Chacia b tamu, što praz hod druhi jon by piervchvareŭ i pierakinuŭsia na niešta inšaje, jak pierakidvaŭsia potym z movy na movu.