Трансгендарная дачка Ілана Маска жыве з трыма суседзямі і харчуецца таннай ежай з дастаўкі
Яе бацька — самы багаты чалавек у свеце і адзін з галоўных крытыкаў транссупольнасці. Дачка Ілана Маска, 21-гадовая Вівіян Уілсан, якая ў 16 гадоў зрабіла трансгендарны пераход, цяпер імкнецца жыць звычайным жыццём.
Са старэйшай дачкой Ілана Маска Вівіян пагаварыла журналістка выдання The Cut. Іх сустрэча пачалася ў закусачнай з морапрадуктамі, дзе Вівіян з недаверам разглядала замоўленыя ёю ж вустрыцы.
«Як, блін, іх ядуць? Божа мой! Яны пахнуць акіянам!» — кажа яна. Па словах дзяўчыны, яна даўно не ела нічога «вытанчанага» і нават не ўпэўненая, ці можна вустрыцы лічыць такой ежай.
Напачатку Вівіян трымаецца вельмі закрыта, амаль не глядзіць у вочы і размаўляе шэптам. Свой стан яна тлумачыць тым, што была пад кайфам і да пятай гадзіны раніцы глядзела «Галодныя гульні».
«Я магу быць крыху замкнёнай, — прызнаецца яна. — У мяне менш сацыяльнай энергіі, чым у большасці людзей».
Паступова, за кактэйлем «Піна калада», яна раскрываецца. Вівіян расказвае, што пераважна харчуецца ежай з дастаўкі, у асноўным таннымі сушы, рэдка тэлефануе маці, любіць відэагульні, K-pop і шоу Drag Race.
У дзяўчыны сіндром дэфіцыту ўвагі і гіперактыўнасці (СДВГ), таму ёй цяжка сядзець на месцы. Калі міма праязджае асабліва гучная машына, яна пачынае крычаць на яе: «Хочаш увагі? Ідзі ў сацсеткі, як усе астатнія!».
«Я адчуваю сябе дарослай, але таксама адчуваю, што іншыя людзі не лічаць мяне дарослай. І гэта раздражняе», — кажа яна.
Дзяцінства
Вівіян — старэйшая ў вялікім сямействе Ілана Маска (па яе словах, яна нават не ведае дакладна, колькі мае зводных братоў і сясцёр). Яе маці — пісьменніца-фантастка Джасцін Уілсан, якая пасля шлюбу з Маскам адчувала сябе «аднаразовай». Бацькі разышліся, калі Вівіян было чатыры; праз шэсць тыдняў бацька ўжо заручыўся з актрысай Талулай Райлі.
Дзяўчынка вучылася спачатку ў элітнай школе, а потым у Ad Astra — эксперыментальнай установе, якую яе бацька стварыў для дзяцей супрацоўнікаў SpaceX, бо, як ён казаў прэсе, яго дзеці «не рабілі таго, што, на маю думку, павінны былі рабіць» у звычайнай школе. Там не было адзнак, а ўпор рабіўся на дакладныя навукі. У старэйшых класах яна перайшла ў школу Crossroads.
«Гэта было менавіта тое, што вы чакалі б ад прыватнай школы, поўнай нэпа-дзетак, — кажа Вівіян. — Людзі былі неўраўнаважаныя, а я не была папулярнай. Я ні з кім не размаўляла».
Адзінае месца, дзе ёй было камфортна, — школьнае аб’яднанне квір-моладзі (Queer Student Union), дзе яна ўпершыню пачула пра папулярнае амерыканскае тэлешоу пра дрэг-культуру Drag Race.
Камінг-аўт і вайна ў сацсетках
Калі Вівіян было 16 гадоў, яна зрабіла камінг-аўт як трансгендарная дзяўчына.
«У мяне была вельмі, вельмі, вельмі, вельмі дрэнная гендарная дысфарыя (змрочны настрой. — НН)», — эмацыйна распавядае яна.
Імя Вівіян яна абрала ў гонар персанажа са сваёй любімай відэагульні Paladins.
Да 18 гадоў адносіны з бацькам сапсаваліся канчаткова. У сваім хадайніцтве аб змене імя і прозвішча на Вівіян Уілсан (Уілсан — дзявочае прозвішча маці) яна напісала суддзі:
«Я больш не жыву з маім біялагічным бацькам і не жадаю быць звязанай з ім ніякім чынам, ні ў якой форме».
Спачатку, па словах дзяўчыны, Маск публічна нібыта падкрэсліваў яе права на прыватнасць, але пазней яго рыторыка стала больш жорсткай. У 2024 годзе Маск у інтэрв'ю назваў Вівіян яе старым імем Ксаўе і заявіў, што яго дзіця «забіта вірусам woke».
Вівіян, па яе словах, вырашыла адказаць са злосці.
«Апошні раз, калі я правярала, я насамрэч не мёртвая», — напісала яна ў Threads, а не на бацькавым X, дадаўшы, што яе бацька «ў кетамінавым тумане адчайна мае патрэбу ва ўвазе і прызнанні з боку арміі дэгенератыўных інцэлаў».
Канфлікт з бацькам прыцягнуў да яе велізарную ўвагу, у тым ліку правых троляў.
«Шмат хто спрабаваў перакруціць мае словы», — кажа яна. Яе пачалі праследаваць папарацы, а ў асабістыя паведамленні пасыпаліся абразы.
«Людзі пішуць самыя агідныя, вар'яцкія рэчы, якія яны б са мной зрабілі. Ад гэтага мне агідна», — дзеліцца Вівіян.
Гэты досвед прымусіў Вівіян стаць больш стрыманай. Яна больш не хоча абмяркоўваць сваю сям'ю. Калі журналістка пытаецца, як яна спраўляецца з усюдыіснасцю бацькі — ад навін да аўтамабіляў Tesla на вуліцах, — яна проста маўчыць і просіць змяніць тэму.
Жыццё сёння: грошы, мары і пошукі сябе
Каб аддзяліць сябе ад бацькі, дзяўчына паехала вучыцца ў Канаду, у Квебек: хацела падцягнуць французскую і з дзяцінства марыла стаць перакладчыцай (Вівіян мае і канадскае грамадзянства праз маці). Яна ажыўляецца падчас размовы пра мовы: карэйскую, кітайскую, японскую, іспанскую.
«Станавіцца заўважна лепшай у мове — гэта, напэўна, самае прыемнае, што я калі-небудзь рабіла. Магчымасць размаўляць з кімсьці, хто не размаўляе па-англійску, — гэта вельмі, вельмі крута», — кажа Вівіян.
Аднак каледж, асабліва падчас першай квебекскай зімы, аказаўся для яе «дэпрэсіўным». Яна пераехала ў Токіа, у філіял Універсітэта Тэмпл, каб практыкаваць японскую.
«Мяне пастаянна спакушаюць іншыя мовы. Я вывучаю іх год, а потым пераключаюся», — кажа яна.
Праз паўтара года яна кінула вучобу, бо, па яе словах, выкарыстанне штучнага інтэлекту іншымі студэнтамі знішчыла яе матывацыю. Мінулай вясной яна вярнулася ў Лос-Анджэлес, некаторы час жыла з маці, перш чым з'ехаць улетку.
Восенню яна спадзяецца паступіць у каледж, каб працягваць вывучаць іншыя мовы. «Вучоба ў каледжы — дарагая. У мяне няма такой спадчыны», — кажа яна.
Нягледзячы на тое, што Вівіян — дачка самага багатага чалавека ў свеце, яна, здаецца, вельмі хвалюецца пра грошы. «Людзі думаюць, што ў мяне шмат грошай. У мяне няма соцень тысяч даляраў у распараджэнні», — кажа яна.
Цяпер Вівіян жыве з трыма суседзямі, таму што гэта танней, і спадзяецца не прасіць занадта шмат у маці.
«Мая мама багатая, так? Але, відавочна, той другі — неверагодна багаты», — тлумачыць яна, ні разу не назваўшы бацьку па імені.
Пры гэтым Вівіян настойвае, што не злуецца з-за гэтага. Яна не імкнецца быць звышбагатай.
Слава адкрыла для яе новыя магчымасці: у яе ёсць агент, яна ўжо падпісала партнёрскія дамовы з некалькімі брэндамі — Boy Smells, TomBoyX і Wildfang — і нават дэбютавала ў дрэг-шоу, што, па яе словах, было самым шчаслівым момантам года.
Аднак галоўнае, на чым цяпер засяроджваецца Вівіян, — гэта сталець у самых звычайных рэчах.
«Мне трэба стаць больш арганізаванай. Мне трэба, нарэшце, прыбраць у сваім пакоі», — прызнаецца яна. Нават у спісе жаданняў у яе значыцца пункт: «Разабрацца, што ў мяне ў спісе жаданняў».
Слава і нянавісць
Пасля вячэры Вівіян, па словах журналісткі, была гатовая вяртацца дадому, каб паглядзець свой новы любімы серыял на Netflix — «Аліса ў памежжы» (Alice in Borderland). Але спачатку яны зайшлі ў краму па алкаголь.
«Давай возьмем таннае віно, — прапанавала яна. — Таннае віно — адна з найлепшых рэчаў, створаных Богам».
Па словах дзяўчыны, яна не адрознівае ні чырвонае ад белага, ні дарагое ад таннага. Таму спынілася на бутэльцы Cabernet Santa Carolina Reserva за дзевяць даляраў.
У краме яе пазнае прадавец. «Вы не дачка Ілана?» — пытаецца ён. Яна няўпэўнена адмаўляе, але мужчына ўсё роўна дорыць ёй два бясплатныя шоты тэкілы, кажучы, што яна — яго «любімы чалавек».
Каб супакоіцца пасля сустрэчы ў краме і зэканоміць на Uber, Вівіян з журналісткай вырашылі прайсціся пешшу прыкладна тры кіламетры да яе дома.
«Я не вельмі добра ўмею быць знакамітай. Гэта навык», — разважае яна па дарозе, з сумам згадваючы часы, калі яе ніхто не ведаў, але прызнае, што слава дапамагае зарабляць грошы.
Па дарозе з машыны, якая спынілася на святлафоры, даносяцца трансфобныя абразы. Упершыню за вечар Вівіян злуецца і пачынае крычаць у адказ: «Заткніся! Валі ў свой Тэхас!».
Сітуацыя была непрыемная, і ім абедзвюм захацелася закурыць. Свае Marlboro Вівіян пакінула дома, але ў яе суразмоўніцы якраз былі цыгарэты. Калі дзяўчына заўважыла запальнічку з фатаграфіяй спявачкі Сціві Нікс, яна засмяялася і назвала яе «стэрэатыпам».
На пытанне пра тое, што ў самой Вівіян найбольш стэрэатыпнае, яна адказала імгненна, нават не дачакаўшыся канца фармулёўкі: «Праблемы з татам».
Цяпер чытаюць
У Лепелі затрымалі паляка, які нібыта здабыў дакументы вучэнняў «Захад-2025»6
Каментары
Такому хлопцу нельга было дазваляць мяняць гендар.
Хаця б таму, што праз год другі ён бы первхварэў і перакінуўся на нешта іншае, як перакідваўся потым з мовы на мову.