Pavodle aficyjnych krynic, u vyniku sychodu z rejek funikulora «Hłoryja» zahinuli nie mienš za 15 čałaviek. Jašče 18 atrymali traŭmy, siarod ich piaciora ŭ ciažkim stanie i adno trochhadovaje dzicia, jakoje nie maje surjoznych paškodžańniaŭ, paviedamlaje CNN Portugal.
Bryhada kryminalnych rasśledavańniaŭ žandarmieryi i Ministerstva justycyi raspačali śledstva pa vyznačeńni pryčyn avaryi. Urad Partuhalii abviaściŭ ahulnanacyjanalny žałobny dzień, a haradskija ŭłady Lisabona — municypalny. Prezident krainy Marsełu Rebełu de Soŭza i ŭrad vykazali spačuvańnie siemjam paciarpiełych i paabiacali, što ŭsie nieabchodnyja rasśledavańni buduć praviedzieny svoječasova.
Kampanija Carris, jakaja kiruje funikuloram, adznačyła, što ŭsie rehularnyja i mižkvartalnyja ramontnyja raboty byli praviedzienyja svoječasova, apošnija — u 2024 hodzie. Kampanija taksama adkryła ŭłasnaje rasśledavańnie razam z uładami dla ŭstanaŭleńnia dakładnych pryčyn trahiedyi.
Śviedki raskazali, što funikulor pierad udaram raptoŭna straciŭ kiravańnie. Pavodle infarmacyi vydańnia Observador sa spasyłkaj na ratavalnikaŭ, pryčynaj avaryi staŭ abarvany tros u kanstrukcyi funikulora.
Funikulor «Hłoryja» — adzin ź simvałaŭ Lisabona, zdolny pieravozić da 42 čałaviek, jon vielmi papularny siarod turystaŭ.
U Lepieli zatrymali palaka, jaki nibyta zdabyŭ dakumienty vučeńniaŭ «Zachad-2025»10
Kamientary