Palitviaźniu Maksimu Znaku spoŭniłasia 44 hady, dva z pałovaj ź ich jon u režymie inkamunikada
Advakatu Maksimu Znaku, jaki byŭ siabram Kaardynacyjnaj rady i advakatam Viktara Babaryki, 4 vieraśnia spoŭniłasia 44 hady. Piaty raz Maksim Znak sustrakaje dzień naradžeńnia ŭ źniavoleńni, jon byŭ asudžany na 10 hadoŭ kałonii, nahadvaje Radyjo Svaboda.
Ź lutaha 2023 hoda Maksim Znak zastajecca ŭ režymie inkamunikada — pra jaho amal ničoha nie viadoma, jak i nieviadoma, ci dachodziać da jaho niejkija źviestki z voli.
«Pišam jamu faktyčna kožny tydzień, ale na našy listy niama adkazaŭ užo treci hod», — paviedamiŭ Svabodzie adzin z svajakoŭ palitviaźnia Maksima Znaka.
Maksima Znaka trymajuć u papraŭčaj kałonii № 3 u Viciebsku.
U źniavoleńni Maksim Znak napisaŭ apaviadańni i vieršy, jakija zdoleŭ pieradać na volu. U vyniku ŭ 2022 hodzie vyjšła jahonaja kniha «Zekamieron», a paźniej pavodle jaje ŭ Varšavie pastavili adnajmienny śpiektakl, u jakim ihrajuć akciory Kupałaŭskaha teatra ŭ vyhnańni. Kniha «Zekamieron» u 2025 hodzie była pierakładzienaja na dackuju movu. Raniej vyjšli pierakłady na anhlijskuju, niamieckuju i šviedskuju movy.
U 2025 hodzie Maksim Znak staŭ łaŭreatam premii «Parušeńnie spakoju» Centra Vacłava Haŭła ŭ Ńju-Jorku, jakuju prysudžajuć advažnym piśmieńnikam u niebiaśpiecy.
Pry abviaščeńni ŭznaharody Bił Šypsi — pravaabaronca, siabra Rady dyrektaraŭ Centra Vacłava Haŭła — adznačyŭ, što «kniha «Zekamieron» — adzin z samych kranalnych i mocnych prykładaŭ turemnaj litaratury».
Pavodle svajaka Maksima Znaka, ź jakim razmaŭlała Svaboda, rodnyja i siabry advakata spadziajucca, što stan jaho zdaroŭja zdavalniajučy. Svajaki zhadvajuć śviedčańni byłoha źniavolenaha, jaki vyjšaŭ na volu z kałonii Vićba-3 u červieni 2025 hoda. Hramadzianin Łatvii Dźmitryjs Michajłaŭs kazaŭ, što Maksima Znaka ŭ kałonii nie bačyŭ, ale viedaŭ, što toj «pa-raniejšamu siadzić u pamiaškańni kamiernaha typu i ŭ ŠIZA».
Advakat, piśmieńnik i bard Maksim Znak byŭ aryštavany 9 vieraśnia 2020 hoda i asudžany na 10 hadoŭ źniavoleńnia pavodle troch artykułaŭ Kryminalnaha kodeksa, u tym liku za «zmovu z metaj zachopu ŭłady». Znak svajoj viny nie pryznaŭ, biełaruskija pravaabaroncy pryznali jaho palitviaźniem.
Ciapier čytajuć
Andrej Pavuk uładkavaŭsia kiroŭcam tralejbusa ŭ Vilni i raskazaŭ, jak jano19
Kamientary