Izrail čakaje, što horad Haza pakinie miljon čałaviek. AAN papiaredžvaje ab žudasnych nastupstvach

U sieradu vysokapastaŭleny pradstaŭnik izrailskaj armii zajaviŭ, što padrychtoŭka da šturmu horada Haza moža pryvieści da pieramiaščeńnia miljona paleścincaŭ, dla jakich Izrail płanuje stvaryć novuju «humanitarnuju zonu», paviedamlaje Bi-bi-si.

Pavodle acenak AAN, miljon čałaviek — heta faktyčna ŭsio nasielnictva horada Haza (stalicy siektara) i jaho navakollaŭ.

Izrail rychtujecca ŭziać horad pad poŭny kantrol, matyvujučy heta tym, što ŭ im znachodziacca hałoŭnyja bazy CHAMAS.

Vysokapastaŭleny pradstaŭnik COGAT — orhana Ministerstva abarony Izraila, jaki kuryruje hramadzianskija pytańni na paleścinskich terytoryjach — zajaviŭ u sieradu, što ŭ apošnija dni nazirajecca aktyŭnaje pieramiaščeńnie paleścincaŭ z poŭnačy siektara, dzie znachodzicca horad Haza, na poŭdzień.

Pavodle jaho dadzienych, na hety momant paŭnočnyja rajony ŭžo pakinuli kala 70 tysiač čałaviek. Izrail vitaje ich rašeńnie pajści ŭ bolš biaśpiečnyja rajony.

Tym časam mižnarodnyja arhanizacyi nahadvajuć, što za dva hady vajny ŭ Hazie pieravažnaja bolšaść žycharoŭ siektara — a heta bolš za 2 miljony čałaviek — byli pieramieščany chacia b adzin raz. Mnohija z tych, chto znoŭ vymušany ŭciakać z Hazy, tolki niadaŭna viarnulisia ŭ rodny horad. Adnak Izrail jašče ŭ kancy žniŭnia papiaredziŭ, što nastup na horad Haza niepaźbiežny, i abaviazaŭsia spryjać biaśpiečnaj evakuacyi nasielnictva.

Pavialičyć

Izrail abiacaje stvaryć biaśpiečnuju humanitarnuju zonu dla pierasialencaŭ, pra jakuju budzie aficyjna abvieščana ŭ bližejšyja dni.

Na dadzieny momant viadoma, što zona budzie raspaściracca ad łahieraŭ biežancaŭ, skancentravanych u centralnaj častcy siektara, da paŭdniovaha rajona Al-Mavasi i dalej na ŭschod.

Miž tym mižnarodnyja naziralniki nahadvajuć, što ŭ pieršyja dni vajny Izrail užo abviaščaŭ prymorski rajon Al-Mavasi humanitarnaj zonaj, ale z tych časoŭ nieadnarazova nanosiŭ pa im udary.

Mižnarodny Čyrvony Kryž zajaviŭ, što va ŭmovach aktyŭnych bajavych dziejańniaŭ biaśpiečnaha sposabu pieramiaščeńnia ludziej nie isnuje.

U kancy žniŭnia ŭ horadzie Haza aficyjna było paćvierdžana najaŭnaść hoładu.

Da takoj vysnovy pryjšła arhanizacyja IPC — hłabalnaja inicyjatyva, jakaja abjadnoŭvaje ahienctvy AAN, humanitarnyja arhanizacyi i ŭrady šerahu krain, metaj jakich źjaŭlajecca vyznačeńnie najaŭnaści hoładu ŭ tym ci inšym rehijonie, ustalavańnie jaho pryrody i prapanavańnie sposabaŭ jaho likvidacyi.

Vadapravod i elektryčnaść dla biežancaŭ

U siaredzinie žniŭnia pradstaŭnik Upraŭleńnia AAN pa pravach čałavieka Tamin al-Chitan zajaviŭ, što paleścincy ŭ Al-Mavasi «majuć abmiežavany dostup abo ŭvohule nie majuć dostupu da asnoŭnych pasłuh i tavaraŭ, uklučajučy charčavańnie, vadu, elektryčnaść i pałatki».

COGAT na minułym tydni zajaviŭ, što Izrail prymaje kompleks mier pa padrychtoŭcy da «pierasialeńnia nasielnictva na poŭdzień siektara dziela jaho abarony», i hety kompleks uklučaje budaŭnictva novaha vadapravoda ź Jehipta ŭ Al-Mavasi, ramont užo isnujučych vadapravodaŭ, prakładzienych ź Izraila, i padklučeńnie linii elektrapieradačy da paŭdniovaha apraśnialnaha zavoda.

COGAT taksama paviedamiŭ pra pačatak rabot pa adnaŭleńni funkcyjanavańnia Jeŭrapiejskaj balnicy ŭ Chan-Junisie na poŭdni siektara.

Balnica była zakryta na niekalki tydniaŭ paśla praviadzieńnia vajennaj apieracyi, u vyniku jakoj, jak zajaŭlaje Izrail, byŭ zabity časovy lidar CHAMAS u siektary Haza Machamied Sinvar — brat ideołaha napadu bajevikoŭ na Izrail 7 kastryčnika Jachji Sinvara.

• 0
• 0
• 0
• 0
• 1
• 2
• 0
• 0