Karpušonak pryznała, što pieramahčy Łatušku ŭ samoj saboj zadadzienym farmacie joj nie pa siłach
Delehatka Kaardynacyjnaj rady Volha Karpušonak apublikavała post u fejsbuku, u jakim kanstatavała, što Pavieł Łatuška ŭ zadadzienym joj samoj farmacie publičnych raźbiralnictvaŭ nie pakidaje joj šancaŭ niečaha dabicca. Tamu ciapier žančyna pojdzie inšym šlacham.
Karpušonak zajaviła, što śviadoma admaŭlajecca ad padačy dadatkovaj infarmacyi i padrabiaznaściaŭ u ŚMI, bo heta budzie škodzić joj samoj.
«Publičnyja dyskusii i słaviesnyja svarki na hetym etapie tolki dajuć mahčymaść Łatušku sychodzić ad adkaznaści i pradstaŭlać siabie «achviaraj infarmacyjnaj kampanii», — śćviardžaje jana. — Vopyt apošnich tydniaŭ pakazaŭ: lubaja sproba dyjałohu ŭ miedyjaprastory vykarystoŭvajecca im jak instrumient dla manipulacyj».
Jana čakała, što paśla jaje videazapisaŭ ź vierbalnymi abvinavačvańniami na adras Łatuški jon budzie pavodzić siabie niejak inakš. Ale na praktycy vyjšła pa-inšamu.
«Publikacyja aŭdyjozapisaŭ i frahmientaŭ dokazaŭ na maim kanale ŭžo pakazała, što ŭ palemicy z Łatuškam biessensoŭna čakać pryznańnia ci chacia b sproby kanstruktyŭnaha adkazu. Čałaviek, jaki dziesiacihodździami pazicyjanuje siabie palitykam i dypłamatam, pavodzić siabie jak aŭtarytarny lider, jaki admaŭlaje zakony, normy marali i čałaviečaj hodnaści. Jaho taktyka — napad, abvinavačvańni ŭ adras inšych, pieravod uvahi na «śpiecsłužby» i štučnaje stvareńnie vobraza voraha», — narakaje Volha Karpušonak.
Tamu jana maje namier źmianić taktyku, havoračy heta «nie jak advakat, nie jak aktyvist, nie jak palityk», a «jak žančyna, jakaja vymušana była pralacieć tysiačy kiłamietraŭ, kab schavacca ad pieraśledu i damahańniaŭ, i jakaja bolš nie hatovaja maŭčać».
Adhetul, jak jana abiacaje, usie novyja fakty «buduć pieradavacca tolki ŭ aficyjnyja struktury i abnarodavacca ŭ praduhledžanym zakonam paradku». U hetym joj majuć dapamahčy kampietentny advakat, pošukam jakoha žančyna jakraz zajmajecca, a taksama nienazvanyja mižnarodnyja pravaabarončyja arhanizacyi, jakija nibyta «vykazali hatoŭnaść padtrymać mianie i zabiaśpiečyć poŭnuju prazrystaść pracesu».
Niaŭdača na pieršym etapie kanfliktu pryviała prafiesijnuju advakatku Volhu Karpušonak da pierakanańnia, što «mienavita jurydyčny šlach i instytucyjanalnaje supravadžeńnie — adzina mahčymy sposab damahčysia spraviadlivaści i pakłaści kaniec praktycy biespakaranaści».
Volha Karpušonak dajšła ŭ svaich skarhach da Parłamienckaj asamblei Rady Jeŭropy
Volha Karpušonak znachodzicca ŭ Rya-de-Žanejra?
Karpušonak apublikavała tekst svajoj zajavy na Łatušku ŭ ispanskuju prakuraturu
Łatuška: Zajava Karpušonak u palicyju Ispanii — poŭny pravavy absurd
U vieraśni Karpušonak płanavała trapić na siesiju PARIE, ale apošni miesiac jaje pavodziny źmianilisia — Vorychava
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty4
Kamientary