Biełarusu, aryštavanamu ŭ Hruzii, vydali časovy dakumient ab lehalizacyi
Michaił pierajechaŭ u Hruziju ŭ 2016 hodzie i z tych časoŭ, pavodle jaho słoŭ, na radzimie nie byŭ ni razu.
Hramadzianin Biełarusi, aryštavany, a zatym vyzvaleny ŭ Hruzii, atrymaŭ 7 žniŭnia časovy dakumient, jaki lehalizuje jaho dalejšaje znachodžańnie ŭ krainie. Pra heta mužčyna paviedamiŭ «Pozirku».
Raniej paviedamlałasia pra jaho zatrymańnie ŭ Departamiencie mihracyi MUS Hruzii, kudy biełarus pryjšoŭ padać zajavu na atrymańnie prytułku, jon byŭ aryštavany na try miesiacy. 18 lipienia Tbiliski haradski sud vyzvaliŭ mužčynu.
Michaił (imia źmienienaje) pierajechaŭ u Hruziju ŭ 2016 hodzie i z tych časoŭ, pavodle jaho słoŭ, na radzimie nie byŭ ni razu.
«U Biełarusi ja vučyŭsia ŭ Minskim duchoŭnym vučyliščy i sieminaryi, pracavaŭ u carkvie, — paviedamiŭ jon. — U Hruzii pieršyja piać hadoŭ žyŭ u Batumi, apošnija čatyry — u Tbilisi. Pracuju ciapier šef-kucharam».
«Paśla vybaraŭ 2020 hoda i represij, jakija pačalisia, udzielničaŭ u akcyjach salidarnaści ź biełarusami. Vioŭ aktyŭnaść u svaich sacyjalnych sietkach, kab u pieršuju čarhu pakazać miascovym siabram, što adbyvajecca ŭ Biełarusi», — adznačyŭ Michaił.
U kastryčniku 2020 hoda ŭ jaho zakančvaŭsia termin dziejańnia pašparta, tamu paŭstała pytańnie ab lehalizacyi: «Ja chacieŭ dačakacca vynikaŭ vybaraŭ i pajechać zamianić pašpart u Biełaruś, a taksama naviedać rodnych, bo my doŭhi čas nie bačylisia. Adnak paśla vybaraŭ stała zrazumieła, što jechać u Biełaruś niebiaśpiečna».
Niedzie praz try miesiacy na suviaź z mužčynam vyjšaŭ biełaruski śledčy. «Jon pytaŭsia, navošta ja publikuju «fejkavyja» naviny datyčna Biełarusi i padziej, jakija tam adbyvajucca, [kazaŭ] što ŭsio heta prapłačana Amierykaj abo Jeŭropaj, kab destabilizavać situacyju ŭ krainie», — skazaŭ surazmoŭca.
Pavodle słoŭ Michaiła, śledčy daŭ zrazumieć, što ŭ vypadku nieviartańnia ŭ Biełaruś «składanaści» ŭźniknuć u jaho baćkoŭ.
«Tady ja zrazumieŭ, što ŭ Biełaruś mnie dakładna niebiaśpiečna viartacca, — skazaŭ jon. — Paśla vybaraŭ ja źviartaŭsia ŭ ambasadu, ale ŭ vyniku jany kazali, što nie pamianiajuć mnie pašpart i tolki mohuć dać dakumient na viartańnie ŭ Biełaruś».
Ciapier mužčyna pryznaje, što było pamyłkaj i pašpart nie pamianiać, i pa prytułak nie źviarnucca: «Jak mnohija biełarusy, ja dumaŭ, što situacyja źmienicca: budzie padtrymka z boku Jeŭrapiejskaha sajuza, suśvietnaj supolnaści, i ŭsio stabilizujecca. Ale, na žal, ničoha hetaha nie adbyłosia. Potym u mianie byŭ tolki varyjant viarnucca ŭ Biełaruś, ale pa zrazumiełych pryčynach ja nie moh hetaha zrabić, tamu daviałosia zastavacca ŭ Hruzii nielehalna».
Nielehalny status, pavodle jaho słoŭ, nie pieraškadžaŭ pradaŭžać pracu i budavać karjeru, tamu «pachod u Departamient mihracyi ŭvieś čas adkładaŭsia».
«U hetym hodzie ja zrazumieŭ, što prajšło zanadta šmat času, i treba vyrašać hetuju prablemu, bo palityčnaja situacyja ŭ Hruzii ŭskładniajecca z kožnym hodam, — padzialiŭsia Michaił. — Tak, ja viedaŭ, što biełarusam nie dajuć u Hruzii prytułak,ale heta (pracedura razhladu adpaviednaha zapytu) daje lehalny status znachodžańnia ŭ krainie».
Jon adznačyŭ, što ŭ Departamiencie mihracyi zajavu na atrymańnie mižnarodnaj abarony pryniali, ale paviedamili, što zapyt apracavać «nie paśpiejuć». Pry hetym, dadaŭ surazmoŭca, da kanca pracoŭnaha dnia zastavałasia jašče paŭtary hadziny.
«Ja abmiarkoŭvaŭ z pravaabaroncam [Ramanam Kiślakom], kolki zvyčajna zajmaje apracoŭka zajavy, i jon skazaŭ, što ŭ siarednim kala hadziny na adnaho čałavieka. Ale mnie skazali: «Siońnia my nie paśpiejem apracavać vašu zajavu, tamu prychodźcie zaŭtra — tady ŭsio aformim». Mnie viarnuli pašpart i zajavu. Jak tolki ja vyjšaŭ z pamiaškańnia, mianie adrazu zatrymali», — skazaŭ Michaił.
Da suda biełarusa ŭtrymlivali centry izalacyi dla mihrantaŭ, dzie, pavodle jaho słoŭ, kamiery «z roznym kamfortam».
«Ja byŭ u samym «minimalnym», — udakładniŭ mužčyna. — Heta kamiera na 12 čałaviek, šeść dvuchjarusnych łožkaŭ. U kamiery davoli drenna pachła, plus pastajanna chtości paliŭ, ad čaho za 10 chvilin znachodžańnia tam ty litaralna pačynaješ pachnuć, jak popielnica. Jość dva akny z fortačkaj u šyryniu 15 santymietraŭ, ale heta nie vielmi dapamahaje. U nas nie było navat hadzińnikaŭ, kab razumieć, kolki času. Ty znachodzišsia ŭ kamiery i nie viedaješ, čym siabie zaniać, što adbivajecca psichałahična na čałavieku. Niekatoryja pačynali praz tydzień prosta razmaŭlać [padčas prahułak] z kotkami, jakija zachodzili na terytoryju».
Na dumku Michaiła, jamu pašancavała z advakatami, jakich znajšli jaho dziaŭčyna i pravaabaronca Kiślak.
«Advakaty sabrali dokazy, što ja padaŭ zajavu na pradastaŭleńnie prytułku, i mnie admovili, što źjaŭlajecca niezakonnym, što ja nie źbirajusia chavacca ŭ Hruzii. Mnie napisali rekamiendacyjnyja listy z pracy, my prapanavali apłacić zakład. I sudździa pryniaŭ rašeńnie ab alternatyŭnaj miery strymańnia», — skazaŭ mužčyna.
Pavodle słoŭ Michaiła, na kožnym intervju supracoŭniki mihracyjnaj słužby pytalisia, ci choča jon, kab departamient źviazaŭsia z ambasadaj Biełarusi. «Ja admaŭlaŭsia i kazaŭ, kab jany nie padavali im infarmacyju. U mianie stajała zabarona na vyjezd ź Biełarusi. Ja źviazaŭsia z baćkami, kab jany pasprabavali atrymać dakumient, jaki heta paćviardžaje. Jany patelefanavali ŭ milicyju ci pašpartny stoł, dzie im skazali, što ja zatrymany ŭ Hruzii, choć mianie ŭžo vypuścili da hetaha momantu», — adznačyŭ biełarus.
Ciapier Michaiłu vydali ID-kartu, jakaja budzie dziejničać da žniŭnia 2026 hoda. Dakumient nie zdymaje mieru strymańnia, ale, pavodle słoŭ mužčyny, źjaŭlajecca «peŭnym hłytkom pavietra».
«Ja mahu aficyjna pracavać, navat mahu ažanicca ŭ Hruzii, atrymlivać miedycynskuju dapamohu», — reziumavaŭ Michaił.
Raniej, kamientujučy vyzvaleńnie biełarusa, Kiślak paviedamiŭ «Pozirku», što sudovym rašeńniem aryšt zamienieny nieabchodnaściu adznačacca ŭ Departamiencie mihracyi MUS dva razy na tydzień. «U toj ža čas toj bok maje prava abskardzić rašeńnie suda», — skazaŭ pravaabaronca.
Hruzinskija ŭłady adchilajuć usie zajavy biełarusaŭ ab pradastaŭleńni prytułku. Kiroŭnaja partyja «Hruzinskaja mara» prarasijskaha aliharcha Bidziny (Barysa) Ivanišvili pajšła na kanfrantacyju ź Jeŭrasajuzam i ZŠA, pryznaje režym Łukašenki. Abrany adnapartyjnym (apazicyja admoviłasia ŭvajści) parłamientam prezident Michaił Kaviełašvili pavinšavaŭ taho z «pieraabrańniem». Mietady baraćby z apazicyjaj usio bolš nahadvajuć biełaruskija.
U Hruzii ciapier pražyvaje kala 12 tys. biełarusaŭ, jakija emihravali z-za pahrozy represij. Ich kolkaść pastupova pamianšajecca.
Kamientary