Miełanija Tramp zajaviła, što była ledź znajomaja z Epštejnam i zapatrabavała spynić raspaŭsiudžvać čutki pra jaje suviazi ź im
Pieršaja łedzi ZŠA ŭ čaćvier skazała žurnalistam u Biełym domie, što čutki, byccam mienavita Epštejn paznajomiŭ jaje z budučym mužam Donaldam Trampam — heta złyja sproby ačarnić jaje reputacyju.
Akramia taho, Miełanija Tramp zaklikała pravieści ŭ Kanhresie ZŠA słuchańni z udziełam achviar seksualnaj ekspłuatacyi z boku Epštejna, piša Bi-bi-si.
Što prymusiła Miełaniju Tramp vystupić mienavita zaraz, niezrazumieła. Zahadzia pra padrychtoŭčuju zajavu pieršaj łedzi jaje ofis žurnalistaŭ nie apaviaściŭ.
Miełanija Tramp skazała, što była ledź znajomaja z Epštejnam i tolki koratka «pierasiakałasia» ź im u 2000 hodzie. Jana nazvała «chłuśnioj» śćviardžeńni, što z budučym mužam jaje paznajomiŭ mienavita Epštejn, i skazała, što raspaŭsiudžvańnie hetych čutak «pavinna spynicca».
Miełanija Tramp śćviardžaje, što paznajomiłasia z Donaldam Trampam na viečarynie ŭ Ńju-Jorku ŭ 1998 hodzie, a z Epštejnam — tolki praz dva hady, na inšaj viečarynie, i tam jana była ŭžo razam z Trampam.
Jana taksama zajaviła, što nie źjaŭlajecca adnoj z achviar seksualnaj ekspłuatacyi Epštejna i nie viedała pra jaho schilnaści.
«Ja ničoha nie viedała pra toje, jak Epštejn abychodziŭsia sa svaimi achviarami. Ja nie była da hetaha datyčnaja ni ŭ jakim statusie. Ja ŭ hetym nie ŭdzielničała», — skazała jana.
Akramia taho, Miełanija Tramp zajaviła, što nie była znajomaja ź siabroŭkaj i saŭdzielnicaj Epštejna Hiślejn Makśvieł. Pra napisany joju ŭ 2002 hodzie list Makśvieł, znojdzieny siarod materyjałaŭ spravy Epštejna, Miełanija Tramp skazała, što heta była «zvyčajnaja pierapiska», ničoha nie značny «vietlivy adkaz».
Tekst hetaha lista, adpraŭlenaha pa elektronnaj pošcie, apublikavaŭ časopis New York Magazine. U liście, adrasavanym «H.» — jak miarkujecca, Hiślejn Makśvieł — Miełanija chvalić fatahrafiju «Dž. E.», apublikavanuju ŭ tym ža časopisie, i piša, što joj «chočacca pryjechać» u Pałm-Bič. U hetym horadzie ŭ Fłarydzie tady žyŭ Epštejn.
«Patelefanuj mnie, kali vierniešsia ŭ Ńju-Jork, — havorycca ŭ liście. — Žadaju dobra pravieści čas! Ź luboŭju, Miełanija»
U artykule New York Magazine pryviedzieny taksama vykazvańni Donalda Trampa pra Epštejna jak pra «ašałamlalnaha chłopca», ź jakim viesieła pravodzić čas.
«Kažuć navat, što jon lubić pryhožych žančyn tak ža, jak i ja, i ŭ tym liku žančyn pamaładziej. Džefry lubić śvieckaje žyćcio, tut sumniavacca nie davodzicca», — cytuje vydańnie Trampa.
Raźvivajučy svaju dumku pra słuchańni ŭ Kanhresie, Miełanija Tramp skazała, što kanhresmieny, na jaje pohlad, pavinny dać achviaram Epštejna mahčymaść dać pakazańni pad prysiahaj.
«Kožnaja z hetych žančyn pavinna atrymać mahčymaść publična raskazać svaju historyju, kali jana hetaha choča, i jaje pakazańni pavinny być zafiksavanyja ŭ archivie Kanhresa. Tady i tolki tady my daviedajemsia praŭdu», — skazała pieršaja łedzi.
Jana nie stała adkazvać na pytańni žurnalistaŭ paśla vystupu.
U zajavie, apublikavanaj paśla vystupu Miełanii Tramp, Robiert Harsija, člen nahladnaha kamiteta Pałaty pradstaŭnikoŭ ad Demakratyčnaj partyi, paviedamiŭ: «My zhodnyja z zaklikam Miełanii Tramp pravieści publičnyja słuchańni».
«My zaklikajem staršyniu Komiera adkazać na prośbu pieršaj łedzi i nieadkładna zapłanavać hramadskija słuchańni», — dadaŭ Harsija, majučy na ŭvazie kiraŭnika nahladnaha kamiteta Džejmsa Komiera.
Čutki pra adnosiny pamiž pieršaj łedzi i Epštejnam raniej užo stali pradmietam sudovych razhladaŭ.
Naprykład, u kastryčniku 2025 hoda vydaviectva HarperCollins UK zajaviła, što vydalić z knihi frahmienty, jakija źmiaščajuć «niepaćvierdžanyja» śćviardžeńni pra toje, što budučy prezident ZŠA Donald Tramp i jaho žonka paznajomilisia dziakujučy Epštejnu. Vydańnie Daily Beast vydaliła artykuł z anałahičnymi zajavami i pryniesła prabačeńni za publikacyju, jakaja, pa pryznańni redakcyi, «nie adpaviadała našym standartam».
Pieršaja łedzi taksama akazałasia ŭciahnutaj u sudovuju sprečku z aŭtaram Majkłam Volfam z-za jaho knihi «Ahoń i jaraść», dzie jon piša, što što Miełanija paznajomiłasia sa svaim mužam praz ahienta pa padbory madelaŭ, źviazanaha z Epštejnam.
Volf padaŭ sustrečny pazoŭ suprać Miełanii Tramp paśla taho, jak jana pryhraziła jamu pazovam pra abaronu honaru i hodnaści na sumu 1 młrd dalaraŭ.
«Maje advakaty i ja paśpiachova zmahalisia z hetymi nieabhruntavanymi i biespadstaŭnymi iłžyvymi abvinavačvańniami i my biez vahańniaŭ praciahniem abaraniać maju biezdakornuju reputacyju», — zajaviła jana ŭ čaćvier.
Miełanija Tramp redka źjaŭlajecca na publicy i tym bolš vystupaje ŭ Biełym domie. Jaje vystup u čaćvier staŭ adnym ź niešmatlikich padobnych mierapryjemstvaŭ u hrafiku pieršaj łedzi, jakaja z momantu viartańnia muža ŭ Bieły dom prajaviła siabie jak upłyvovy, ale niepubličny čałaviek.
Zajava Miełanii Tramp, vierahodna, padlije aleju ŭ ahoń hramadskaj dyskusii pra toje, jak ministerstvu justycyi ZŠA treba było pastupić z materyjałami spravy Džefry Epštejna, jaki skončyŭ žyćcio samahubstvam u turemnaj kamiery ŭ 2019 hodzie.
Sam Donald Tramp daŭno pryznaŭ, što niejki čas mieŭ znosiny z Epštejnam, ale paźniej zajaviŭ, što prahnaŭ jaho sa svajho majontka Mar-a-Łaha ŭ Pałm-Bič, zrazumieŭšy, što toj — «brydki typ».
Imia Trampa zhadvajecca ŭ «fajłach Epštejna» mnostva razoŭ, ale śviedčańniaŭ jakich-niebudź supraćzakonnych učynkaŭ Trampa ŭ ich niama.
Kamientary