Paśla taho jak prezident Rasii Uładzimir Pucin faktyčna admoviŭsia ad biezumoŭnaha pieramirja, ukrainskija vajskoŭcy adnavili masavyja ataki dronami na Maskvu i Padmaskoŭje.
21 maja dniom rasijskija siły SPA źbili jak minimum čatyry ŭkrainskija bieśpiłotniki, jakija nakiroŭvalisia da stalicy. Pra heta paviedamiŭ mer Maskvy Siarhiej Sabianin. U roznych rajonach Padmaskoŭja, u tym liku ŭ Damadziedavie, Padolsku i Sierpuchavie, miascovyja žychary čuli vybuchi, jakija śviedčyli pra pracu supraćpavietranaj abarony.
Adzin z dronaŭ upaŭ na terytoryi dziciačaha sadka ŭ Damadziedavie. Pa słovach kiraŭnicy rajona, nichto nie paciarpieŭ, dziaciej i supracoŭnikaŭ evakujavali ŭ padvał, i ciapier usio pad kantrolem.
Praz ataki bieśpiłotnikaŭ niekatory čas byli zakrytyja aeraporty ŭ Maskvie (Damadziedava, Žukoŭski, Šaramiecieva) i inšych haradach, takich jak Uładzimir, Ivanava, Kałuha, Jarasłaŭl i Kastrama.
Ministerstva abarony Rasii paviedamiła, što tolki 21 maja rasijskija SPA źbili nie mienš za 232 ukrainskija drony ŭ roznych rehijonach krainy, u tym liku ŭ Arłoŭskaj, Kurskaj, Tulskaj, Maskoŭskaj i inšych abłaściach.
Papiaredni masavy nalot adbyŭsia ŭ pačatku maja pierad śviatkavańniem u Rasii Dnia Pieramohi — tady było źbita bolš za 500 dronaŭ.
Na hetym fonie ŭ Maskvie ŭviali śpiecyjalny hrafik dla rabotnikaŭ kamunalnych słužbaŭ, jakija ciapier nazirajuć za niebam ź binoklami. U toj ža čas pavyšanaja aktyŭnaść dronaŭ pryviała da parušeńnia avijapieralotaŭ, zakranuŭšy dziasiatki tysiač pasažyraŭ i sotni rejsaŭ.
Apieracyja dronaŭ pačałasia paśla biezvynikovych pieramoŭ pamiž Uładzimiram Pucinym i Donaldam Trampam 19 maja, jakija doŭžylisia dźvie hadziny, ale nie prynieśli kankretnych damoŭlenaściaŭ.
Stała viadoma, dzie pracuje favarytka Łukašenki Uładlena Zajcava19
Kamientary