10 krasavika pamior piśmieńnik Juraś Nieratok, paviedamiŭ piśmieńnicki kłub «Litaraturny ekvatar». Jamu było 64 hady.
Juraś Nieratok (pa pašparcie Juryj Harbačoŭ) naradziŭsia 19 vieraśnia 1961 hoda ŭ vioscy Bajary Mastoŭskaha rajona ŭ siamji nastaŭnikaŭ-fiłołahaŭ. Dziacinstva pravioŭ u vioscy Chadaki Ivacevickaha rajona.
U 1983 hodzie skončyŭ Biełaruski politechničny instytut. Pracavaŭ kanstruktaram na Minskim aŭtazavodzie, u NVA «Centr», hałoŭnym kanstruktaram STDA «Vientura», TAA «Hradzis», zahadčykam siektara prajektavańnia elektramiechaničnych kampanientaŭ Abjadnanaha instytuta mašynabudavańnia Nacyjanalnaj akademii navuk Biełarusi. Byŭ členam Biełaruskaha sajuza architektaraŭ.
Drukavaŭsia ŭ šmatlikich hazietach i časopisach, kalektyŭnych zbornikach i almanachach. Aŭtar knih vieršaŭ «Fotaalbom» (2003) i «Spoviedź struny» i knih prozy «Zakućcie» (2007) i «Niepatrebnyja ludzi» (2019). Aŭtar i ŭkładalnik kalektyŭnaj elektronnaj paemy «Busłan i Žambiła» (2012). Saaŭtar (sumiesna ź Irynaj Karnauchavaj i Marynaj Šapavałavaj) paetyčnaha tryjałoha «Zabłytaŭsia siarod navin» (2017).
Šmat pisaŭ taksama pa-rusku — pad psieŭdanimam Juryj Jułaŭ.
Byŭ členam Sajuza piśmieńnikaŭ Biełarusi, členam-zasnavalnikam narodnaha kłuba paetaŭ i kampazitaraŭ «Žyvica». Akramia litaraturnaj tvorčaści, byŭ viadomy i jak bard.
Raźvitańnie ź Jurasiom Nieratkom adbudziecca 13 krasavika ŭ rytualnaj zale na vulicy Kulman, 33a ŭ Minsku, z 10‑j da 11‑j hadziny. Pachavany piśmieńnik budzie na radzimie — u vioscy Chadaki Ivacevickaha rajona.
Ciapier čytajuć
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm1818
Kamientary