Adpačyvalniki: «Lubanskija karjery pad zabaronaj, darohi pierakapajuć!» Ci sapraŭdy?
Lubanskija krejdavyja karjery — heta ŭnikalnaje miesca ŭ Biełarusi, jakoje nazyvajuć «błakitnymi aziorami» ci «biełaruskimi Maldyvami» praz charakternaje biruzovaje adcieńnie vady. Uletku siudy źjazdžajucca biełarusy, kab pabyć na pryrodzie i zrabić malaŭničyja fota. Ale dniami ŭ Threads źjaviłasia tryvožnaja infarmacyja: nibyta karjery apynucca pad zabaronaj. Pra heta paviedamiła dziaŭčyna, jakaja pryjechała tudy adpačyć i pačuła pra płany pierakopać darohi vakoł vadajoma. Ci praŭda heta, vyśviatlaŭ Onlíner.
Post pra situacyju na karjerach vyhladaje tak:
«Lubanskija karjery pad zabaronaj! Dziažurać DAI, MNS, leśniki. Staić šłahbaum i fotapastki. Z 20.07.2026, sa słoŭ leśnika, pryhoniać śpiectechniku i pierakapajuć usie abjaznyja darohi».
Lubanski lashas: «Nichto dostup da miełavych karjeraŭ nie zakryvaje»
Onlíner źviarnuŭsia ŭ Lubanski lashas. Situacyju prakamientavaŭ hałoŭny laśničy:
«Nichto dostup da miełavych karjeraŭ nie zakryvaje. Naviedvańnie lesu rehulujecca zhodna z kłasam pažarnaj niebiaśpieki. Voś siońnia pieršy kłas: na miełavyja karjery možna zajści i zajechać na mašynie. Kali abvieščany treci kłas, to zachodzić možna, ale zajazdžać na mašynie nielha. Čaćviorty i vyšejšy — nielha ni zajazdžać, ni zachodzić, to-bok naviedvańnie lesu zakrytaje.
Śpiectechniku my sapraŭdy pryhonim, kab pierakapać usie abjaznyja darohi, akramia adnoj — jakaja idzie z Kambinata budaŭničych materyjałaŭ u bok Urečča. Pa joj možna budzie i zajechać, i vyjechać.
Sioleta na joj navat zrabili ramont. Kali naviedvańnie lesu budzie abmiežavanaje, šłahbaum budzie začyniacca. Robicca heta dla taho, kab nie było tych lichich jezdakoŭ, jakija praź les sprabujuć zajechać, niahledziačy na abmiežavańni i štraf, jaki im pahražaje. U nas niama inšaha šlachu, akramia jak uparadkavać hety ruch. My robim heta kožny hod».
Pierad tym jak jechać na Błakitnyja aziory, na sajcie Ministerstva lasnoj haspadarki, u raździele pra Lubanski lashas, možna pravieryć kłas pažarnaj niebiaśpieki.
Kupacca na Lubanskich miełavych karjerach zabaroniena. Heta techničny vadajom z abryvistymi bierahami.
Kamientary