Kab pieraadoleć stvorany ŭładami kadravy hoład, u pravincyju pieraviali słužyć ksiandza ź Minska
Viadomy katalikam Minska i papularny ŭ sacsietkach katalicki śviatar, manach-karmielit Siarhiej Tryścień pieraviedzieny na novaje miesca słužeńnia. Jon byŭ nastajacielem manaskaj supolnaści ŭ Minsku i słužyŭ u kaściole Božaha Cieła na vulicy Hierasimienki, a ciapier pryznačany probaščam parafii ŭ Naračy Miadzielskaha rajona, piša vydańnie Katolik.life.
U hetym miastečku ajciec Siarhiej Tryścień słužyć užo kala troch tydniaŭ, i zaraz stała zrazumieła, što heta nie časova — u niadzielu, 26 lipienia adbudziecca ŭstupleńnie na pasadu novaha probašča ŭ Naračy, havorycca ŭ abjavach parafii.
Da niadaŭniaha času probaščam tut byŭ ajciec Pavieł Lalita, ale nijakich uzhadak pra jaho niama z taho momantu, kali jon byŭ pryznačany nastajacielem supolnaści karmielitaŭ u Naračy.
Z hetaha možna zrabić vysnovu, što śviatar praciahvaje zastavacca ŭ Naračy, ale, nakolki viadoma viernikam, nie moža słužyć publična — z-za taho, što dziaržaŭnyja ŭłady nie praciahnuli jamu dazvoł na dalejšuju relihijnuju dziejnaść. Toje, što jon pakinuŭ pasadu probašča, aznačaje, što pierahladu rašeńnia ab niepraciahu dazvołu nie adbyłosia.
Jon — adzin ź piaci śviataroŭ Minska-Mahiloŭskaj archidyjacezii, jakija majuć polskaje hramadzianstva i ŭžo šmat hadoŭ słužać u Biełarusi, i dalejšuju relihijnuju dziejnaść jakich niadaŭna nie ŭzhadniŭ Aparat upaŭnavažanaha pa spravach relihij i nacyjanalnaściaŭ.
Dvoje z hetych śviataroŭ užo pakinuli Biełaruś, a astatnija — pavodle źviestak viernikaŭ — majuć namier atrymać hramadzianstva Biełarusi. Kali heta adbudziecca, jany znoŭ zmohuć słužyć publična — dazvoł uładaŭ u hetym vypadku nie patrabujecca.
A pakul, kab zamianić ajca Paŭła Lalitu na pasadzie probašča, u Narač daviałosia pieravieści ź Minska ajca Siarhieja Tryścienia.
Vikaryjat karmielitaŭ u Biełarusi składajecca z čatyroch supolnaściaŭ: u Miadzieli, Hudahai, Naračy i Minsku. U ich słužać 13 śviataroŭ, a jašče adzin brat prachodzić manaskuju farmacyju.
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca10
Kamientary
praści mia hospadzie praści majho bocha dušu hrečnuju