Jeŭrapiejskaja kamisija aštrafavała kitajskuju internet-płatformu AliExpress na 550 miljonaŭ jeŭra za parušeńnie patrabavańniaŭ Zakona Jeŭrapiejskaha sajuza ab ličbavych pasłuhach (Digital Services Act), piša Politico.
U Brusieli ličać, što kampanija nie zabiaśpiečyła naležnuju abaronu jeŭrapiejskich spažyŭcoŭ ad ryzykoŭnych i zabaronienych tavaraŭ. Pavodle vysnoŭ rehulatara, płatforma niedastatkova efiektyŭna aceńvała mahčymyja pahrozy, pieraacaniła mahčymaści svaich sistem maderacyi i nie ŭličyła ŭpłyŭ ałharytmaŭ rekamiendacyj na raspaŭsiudžvańnie niebiaśpiečnaj pradukcyi.
Padčas pravierki Jeŭrakamisija vyjaviła, što miery suprać niadobrasumlennych pradaŭcoŭ dziejničali nienaležnym čynam. Navat paśla papiaredžańniaŭ na płatformie praciahvali pradavacca padroblenyja tavary, niebiaśpiečnyja cacki i kaśmietyka. Akramia taho, niekatoryja pradaŭcy śviadoma paznačali niapravilnyja katehoryi pradukcyi, kab abyści pravierki biaśpieki.
Vykanaŭčy vice-prezident Jeŭrakamisii pa pytańniach technałahičnaha suvierenitetu, biaśpieki i demakratyi Chiena Virkunien padkreśliła, što vialikija maštaby płatformy nie mohuć być apraŭdańniem dla parušeńniaŭ. Pavodle jaje słoŭ, internet-placoŭki pavinny svoječasova vyjaŭlać i likvidavać ryzyki dla pakupnikoŭ.
Sumu štrafu vyznačali z ulikam charaktaru parušeńniaŭ, ich praciahłaści i nastupstvaŭ dla spažyŭcoŭ. Pavodle Jeŭrakamisii, patrabavańni zakona parušalisia jak minimum da červienia 2025 hoda.
Ciapier AliExpress pavinna da 20 kastryčnika 2026 hoda pradstavić płan pa vypraŭleńni vyjaŭlenych niedachopaŭ. Kali kampanija nie vykanaje patrabavańni jeŭrapiejskaha rehulatara, joj mohuć pahražać novyja štrafy.
Rasśledavańnie ŭ dačynieńni da płatformy Jeŭrakamisija pačała ŭ sakaviku 2024 hoda. Paźniej byli vyjaŭlenyja parušeńni, źviazanyja z acenkaj ryzyk dla pakupnikoŭ, maderacyjaj kantentu, prazrystaściu rekłamnych i rekamiendacyjnych ałharytmaŭ, a taksama pravierkaj pradaŭcoŭ.
Akramia hetaha, AliExpress moža stać fihurantam jašče adnoj sudovaj spravy. Francyja raniej zajaviła pra namier źviarnucca ŭ sud z-za prodažu na płatformie tavaraŭ dla darosłych, jakija imitujuć dziciačuju źniešnaść.
Čamu Ukraina ŭdaryła pa składach Wildberries i jak usiudyisny markietpłejs źviazany z rasijskaj armijaj
«Maja praca zhareła». Biełaruskija biznesy stracili tavar na składach Wildberries, ale majuć bolš šancaŭ na kampiensacyju, čym rasijanie
Paśla ataki pa dvuch składach Wildberries mahli paciarpieć da 15% składskich płoščaŭ kampanii
Ciapier čytajuć
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach1212
Kamientary
3 jevro sbora za lubuju posyłku iz za rubieža- iz toj žie opiery
Da i darosłym jab ni raił.. ...majtki adtul nabyvać astatniaje na rozhlad)))