Еўрапейская камісія аштрафавала кітайскую інтэрнэт-платформу AliExpress на 550 мільёнаў еўра за парушэнне патрабаванняў Закона Еўрапейскага саюза аб лічбавых паслугах (Digital Services Act), піша Politico.
У Бруселі лічаць, што кампанія не забяспечыла належную абарону еўрапейскіх спажыўцоў ад рызыкоўных і забароненых тавараў. Паводле высноў рэгулятара, платформа недастаткова эфектыўна ацэньвала магчымыя пагрозы, пераацаніла магчымасці сваіх сістэм мадэрацыі і не ўлічыла ўплыў алгарытмаў рэкамендацый на распаўсюджванне небяспечнай прадукцыі.
Падчас праверкі Еўракамісія выявіла, што меры супраць нядобрасумленных прадаўцоў дзейнічалі неналежным чынам. Нават пасля папярэджанняў на платформе працягвалі прадавацца падробленыя тавары, небяспечныя цацкі і касметыка. Акрамя таго, некаторыя прадаўцы свядома пазначалі няправільныя катэгорыі прадукцыі, каб абысці праверкі бяспекі.
Выканаўчы віцэ-прэзідэнт Еўракамісіі па пытаннях тэхналагічнага суверэнітэту, бяспекі і дэмакратыі Хена Віркунен падкрэсліла, што вялікія маштабы платформы не могуць быць апраўданнем для парушэнняў. Паводле яе слоў, інтэрнэт-пляцоўкі павінны своечасова выяўляць і ліквідаваць рызыкі для пакупнікоў.
Суму штрафу вызначалі з улікам характару парушэнняў, іх працягласці і наступстваў для спажыўцоў. Паводле Еўракамісіі, патрабаванні закона парушаліся як мінімум да чэрвеня 2025 года.
Цяпер AliExpress павінна да 20 кастрычніка 2026 года прадставіць план па выпраўленні выяўленых недахопаў. Калі кампанія не выканае патрабаванні еўрапейскага рэгулятара, ёй могуць пагражаць новыя штрафы.
Расследаванне ў дачыненні да платформы Еўракамісія пачала ў сакавіку 2024 года. Пазней былі выяўленыя парушэнні, звязаныя з ацэнкай рызык для пакупнікоў, мадэрацыяй кантэнту, празрыстасцю рэкламных і рэкамендацыйных алгарытмаў, а таксама праверкай прадаўцоў.
Акрамя гэтага, AliExpress можа стаць фігурантам яшчэ адной судовай справы. Францыя раней заявіла пра намер звярнуцца ў суд з-за продажу на платформе тавараў для дарослых, якія імітуюць дзіцячую знешнасць.
Чаму Украіна ўдарыла па складах Wildberries і як усюдыісны маркетплэйс звязаны з расійскай арміяй
«Мая праца згарэла». Беларускія бізнэсы страцілі тавар на складах Wildberries, але маюць больш шанцаў на кампенсацыю, чым расіяне
Пасля атакі па двух складах Wildberries маглі пацярпець да 15% складскіх плошчаў кампаніі
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары
3 евро сбора за любую посылку из за рубежа- из той же оперы
Да і дарослым яб ні раіл.. ...майткі адтуль набываць астатняе на розгляд)))