Беларуска Дар'я расказала ў Threads, што атрымала дзіўнае паведамленне ад падатковай службы. З яго вынікала, што яе знялі з уліку як памерлую. Аднак насамрэч прычынай непаразумення стала ўласная няўважлівасць дзяўчыны, піша Blizko.by.
«Сёння нарэшце даведалася, што я, аказваецца, памерла», — напісала дзяўчына.
На скрыншотах паведамлення было відаць, што падатковая зняла Дар'ю з уліку як плацельшчыцу падатку на прафесійны даход. У якасці падставы пазначылі абзац другі падпункта 3.2 пункта 3 артыкула 381 Падатковага кодэкса. Дзяўчына знайшла адпаведную норму і звярнула ўвагу, што ў ёй гаворыцца пра магчымасць зняць з уліку памерлую асобу.
Аднак каментатары патлумачылі, што Дар'я няправільна палічыла абзацы. Адлік трэба было пачынаць з радка, дзе пазначаны сам падпункт 3.2. Таму другі абзац тычыцца не смерці, а неадпаведнасці відаў дзейнасці патрабаванням для плацельшчыкаў падатку на прафесійны даход. Менавіта з гэтай прычыны дзяўчыну і знялі з уліку.
Карыстальнікі Threads звярнулі ўвагу на памылку і пажартавалі, што дзякуючы гэтай гісторыі Дар'я даведалася, як правільна лічыць абзацы.
Каментары