Спецыялісты расказалі, якія фішынгавыя лісты найчасцей адкрываюць беларусы. Лідарам стала запрашэнне на суботнік
Найчасцей супрацоўнікі беларускіх арганізацый адкрываюць фішынгавыя лісты, якія тычацца звычайных працоўных пытанняў. Пра гэта сведчаць вынікі вучэбных фішынгавых рассылак «Лабараторыі Касперскага» за студзень — кастрычнік 2026 года, прадстаўленыя на форуме «Кібербяспека — 2027», піша БелТА.
Самай дзейснай прынадай аказалася запрашэнне на абавязковы суботнік: на такую спасылку перайшлі 23% супрацоўнікаў, якія атрымалі ліст. Паведамленні пра перанос працоўных дзён і разліковыя лісты зацікавілі па 11% атрымальнікаў.
Значна радзей супрацоўнікі рэагавалі на паведамленні, якія імітавалі афіцыйныя паведамленні. Фальшывае паведамленне ад Цэнтра абароны інфармацыі зацікавіла 3% атрымальнікаў, паведамленне пра недастаўлены ліст — 2%. Амаль ніхто не адрэагаваў на паведамленне пра пачатак пазапланавай праверкі. Па 1% супрацоўнікаў перайшлі па спасылках у лістах пра новую сістэму гадавога прэміравання і пашырэнне пераліку карпаратыўных паслуг.
Эксперты ў галіне кібербяспекі адзначаюць, што зламыснікі выкарыстоўваюць працоўныя тэмы, якія выклікаюць эмоцыі і зніжаюць пільнасць. Напрыклад, абавязковы ўдзел у суботніку або атрыманне разліковага ліста. Паведамленні, звязаныя з працоўнымі працэсамі, становяцца асабліва эфектыўнай прынадай для фішынгавых атак.
Лісты, якія выдаюць сябе за рассылкі ад аддзела кадраў або ўнутраных службаў арганізацыі, супрацоўнікі могуць успрымаць як надзейныя. Таму для абароны патрэбныя не толькі тэхнічныя сродкі, але і рэгулярнае навучанне персаналу, а таксама звычка правяраць паведамленні, нават калі яны выглядаюць цалкам звычайнымі.
Па словах экспертаў, стрыманая рэакцыя супрацоўнікаў на некаторыя віды вучэбнага фішынгу можа сведчыць пра тое, што яны сталі больш уважліва ставіцца да падазроных паведамленняў. Аднак у рэальных атаках ашуканцы ўсё часцей выкарыстоўваюць штучны інтэлект, каб ствараць пераканаўчыя лісты, якія цяжка адрозніць ад сапраўдных.
Каб знізіць рызыку фішынгавых атак, спецыялісты раяць рэгулярна навучаць супрацоўнікаў распазнаваць метады сацыяльнай інжынерыі, абнаўляць праграмнае забеспячэнне і выкарыстоўваць сродкі абароны карпаратыўнай пошты і прылад. Таксама важна ствараць складаныя ўнікальныя паролі для працоўных уліковых запісаў і захоўваць іх у спецыяльных менеджарах пароляў.
Расійскія хакеры ўзламваюць смартфоны нават праз надзейныя сайты. Адзіная страхоўка: абнаўляць праграмнае забеспячэнне
Махляры навучыліся здаваць праз Booking неіснуючае жыллё — вось як працуюць схемы
Адкуль махляры даведваюцца імёны, нумары і нават месцы працы беларусаў?
Махляры сталі рассылаць беларускамоўныя паведамленні ад ДАІ нібыта для аплаты штрафаў
Цяпер чытаюць
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы7171
Каментары