У маскоўскім інстытуце, якім кіруе сябар Пуціна, сабралі пажылых малпаў для стварэння «эліксіру даўгалецця»

У гадавальніках інстытута ўтрымліваецца больш за 7 тысяч прыматаў 22‑х відаў. Навукоўцы вывучаюць малпаў ва ўзросце ад 18 да больш як 30 гадоў, каб даследаваць розныя стадыі старэння. Праводзяцца біяхімічныя і структурныя даследаванні, вывучаюцца сасуды і мозг.

Кавальчук назваў прыматаў найбольш блізкай да чалавека мадэллю для вывучэння старэння і стварэння сістэмы, якая дазволіць падаўжаць працягласць жыцця.

Інстытут Курчатава разам з Расійскім навуковым цэнтрам хірургіі ўжо стварыў біябанк узораў крыві малпаў-доўгажыхароў. Па словах дырэктара цэнтра Канстанціна Каценкі, гэтыя матэрыялы будуць выкарыстоўваць для вывучэння працэсаў старэння.

Міхаіла Кавальчука лічаць даўнім сябрам 74‑гадовага Пуціна і яго неафіцыйным дарадцам у навуковых пытаннях. Ягоны брат, мільярдэр Юрый Кавальчук, уваходзіць у найбліжэйшае атачэнне расійскага прэзідэнта. Сам Пуцін праяўляе вялікую цікавасць да праблемы даўгалецця. У верасні 2025 года падчас візіту ў Кітай ён, як высветлілі журналісты, абмяркоўваў з кіраўніком Кітая Сі Цзіньпінам магчымасць падаўжэння жыцця да 150 гадоў.

Даследаваннямі ў галіне генетыкі займаецца і старэйшая дачка Пуціна, доктарка-эндакрынолаг Марыя Варанцова. У кастрычніку яна выступіла ў Маскоўскай школе кіравання «Сколкава», дзе адкрылася лабараторыя даўгалецця. Варанцова назвала спробы выйсці за натуральныя межы чалавечага жыцця імкненнем «падмануць Бога».

Паводле звестак The Wall Street Journal, у межах расійскіх праектаў па падаўжэнні жыцця навукоўцы таксама працуюць над запаволеннем клеткавага старэння з дапамогай геннай тэрапіі і вырошчваннем органаў для трансплантацыі ў генетычна мадыфікаваных міні-свіней.

На такія даследаванні Крэмль выдзяляе значныя сродкі. У бюджэце на 2027—2029 гады на праект «Новыя тэхналогіі захавання здароўя», які прадугледжвае распрацоўку спосабаў падаўжэння здаровага жыцця, закладзена амаль 18 мільярдаў расійскіх рублёў (каля 216 мільёнаў даляраў).

У прыватнасці, на 2027 год запланавана выдзеліць 625,4 мільёна рублёў (каля 7,5 мільёна даляраў) на тэхналогіі прафілактычнай медыцыны і здаровага даўгалецця, 288,5 мільёнаў (каля 3.47 мільёна даляраў) — на распрацоўку тэхналогій біядруку тканак і органаў, а яшчэ 137,4 мільёна (1,65 мільёна даляраў) — на вывучэнне прычын старэння.

• 0
• 0
• 0
• 0
• 0
• 0
• 0
• 0