Zialenski paśla razmovy z Trampam: Vyvodzić našy vojski z našych terytoryj nichto nie budzie
Paśla razmovy pamiž Trampam i Pucin prezident ZŠA Donald Tramp pravioŭ taksama razmovu z prezidentam Ukrainy Uładzimiram Zialenskim. Zialenski paśla jaje sklikaŭ bryfinh i zrabiŭ niekalki zajaŭ.
Zialenski paśla razmovy z Trampam adznačyŭ važnaść dla Ukrainy i ŭsich krain Jeŭropy, kab ZŠA nie dystancyjavalisia ad pieramoŭ z Rasijaj.
«Razam ź jeŭrapiejskimi lidarami havaryli ŭžo pra mahčymyja dalejšyja kroki, u pryvatnaści sustrečy pierahavorščykaŭ i abjektyŭnuju acenku prapanoŭ bakoŭ. Kožnaja prapanova na stale zasłuhoŭvaje sumlennaha pohladu, i mienavita tamu ŭ pierahavornym pracesie pavinny być zadziejničanyja na peŭnym uzroŭni i pradstaŭniki Amieryki, i pradstaŭniki Jeŭropy.
Dla nas usich vielmi važna, kab Złučanyja Štaty nie dystancyjavalisia ad pieramoŭ i dasiahnieńnia miru, tamu što adziny, chto ŭ hetym zacikaŭleny, — heta Pucin. Dziakuj usim za padtrymku takoha padychodu».
Pry hetym Zialenski padkreślivaje važnaść nakładańnia dadatkovych sankcyj na Rasiju, kali taja budzie praciahvać zaciahvać vajnu i vystaŭlać nierealistyčnyja ŭmovy miru.
«Kali Rasija nie pojdzie na spynieńnie zabojstvaŭ, kali nie budzie vyzvalać pałonnych i zakładnikaŭ, kali Pucin budzie vystaŭlać nierealistyčnyja ŭmovy, to heta budzie aznačać, što Rasija i dalej zaciahvaje vajnu i zasłuhoŭvaje, kab Jeŭropa, Amieryka i ŭvieś śviet pavodzili siabie adpaviedna, u pryvatnaści reahavali dadatkovymi sankcyjami», — skazaŭ Zialenski padčas śpiecyjalnaha bryfinhu.
U toj ža čas, pavodle jahonych słoŭ, u pačatku dvuchbakovaj razmovy jon paćvierdziŭ Trampu, što va Ukrainie hatovyja da poŭnaha i biezumoŭnaha spynieńnia ahniu.
«Ciapier vyznačalny čas. Ciapier śviet moža ŭbačyć, ci dastatkova zdolnaści ŭ jaho lidaraŭ, kab zabiaśpiečyć spynieńnie vajny i nastup realnaha, praciahłaha miru», — adznačyŭ Zialenski.
U toj ža čas jon zapeŭniŭ, što ni pra jakija pieradačy rasijanam terytoryj, jakija jany navat nie kantralujuć, havorki być nie moža.
«Vyvodzić našy vojski z našych terytoryj nichto nie budzie. Heta kanstytucyjny abaviazak moj, heta abaviazak našych vajskoŭcaŭ abaraniać suvierenitet i terytaryjalnuju cełasnaść Ukrainy. Tak, ciapier časova akupavanyja jość terytoryi z-za ahresii takoj vialikaj krainy, heta zrazumieła, ale nijakich ultymatumaŭ i nichto zdavać svaju ziamlu, svaje terytoryi, svaich ludziej, svaje damy nie budzie», — padkreśliŭ prezident Ukrainy.
Ciapier čytajuć
Andrej Švied, architektar represij, pryznačany staršynioj Viarchoŭnaha suda21
Kamientary
Bałboča jon adno, a zbroja z ZŠA idzie.
Navošta karkać drennaje ?