Stali viadomyja detali abvinavačańnia ŭkrainskaha deputata Šaŭčenki, jaki prasłaviŭsia padtrymkaj Łukašenki

Kryminalnuju spravu suprać Jaŭhiena Šaŭčenki zaviali 11 listapada. Jamu pahražaje ad 12 da 15 hadoŭ źniavoleńnia z kanfiskacyjaj abo biez kanfiskacyi majomaści za dziaržaŭnuju zdradu.

Spravu Šaŭčenki viaduć śledčyja Dziaržaŭnaha biuro rasśledavańniaŭ — mienavita hetaja ŭstanova maje paŭnamoctvy zajmacca spravami, u jakich fihurujuć dziaržaŭnyja čynoŭniki.

Jakija epizody zhadvajucca ŭ spravie

Jak adznačajecca ŭ rašeńni suda ab uziaćci Šaŭčenki pad vartu, deputat imknuŭsia da «ŭzmacnieńnia ŭłasnaha palityčnaha stanovišča va Ukrainie» i «svajho materyjalnaha ŭzbahačeńnia» i dla hetaha nie paźniej za 1 vieraśnia 2020 hoda pačaŭ dapamahać «zamiežnaj dziaržavie i jaje pradstaŭnikam» vieści padryŭnuju dziejnaść suprać Ukrainy.

Takuju dapamohu, pavodle śledstva, jon ažyćciaŭlaŭ praz svaju infarmacyjnuju dziejnaść, nakiravanuju na «prapahandu i raspalvańnie va ŭkrainskim hramadstvie antyŭradavych i prarasijskich nastrojaŭ». Svaje materyjały, u jakich naviazvałasia niehatyŭnaje staŭleńnie da dziejnaj ukrainskaj ułady i niejtralnaje — da Rasii, jon raźmiaščaŭ u ŚMI, u tym liku biełaruskich, u sacyjalnych sietkach i na svaim kanale ŭ YouTube.

«U žniŭni 2021 hoda, znachodziačysia na terytoryi Biełarusi, sustrakaŭsia z pradstaŭnikami dziełavych, palityčnych struktur i palityčnym kiraŭnictvam Respubliki Biełaruś i sa spasyłkaj na ich raspaŭsiudžvaŭ ideju adsutnaści pahrozy napadu rasijskich vojskaŭ z terytoryi Biełarusi, a taksama pierakonvaŭ biełaruskaha prezidenta, što zrobić usio, kab zabiaśpiečyć mir va Ukrainie», — adznačajecca ŭ dakumiencie, jaki jość u rasparadžeńni «Radyjo Svaboda».

Pry hetym śledčyja padkreślili, što Jaŭhien Šaŭčenka dakładna viedaŭ ab praviadzieńni sumiesnych biełaruska-rasijskich vajskovych vučeńniaŭ na terytoryi Biełarusi z 2021 hoda da 23 lutaha 2022-ha, «pad prykryćciom jakich byli sfarmiravanyja rasijskija bataljonnyja i rotnyja taktyčnyja hrupy i atrady śpiecyjalnaha pryznačeńnia», što 24 lutaha 2022 hoda ŭdzielničali ŭ vajennaj ahresii ź biełaruskaj terytoryi.

«Razumiejučy ciesnyja suviazi i ŭzajemadziejańnie RF i RB […], uśviedamlajučy, što RF vykarystoŭvaje RB i jaje pradstaŭnikoŭ dla infarmacyjnaj baraćby suprać Ukrainy, Šaŭčenka Jaŭhien ździajśniaŭ dziejańni, nakiravanyja na asłableńnie abaranazdolnaści praz vykarystańnie svajho statusu narodnaha deputata Ukrainy šlacham raspaŭsiudžvańnia ŭ infarmacyjnaj prastory materyjałaŭ dla ŭkaranieńnia ŭ hramadskuju dumku hramadzian Ukrainy prarasijskich nastrojaŭ», — havorycca ŭ dakumiencie.

Siarod dokazaŭ — film, pakazany ŭ Biełarusi na telekanale ANT

U materyjałach spravy jak dokaz fihuruje film «Biełaruś vačyma Jaŭhiena Šaŭčenki», jaki 15 studzienia 2022 hoda pakazali pa biełaruskim telekanale ANT. U im, pavodle śledčych, deputat Viarchoŭnaj Rady Ukrainy raspaŭsiudžvaŭ infarmacyju, «nakiravanuju na dyskredytacyju ŭstalavanaha va Ukrainie palityčnaha i ekanamičnaha ładu» i śćviardžeńnie ŭ masavaj śviadomaści dumki ab adsutnaści vajennaj pahrozy dla Ukrainy z boku Biełarusi.

Pry hetym, pavodle śledstva, Jaŭhien Šaŭčenka sprabavaŭ pierakanać ukraincaŭ, što rašeńni ŭkrainskaj ułady «papiaredzić takija pahrozy» nakiravanyja na toje, kab uzmacnić niedavier pamiž ukraincami i biełarusami i vyklikać abureńnie. Deputat taksama nazyvaŭ adpaviednyja dziejańni ŭłady Ukrainy «niasłušnymi, nieabhruntavanymi i ekanamična stratnymi» i vystupaŭ za nieabchodnaść «adnaŭleńnia družby ŭkrainskaha i biełaruskaha braterskich narodaŭ». Imavierna, majucca na ŭvazie ŭviedzienyja Ukrainaj palityčnyja i ekanamičnyja abmiežavańni na palityčnyja kantakty ź Biełaruśsiu paśla vybaraŭ 2020 hoda i prymusovaj pasadki samalota Ryanair.

U kancy kastryčnika i pačatku listapada 2024 hoda na svaim YouTube-kanale (ciapier užo zabłakiravanym) ukrainski deputat raźmiaściŭ jašče niekalki videazapisaŭ. U ich jon praciahvaŭ dyskredytavać ukrainskuju ŭładu, Zachad, jeŭrapiejskija kaštoŭnaści, zajaŭlaŭ, što Zachad umiešvajecca va ŭnutranyja spravy Ukrainy, spryčyniŭ vajnu i sprabuje šlacham upłyvu padarvać stabilnaść u Hruzii i Małdovie. Pavodle Jaŭhiena Šaŭčenki, ukrainskaja ŭłada «padparadkoŭvajecca Zachadu, jaki pravodzić kałanijalnuju palityku ŭ dačynieńni da Ukrainy i inšych krain», parušaje prava na svabodu słova i pieraśleduje palityčnych apanientaŭ. Jon vystupaŭ za viartańnie Ukrainy ŭ zonu «palityčnaha i ekanamičnaha ŭpłyvu Rasii», kab viarnuć svaje terytoryi.

Jak na hetyja abvinavačańni adreahavali Šaŭčenka i jaho advakat

Advakat zajaviŭ, što rasceńvaje ahučanyja ŭ sudzie dokazy dziaržaŭnaj zdrady Jaŭhiena Šaŭčenki jak sprečnyja. Pavodle jaho, u materyjałach spravy adsutničajuć kantakty «pradstaŭnikoŭ varožych krain», a taksama dokazy atrymańnia ekanamičnaj vyhady, na jakuju nibyta raźličvaŭ deputat.

Sam Jaŭhien Šaŭčenka zajaviŭ, što padtrymlivaje terytaryjalnuju cełasnaść Ukrainy.

• 6
• 0
• 0
• 0
• 1
• 0
• 0
• 0