U Italii zatrymali biełarusaŭ, jakich padazrajuć u pierabiŭcy ŭkradzienych aŭto
U haražy maładych ludziej znajšli pazadarožnik za niekalki socień tysiač jeŭra.
Pra heta piša belmir.by sa spasyłkaj na miascovuju palicyju.
U italjanskim horadzie Siesta-San-Džavani, pravincyja Miłan, zatrymali 27-hadovaha biełarusa i 22-hadovuju biełarusku, jakich padazrajuć u zachoŭvańni i lehalizacyi kradzienych aŭtamabilaŭ.
Palicyjanty, pravodziačy na terytoryi horada apieratyŭnuju dziejnaść, źviazanuju z rasśledavańniem niezakonnaha abarotu transpartnych srodkaŭ z boku hramadzian Litvy, niekalki razoŭ nazirali kampaktny dvuchmiesny sicikar z ukrainskimi numarami, jaki raźjazdžaŭ pa vulicach biez mety.
U subotu 13 lipienia kala 19.00 viečara było zaŭvažana, jak dvoje čałaviek spynili mašynu na vulicy Taryna i zajšli ŭ padziemny haraž adnaho z budynkaŭ z valizkami na kolcach. Praz 10 chvilin, na praciahu jakich apieratyŭniki pabačyli tam pazadarožnik koštam zvyš 230 tysiač jeŭra, jany viarnulisia — užo biez valizki.
U paniadziełak 15 lipienia kala 15:00 mužčyna viarnuŭsia da svajho aŭtamabila na vulicy Taryna i pačaŭ adkryvać haraž klučami. Zabłakavany pravaachoŭnikami, jon pasprabavaŭ źbiehčy, złamaŭšy kluč u zamku. Dla taho, kab adčynić dźviery, spatrebiłasia dapamoha ślesara.
U haražy, aproč vialikaj valizki, pakinutaj u subotu, vyjavili pazadarožnik ź niamieckimi numarami i šmat inšych pradmietaŭ, vidavočna pryznačanych dla «admyvańnia» vykradzienych transpartnych srodkaŭ.
Aprača inšaha — 150 numarnych znakaŭ roznych dziaržaŭ, da mnohich ź jakich prykładalisia dakumienty ab numary šasi, 15 paśviedčańniaŭ asoby hramadzian uschodniejeŭrapiejskich krain, klučy ad mašyn, jak pracoŭnyja, tak i zahatoŭki.
A jašče — kampjutarnuju techniku, instrumienty dla sčytvańnia i skidu aŭtamabilnych kodaŭ, śpiecyjalnaje łaziernaje abstalavańnie dla naniasieńnia nadpisaŭ na stal i častotnyja hłušyłki.
U pazadarožnika numar šasi i koler unutranaha azdableńnia nie supadali. Paśla pieravozki transpartnaha srodku va ŭčastak była praviedziena bolš starannaja techničnaja pravierka, jakaja paćvierdziła prykmiety niezakonnaha pachodžańnia mašyny.
Uličvajučy, što biełarusy ŭ Italii nie pražyvajuć i źbiralisia źjechać, jak sami raspaviali, z valizkami, poŭnymi adzieńnia, ich źmiaścili pad vartu ŭ śledčyja izalatary: mužčynu — u miłanskim pryharadzie Monca, žančynu — u Miłanie.
Kamientary
S "bydłom" nielzia inačie...