Siły abarony Izraila, ich nazyvajuć jašče pa habrejskaj abrevijatury CACHAŁ, adny ź pieradavych u śviecie. Pryčym kraina maje jak mocnuju suchaputnuju armiju, tak i ŭnikalnuju supraćpavietranuju abaronu. Pry hetym kraina stała suśvietnym lidaram u śfiery bieśpiłotnikaŭ.
CACHAŁ składajucca z troch filijałaŭ: suchaputnyja, pavietranyja i marskija siły. Uzbrojenyja siły Izraila doŭhi čas padtrymlivajucca Złučanymi Štatami. Pry hetym štohadovaje finansavańnie, sankcyjanavanaje Kanhresam, adpaviedna z apošnimi danymi, składała 3,3 miljarda dołaraŭ ZŠA, a taksama jašče 500 miljonaŭ dołaraŭ ZŠA na technałohii supraćrakietnaj abarony.
Zhodna z danymi Stakholmskaha mižnarodnaha instytuta pa vyvučeńni prablem miru (SIPRI), u 2022 hodzie na svaje ŭzbrojenyja siły Izrail vydatkavaŭ 4,5% VUP, što źjaŭlajecca 10-m pakazčykam u śviecie.
U krainie vajskovaja słužba abaviazkovaja dla hramadzian, starejšych za 18 hadoŭ. Paśla zaličeńnia na słužbu mužčyny pavinny słužyć na praciahu 32 miesiacaŭ, a žančyny — na praciahu 24 miesiacaŭ.
Izrail — adna z najbolš uzbrojenych krain na Blizkim Uschodzie.
Pa danych Mižnarodnaha instytuta stratehičnych daśledavańniaŭ (IIS) na pačatak 2023 hoda ŭ Izraili naličvałasia 169 z pałovaj tysiač aktyŭnych vajskoŭcaŭ u armii, na fłocie i ŭ vajenizavanych farmiravańniach. Jašče 465 tysiač składajuć jaho reziervovyja siły, a 8 tysiač źjaŭlajucca častkaj jaho vajenizavanych farmiravańniaŭ. Z pačatku kanfliktu Izrail pryzvaŭ kala 360 tysiač reziervistaŭ.
Suchaputnyja siły Izraila
Na ŭzbrajeńni CACHAŁ jość madyfikavanaja amierykanskaja zbroja: karabiny M4A1, vintoŭki M16, snajpierskija vintoŭki M24 SWS i SR-25.
Siarod ułasnych raspracovak roznyja vidy strałkovaj zbroi, takija, jak aŭtamat Galil (na asnovie aŭtamata Kałašnikava), pistalet-kulamiot Uzi.
Ale najlepšaj raspracoŭkaj ličycca šturmavaja vintoŭka Tavor. Jana charaktaryzujecca vysokaj manieŭranaściu i zručnaściu pry stralbie naŭskidku. Tavor vykanana pa schiemie buł-pap (mahazin i miechanizmy znachodziacca za spuskavym klamaram). Heta dazvoliła skaracić ahulnuju daŭžyniu zbroi pry zachavańni daŭžyni stvała, što palepšyła mabilnaść i dakładnaść stralby.
U vintoŭki sučasnaja i dakładnaja sistema prycelvańnia, jakaja prymacoŭvajecca niepasredna da stvała. Kab nie stamlać sałdata pastajannym uklučeńniem i vyklučeńniem, pryceł uklučajecca aŭtamatyčna pry pieraciahvańni zatvoru i vyklučajecca, kali zbroja razradžana. Vyłučajecca madyfikacyja vintoŭki — MTAR, nadzvyčaj kampaktnaja i pryznačanaja dla śpiecnaza.
Izrail raspracavaŭ ułasnuju sieryju bajavych tankaŭ «Mierkava». Hety tank źjaŭlajecca asnoŭnym bajavym tankam, jaki vykarystoŭvajecca CACHAŁ z 1980-ch hadoŭ. Siońnia asnoŭnaja madel — heta Mark 4. Ab novaj raspracoŭcy tanka z vykarystańniem štučnaha intelektu my pisali tut.
Navučańnie sałdat mietadam vajny ŭ haradskich umovach prachodzić u navučalnym centry Urban Warfare, viadomym jak «mini-Haza».
U Izraili jość taksama park bieśpiłotnikaŭ, jakija źjaŭlajucca samymi pradavanymi na suśvietnym rynku, pakolki stvaralisia jany dla vyrašeńnia takoj najvažniejšaj zadačy, jak dasiahnieńnie maksimalnaj situacyjnaj daśviedčanaści niepasredna na poli boju i ŭ najbližejšaj taktyčnaj hłybini.
Vajskova-pavietranyja siły
Na ŭzbrajeńni Vajskova-pavietranych sił znachodziacca ŭdaskanalenyja amierykanskija źniščalniki F-15 Eagle, F-16 Fighting Falcon i samaloty F-35 Lightning II, udarnyja viertaloty AH-1 Kobra i AH-64D Apache, batarei supraćrakietnaj abarony Patriot.
Ekśpierty źviartajuć uvahu na dvuchmiesny varyjant F-16I Sufa («Navalnica»), raspracavany śpiecyjalna dla zadavalnieńnia patrabavańniaŭ VPS Izraila. F-16I abstalavany raspracavanymi ŭ Izraili kanformnymi paliŭnymi bakami, jakija za košt padvyšeńnia zapasu paliva pavialičvajuć dalnaść palotu na 50%. Zamiena bakaŭ padvoiła mahčymaści abstalavańnia źniščalnika roznymi kłasami avijacyjnych srodkaŭ paražeńnia.
U samalocie vykarystoŭvajecca našlemnaja sistema naviadzieńnia — dysplej Elbit Dash IV. Jon daje mahčymaść piłotu vyznačać znachodžańnie celi pad vialikim vuhłom da kursu źniščalnika i pakazvaje infarmacyju ab stanoviščy na 360 hradusaŭ.
Najbolš značnaja madyfikacyja, uniesienaja ŭ F-16I Sufa, tyčycca kompleksu srodkaŭ radyjoelektronnaj baraćby, jaki ŭklučaje sistemy papiaredžańnia ab radyjołakacyjnym apramianieńni, padaŭleńni pieraškod i samaabarony Elisra SPS 3000.
Siarod ułasnych raspracovak Izraila taksama šmatmetavy źniščalnik-bambavik Nesher i šmatmetavy źniščalnik Kfir (raspracavany na asnovie francuzskaha samalota Mirage).
Vajenna-marskija siły
Vajenna-marskija siły ŭklučajuć 5 padvodnych łodak i 49 patrulnych i prybiarežnych karabloŭ.
Siarod ich vyłučajucca karviety typu «Saar-5». Usiaho było pabudavana try karviety hetaha kłasa, jakija źjaŭlajucca samymi vialikimi bajavymi karablami ŭ izrailskim fłocie. Jany vałodajuć vysokaj chutkaściu, manieŭranaściu i ahniavoj mocaj, a taksama ŭžyvajuć technałohii stełs dla źnižeńnia radyjołakacyjnaj, infračyrvonaj i akustyčnaj prykmietnaści.
Karviety «Saar-5» abstalavanyja roznymi vidami ŭzbrajeńnia, uklučajučy supraćkarabielnyja rakiety Harpoon dalnaściu da 130 km, zienitnyja rakiety Barak dalnaściu da 10 km, tarpiednyja aparaty Mk 32, artyleryjskuju ŭstanoŭku Phalanx, a taksama elektronnyja sistemy vyjaŭleńnia i naviadzieńnia. Karviety taksama majuć viertalotnuju placoŭku i anhar dla baziravańnia adnaho viertalota.
Unikalnaja asablivaść «Saar-5» zaklučajecca ŭ tym, što heta samy maleńki vajskovy karabiel u śviecie, abstalavany 4-panelnym radaram MF-STAR, jaki moža šukać, adsočvać mety i nakiroŭvać da 16 zienitnych rakiet Barak adnačasova, kab pierachapić ich. Heta daje karvietu mahčymaść abaraniacca ad luboj pavietranaj pahrozy.
«Saar-5» źjaŭlajecca samym dobra ŭzbrojenym karablom u śviecie, kali ŭličyć suadnosiny zbroi i vodaźmiaščeńnie sudna. Pry vodaźmiaščeńni ŭ 1100 ton, jon vałodaje ahniavoj mocaj 4000-tonnaha frehata.
Akramia hetaha Izrail — pieršaja kraina, jakaja raspracavała i razharnuła ŭzbrojenuju bieśpiłotnuju łodku dla nazirańnia i abarony — Protector Unmanned Surface. Hetyja łodki razhornutyja vakoł partoŭ dla nazirańnia, vyjaŭleńnia i paražeńnia varožych małych sudoŭ. Adzin z varyjantaŭ moža być abstalavany rakietami Spike i vadzianoj harmataj dla nieśmiarotnych bajoŭ i pažaratušeńnia.
Sistema supraćpavietranaj abarony «Žalezny kupał»
U 2011 hodzie ŭ Izraili pačała dziejničać sistema supraćrakietnaj abarony «Žalezny kupał» — adzinaja ŭ śviecie, razhornutaja na nacyjanalnym uzroŭni.
Sistema stvorana z dapamohaj ZŠA, jakija adkazvajuć za pastaŭku detalaŭ dla jaje. «Žalezny kupał» składajecca z troch asnoŭnych kampanientaŭ: radara dla vyjaŭleńnia i adsočvańnia celaŭ, puskavych ustanovak dla zapusku pierachaplalnych rakiet i centra kiravańnia dla kaardynacyi i analizu danych.
Raniej adznačałasia, što sistema paśpiachova źniščaje bolš za 90% celaŭ, ale 7 kastryčnika 2023 hoda SPA Izraila nie zmahła spravicca ŭ nieabchodnym abjomie sa škvałam pa mienšaj miery 3000 rakiet, vypuščanych ź siektara Haza.
Akramia «Žaleznaha kupała» Izrail u žniŭni 2020 hoda na miažy ź siektaram Haza ŭpieršyniu vykarystaŭ łaziernuju sistemu SPA «Lohki klinok». Jana pryznačana dla pierachopu dronaŭ, a taksama zapalnych pavietranych šaroŭ.
Niekalki dzion tamu źjaviłasia infarmacyja ab prymianieńni Izrailem jašče adnoj sistemy SPA, zasnavanaj na vykarystańni łaziera, — «Žalezny pramień». Sistema zaklikana abaranić ad rakiet zvyšmałoha radyusu dziejańnia na dalokaści da 7 kiłamietraŭ. Akramia taho, sistema zmoža źniščać i małyja bieśpiłotniki.
Jadziernaja zbroja
Izrail taksama doŭhi čas padtrymlivaŭ nieabvieščanuju prahramu stvareńnia jadziernaj zbroi. Izrailskaja vajennaja daktryna tłumačyć vykarystańnie jadziernaj zbroi ŭ jakaści «kančatkovaha strymlivajučaha faktara» ŭ situacyjach, kali isnavańnie dziaržavy Izrail usprymajecca pad pahrozaj z boku zamiežnych dziaržaŭ.
Handal zbrojaj
Handal zbrojaj źjaŭlajecca adnym ź istotnych składnikaŭ ekspartu krainy. Kali raniej Izrail bolš impartavaŭ zbroju, dyk u apošniaje dziesiacihodździe ekspart pastupova pieravysiŭ impart. Pa danych SIPRI, u pieryjad z 2018 da 2022 hoda sama mieniej 35 krain impartavali zbroju ź Izraila na ahulnuju sumu 3,2 miljardaŭ dołaraŭ. Ź ich kala treci prychodziłasia na Indyju. Druhim pa vieličyni kupcom byŭ Azierbajdžan, zatym išli Filipiny, ZŠA i Vjetnam.
Čytajcie jašče:
Izrail, padobna, upieršyniu ŭžyŭ u bajavych umovach łaziernuju sistemu SPA «Žalezny pramień»
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary