U Kobrynie aficyjny kiraŭnik adkamientavaŭ nie tolki ahrarnyja pytańni, ale i zamiežnuju palityku. Piša ŭ svaim błohu na NN Alaksandr Kłaskoŭski.
Pierad sustrečaj ź Miadźviedzievym Łukašenka mikšuje prablemy ŭ dačynieńniach z Rasijaj. 19 vieraśnia na «Dažynkach» u Kobrynie jon skazaŭ, što, badaj, adzinaja takaja prablema — handlovyja barjery.
Naturalna, pytańnie traktujecca adnaboka: jany musiać źniać barjery pierad našaj pradukcyjaj. Pra simietryčnyja kryŭdy rasijcaŭ zhadki niama. Pratekcyjanizmam ža hrašać abodva baki. Tak što na cudadziejnaje zdymańnie barjeraŭ spadziavacca nie vypadaje.
I potym: chiba tolki ŭ ich zahvazdka? A jak ža pryznańnie kaŭkazskich respublik, kredyty, cana enierhanośbitaŭ dy inšyja balučyja pytańni?
Miadźviedzieŭ źjavicca na finał manieŭraŭ «Zachad-2009». 16 vieraśnia ŭ Vilni Łukašenka supakoiŭ haspadaroŭ: nie bojciesia, nivodzin snarad z palihona da vas nie dalacić!
Ale dniom paźniej litoŭski premjer Kubilus usio ž trochi paśpiekulavaŭ na temie. Bo razharełasia dyskusija vakoł admovy Štataŭ raźmiaščać elemienty supraćrakietnaj abarony ŭ Polščy i Čechii.
Novyja siabry ES i NATO — Polšča, krainy Bałtyi — uspryniali hety krok davoli chvaravita. Miarkujuć, što takim čynam asłablajecca ich biaśpieka. Maŭlaŭ, raźviazvajecie ruki Maskvie: jana adnaznačna rascenić admovu ad rakietnaha ščyta va Uschodniaj Jeŭropie jak słabaść Vašynhtona i stanie dziejničać u rehijonie bolej nachabna.
Pavodle Kubilusa, «toje, što Abama pryniaŭ takoje rašeńnie, kali mieniej jak za 50 kiłamietraŭ ad litoŭskaj stalicy ładziacca rasijskija vajskovyja manieŭry, moža pryvieści da taho, što ludzi buduć mierkavać, što Litva horaj abaronienaja».
Farby, kaniečnie, zhuściŭ. Pa-pieršaje, manieŭry nie čysta rasijskija, a fifci-fifci. Pa-druhoje, ad Abuz-Lasnoŭskaha palihona, dzie razhortvajecca hałoŭny siužet «Zachadu-2009», da Vilni značna dalej.
Zachodnija vajskovyja ekśpierty z nahody hetych manieŭraŭ tryvohi nie bjuć. Zvyčajnyja hulni vialikich dziadźkoŭ u vajnu. Chutčej pijar, aŭtatreninh (ja mahu, mahu!), čym realny pakaz muskułaŭ (stan jakich pakidaje žadać lepšaha).
Aŭtar hetych radkoŭ za savieckim časam taksama biehaŭ z «kałašom» pa tym palihonie pad Baranavičami. Nie viedaju, jak zaraz, a tady było bahata insceniroŭki. Navat mišeni valilisia padazrona družna. Karaciej, «Krasnaja armija vsiech silniej».
Kaniečnie, vajskovy aljans z Rasijaj sam pa sabie admoŭny čyńnik u sensie jeŭrapiejskich pierśpiektyŭ Biełarusi. Ale zaraz, paśla rašeńnia Abamy, va ŭsiakim razie, źmianšajecca ryzyka, što nas uciahnuć u niejki rymiejk chałodnaj vajny na hlebie procistajańnia miž Maskvoj i ZŠA. Tak što admova ad tych supraćrakiet — pa vialikim rachunku na karyść Biełarusi.
Darečy, na «Dažynkach» Łukašenka pachvaliŭ Abamu za «mužny krok». Praŭda, vierbalnaje palapvańnie pa plačy było strymanym: «Ja nie śpiašaŭsia b adrazu sustrakać hety krok vopleskami». Maŭlaŭ, voś kali dalej amierykancy «hłupstvaŭ nie narobiać, heta budzie vielmi pazityŭny krok».
Karaciej, haspadaru Biełaha doma jašče jość nad čym pracavać, kab zasłužyć kamplimienty ź Minska.
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii3939
Kamientary