Rasijski desant vysadzicca ŭ Biełarusi ŭ vieraśni. Piša ŭ svaim błohu na NN Alaksandr Kłaskoŭski.
Načalnik biełaruskaha hienštaba hienierał Huruloŭ 14 žniŭnia ŭ Maskvie ŭdakładniŭ detali vieraśnioŭskich manieŭraŭ «Zachad-2009». Vyhladaje na toje, što jany projduć mienavita pa tym scenary, jaki byŭ zaćvierdžany jašče viasnoj.
Infarmacyjnaja bomba pra dźvie rasijskija armii, što nibyta ŭvojduć u Biełaruś u poŭnym składzie, akazałasia pustoj pužałkaj. Bombu, nahadaju, padkinuŭ u červieni maskoŭski kaleha Hurulova — hienierał Makaraŭ. Surjoznyja ekśpierty adrazu nazvali heta absurdam.
Ciapier našy vajskoŭcy aficyjna infarmujuć: u manieŭrach buduć udzielničać kala 12 z pałovaj tysiač ludziej u pahonach, ź ich rasijcaŭ — sama bolej šeść tysiač. Pavodle BIEŁTA, «rasijski bok na manieŭrach pradstaviać orhany vajskovaha kiravańnia i šerah złučeńniaŭ dy vajskovych častak 20-j armii, apieratyŭnyja hrupy hałoŭnaha kamandavańnia VPS, kamandavańniaŭ vajskova-transpartnaj avijacyi i pavietrana-desantnych vojskaŭ, padraździaleńni 98-j pavietrana-desantnaj dyvizii».
Jak patłumačyŭ mnie minski vajskovy ahladalnik Alaksandr Alesin, z susiedniaj krainy pryjedzie bahata hienierałaŭ dy starejšych aficeraŭ, i hulnia na mapach akažacca sapraŭdy hrandyjoznaj. Strełki malavać — sprava nie nadta zatratnaja.
A voś u reale ŭsio budzie našmat bolej ścipła. Naprykład, vysadziać 600 desantnikaŭ i 9 bajavych mašyn na Abuz-Lasnoŭskim palihonie pad Baranavičami, a ŭmoŭna buduć ličyć, što heta cełaja dyvizija z sotniami adzinak techniki.
Tym časam maskoŭskaja «Niezavisimaja hazieta» nibyta miž inšym padkidaje: «U zadumie rasijska-biełaruskich manieŭraŭ adlustravany i bajavy scenar, jaki mieŭ miesca padčas adbićcia Rasijaj hruzinskaj ahresii pad Cchinvali u žniŭni 2008 hoda». Alesin miarkuje, što heta pijaraŭskija zakidony.
Nasamreč, kaža ekśpiert, scenar «Zachadu-2009» adlustroŭvaje hipatetyčny kanflikt ź siłami NATO. Nie vypadkova ŭ kantekście manieŭraŭ rasijcy zadziejničajuć i fłot.
Zrešty, naŭrad ci nataŭcy nadta napałochajucca. Na manieŭry peŭna ž zaprosiać zamiežnych naziralnikaŭ.
Uvohule Zachad zaraz pabłažliva kamientuje sproby Maskvy demanstravać roznymi tam dalokimi rejdami submaryn, palotami stratehičnaj avijacyi dy manieŭrami, što — voś, hladzicie, jość jašče porach u parachaŭnicach!
Zachodniki bačać, što nasamreč niama taho, što rańš było. Rasija ŭsio bolej adstaje ŭ vajskovym sensie ad ZŠA, Paŭnočnaatłantyčnaha aljansu. I niejak trymaje marku tolki za košt jadziernaha patecyjału, jaki miž tym katastrafična stareje.
Karaciej, vieraśnioŭskija manieŭry — nie stolki hulnia muskułami pierad Zachadam, kolki pył u vočy samim sabie: «Krasnaja armija vsiech silniej». Mahčyma, na «Zachad-2009» pryjedzie navat rasijski prezident.
Našy ekśpierty, praŭda, nie vyklučajuć, što niejkaje čarhovaje abvastreńnie stasunkaŭ miž Minskam i Maskvoj moža skamiečyć maštab manieŭraŭ. Ale schilajucca da dumki, što tut
Łukašenka zacikaŭleny nie ŭdaryć tvaram u brud. Bo faktyčna prapanujecca firmavy tavar — hatoŭnaść biełarusaŭ lehčy pad mifičnyja tanki NATO. Mienavita hetym arhumientam zaŭždy matyvujecca zaklik da Kramla: nie škadavać prefierencyj dla apošniaha sajuźnika.
Ciapier čytajuć
Pasadzili padpałkoŭnika i byłoha vykładčyka Vajskovaj akademii. Jon padtrymaŭ narod u 2020-m3
Kamientary