«Moža chopić vatu kačać?» «Biełorusskij siłovik» atakuje «partyju miru» ŭ kiraŭnictvie Rasii

«Na žal, prosta na vačach uzmacniajecca raskoł u rasijskim pradziaržaŭnym łahiery, — napisaŭ siońnia kanał «Biełorusskij siłovik» u paście, adrasavanym rasijskaj aŭdytoryi, i patłumačyŭ. — Niemahčyma i narmalna vajavać, i adnačasova vieści pierahavory».

Kanał, stvorany Arturam Hajko, adznačaje narastańnie raskołu ŭ rasijskim hramadstvie: «Heta možna nazirać navat u kamientaryjach va ŭsich kanałach, dzie aśviatlajecca tema bajavych dziejańniaŭ. Ty litaralna zachodziš tudy, i ŭ kožnym paście — uzajemnyja abvinavačvańni».

«Biełorusskij siłovik» atakuje tych ludziej u kiraŭnictvie Rasii, jakija vystupajuć za pieramovy, i kankretna namiakaje na hiendyrektara Rasijskaha fondu pramych inviestycyj Kiryła Dźmitryjeva:

«Moža chopić vatu kačać? Padbirać słovy, kab nie pakryŭdzić «pavažanych partnioraŭ», uhavorvać, šukać mahčymaści źlatać u Majami, kab pakatacca na bordzie. Iran, jaki maje ŭ razy mienš mahčymaściaŭ, prademanstravaŭ, što praciŭnik razumieje tolki siłu i ličycca budzie tolki ź joj.

U niejki momant pryjdziecca zrabić vybar: chto tabie daražejšy — svaje ci čužyja?»

Kryk dušy Artura Hajko znajšoŭ vodhuk u asiarodku rasijskich vajenkaraŭ. Jaho pierapościli šmatlikija inšyja kanały.

«Praciŭnik razumieje tolki siłu i ličycca budzie tolki ź joj», — hetyja słovy akcentuje kanał «Dva majory».

Vajna stała załatoj žyłaj nie tolki dla rasijskaha VPK, ale i dla prapahandysckaha aparata. Jaje spynieńnie, admova Maskvy ad kursu na raspalvańnie i supraćstajańnie, budzie aznačać i źmianšeńnie finansavańnia šavinistyčnaha kantentu, u tym liku i vajenkaraŭ, jakija da 2022 hoda nie adyhryvali vialikaj roli ŭ rasijskaj infaprastory. Dla mnohich ź ich praciah vajny — heta jašče i zachavańnie ŭłasnaj značnaści.

U toj ža čas u rasijskim hramadstvie narastaje stoma ad biaskoncaha kanfliktu, jaki Alaksandr Łukašenka ŭ 2025 hodzie nazvaŭ «ciahamocinaj, jakuju treba skančać». Rasija straciła ad 300 da 350 tysiač čałaviek zabitymi. Jašče prykładna stolki ž zastalisia invalidami. Bolšaść zachoplenych Rasijaj nasielenych punktaŭ ściortyja daščentu pry zachopie. Patok dobraachvotnikaŭ u rasijskuju armiju pierasoch, rasijanie vytracili zapasy vajskovaj techniki. 

Tym nie mienš pieramovy ab spynieńni vajny iduć tuha, bo Rasija choča dadatkovych terytaryjalnych sastupak. Rost cenaŭ na enierhanośbity ŭ vyniku ataki ZŠA i Izraila na Iran daŭ Maskvie nadzieju na rost dachodaŭ. Z hetym moža być źviazanaje i ažyŭleńnie «partyi vajny», što była ŭžo i zaklakšy.

Rytoryka «Biełorusskoho siłovika» piarečyć publičnaj rytorycy samoha Alaksandra Łukašenki, jaki na słovach vystupaje za mir tut i zaraz.

Raniej «Biełorusskij siłovik» mačuliŭ ułady Rasii i za spynieńnie ŭdaraŭ pa ŭkrainskaj enierhietycy. «Tryvožnyja naviny pastupajuć», — tak pačynałasia pieršaje paviedamleńnie kanała pra maratoryj na ŭdary.

Pavialičyć

Telehram-kanał «Biełorusskij siłovik» uźnik u sakaviku 2022 hoda, kali rasijanie šturmavali Kijeŭ. Dziakujučy kałabaracyjam z takimi ž rasijskimi Z-kanałami i raspalvańniu vajennaj isteryi jon uźlacieŭ da 437 tysiač padpisčykaŭ — biełarusaŭ siarod ich mała, jon pracuje na ŭnutryrasijskuju aŭdytoryju. «Naša Niva» pajšła pa śladach, pakinutych jaho stvaralnikam u internecie, i vyśvietliła raniej, što za kanałam staić Artur Hajko, aficer HUBAZiKa Ministerstva ŭnutranych spraŭ Biełarusi.

Ciažka skazać, nakolki vialikaja častka biełaruskich siłavikoŭ całkam identyfikujuć siabie z Rasijaj i kirujucca takimi čałaviekanienavisckimi idejami, jak aŭtary «Biełorusskoho siłovika». Adnak vidavočna, što hetaja častka maje kartbłanš dla dziejańnia i prapahandy svajoj ruskamirnaj, faktyčna rusafašysckaj ideałohii.

• 0
• 0
• 3
• 1
• 1
• 0
• 1
• 0