Palityčnamu rasijskamu błohieru, jaki chvalić Łukašenku, zabaranili ŭjezd u Biełaruś
Nazir Jaŭłojeŭ zapeŭnivaje, što padtrymlivaŭ Łukašenku navat tady, kali «kožny sabaka jaho nienavidzieŭ i hatovy byŭ razarvać». A ciapier ščyra ździŭleny, što jamu zabaranili ŭjezd u Biełaruś prosta za toje, što jon adstojvaŭ svaje pravy.
Na tyktok-kanał Nazira Jaŭłojeva, dzie jon vykazvaje svaje dumki adnosna roznych palityčnych padziej, padpisana kala 412 tysiač čałaviek.
Sam błohier — asoba niešarahovaja. Jaŭłojeŭ pa nacyjanalnaści inhuš, raniej jon pracavaŭ pres-sakratarom ministra ŭnutranych spraŭ Inhušecii — respubliki ŭ składzie Rasii.
Invalidnaść pieršaj hrupy jon atrymaŭ u 2008‑m — pad dno jaho mašyny padkłali bombu. Paranienaha mužčynu advieźli ŭ balnicu, jamu daviałosia amputavać levuju nahu.
Nazir Jaŭłojeŭ maje rasijskaje hramadzianstva, ale, padobna, što žyvie ŭ Hiermanii.
Letaś tyktokier užo traplaŭ u skandał na polska-biełaruskaj miažy. Tady prablema ŭźnikła praz toje, što Nazir, jaki maje invalidnaść, chacieŭ prajechać biez čarhi. Dla hetaha treba było prademanstravać pamiežnikam paśviedčańnie, u jakim prapisany pracent invalidnaści. U rasijskim paśviedčańni takoha nie paznačajuć, a niamieckaje treba było pierakłaści na biełaruskuju ci ruskuju movy. Aburany Jaŭłojeŭ navat zapisvaŭ videazvarot da Łukašenki.
Niekalki dzion tamu tyktokier, jaki byŭ ščyra ŭpeŭnieny, što jaho pryhody na miažy skončylisia, znoŭ chacieŭ zajechać u Biełaruś z terytoryi Polščy.
— Biełaruskija pamiežniki moj pašpart tudy-siudy… «Pastaŭcie, — kažuć, — kali łaska, siudy mašynu, i prajedziem sa mnoj». Ja prajšoŭ. Zrabili daktyłaskapiju, ja padpisaŭ, što treba. Kažu: «Nu što zdaryłasia?».
Błohieru paviedamili, što jamu zabaronieny ŭjezd u Biełaruś da 17 vieraśnia 2026 hoda. Takoje rašeńnie pryniało biełaruskaje MUS — mienavita tudy pamiežniki paraili Naziru źviartacca pa ŭsie tłumačeńni.
Tyktokier šalona pakryŭdžany i znoŭ źviartajecca da Łukašenki:
— Voś tak voś, Alaksandr Ryhoravič! A ja čałaviek, jaki viadzie infarmacyjnuju vajnu, padtrymlivaje Biełaruś, padtrymlivaje Alaksandra Ryhoraviča.
Liču jaho sapraŭdnym mužykom, sapraŭdnym patryjotam svajho naroda. U 2020 hodzie asabista ja padtrymlivaŭ prezidenta. Kali kožny sabaka jaho nienavidzieŭ i hatovy byŭ razarvać. Kali Alaksandr Ryhoravič razam sa svaim synam sa zbrojaj adstajali svoj narod ad zachodniaj interviencyi.
Nazir zapeŭnivaje: kali b va Ukrainie ŭ svoj čas zamiest Janukoviča byŭ Łukašenka, dyk tam byŭ by paradak. A kali b u Biełarusi zamiest Łukašenki byŭ by Janukovič, dyk tut było b jak «va Ukrainie».
Błohier spadziajecca, što jaho videa dojdzie da Łukašenki ci chacia b da jaho administracyi.
U nastupnym videa Nazir užo sprabuje być mienš rezkim u vykazvańniach — kaža, što jaho staŭleńnie da Biełarusi ŭsio roŭna nie źmienicca.
— Biełarusy dla mianie ŭsio roŭna buduć prykładam taho, jak treba žyć, jak treba budavać svaju krainu. Biełarusy daŭno pakazali hety prykład. Prosta kryŭdna. Za toje, što ja prosta zapatrabavaŭ prytrymlivacca zakonu. Za toje, što ja baraniŭ svaje pravy…
Ciapier błohier dumaje, što rabić dalej i jak trapić u Rasiju.
— Praz Estoniju? Dyk estoncy taksama złyja…
I chvalujecca praz toje, ci prapuściać jaho ŭ Biełaruś paśla 17 vieraśnia — bo zabaronu ž možna i padoŭžyć.
Bresckija pamiežniki nie prapuścili biez čarhi invalida z Rasii — byłoha pres-sakratara palicyi Inhušecii. Jon aburany
Brytanski błohier, jaki zmahaŭsia za biełaruski DNŽ i chadziŭ da Kubrakova, usio ž vyjechaŭ ź Biełarusi. Vypuścili nie ź pieršaj sproby
U Minsku źnik viadomy prarasijski błohier i hość łukašenkaŭskaj prapahandy
Ciapier čytajuć
U biełaruski ŭ Italii zabrali dvuch synoŭ — bo jana nie pryznavała dziaržavu i nie adpuskała dziaciej u škołu i da doktara8
Kamientary
Padobnyja na aptiałudinava rf
Ni treba być vialikim ekśpiertam adkul " vušy"