Pavodziny patryjarcha roŭnyja vajennamu złačynstvu — mierkavańnie
Rasija praciahvaje bambić mirnyja ŭkrainskija harady, ale kiraŭnik Ruskaj pravasłaŭnaj carkvy patryjarch Kirył nie skazaŭ ni słova pra ahresiju svajoj krainy. U svajoj pieršaj publičnaj zajavie paśla pačatku vajny jon zdoleŭ tolki «vykazać hłybokaje spačuvańnie ŭsim, kaho zakranuła hetaja trahiedyja», nibyta razmova idzie pra pavodku ci ziemlatrus.
Hołas patryjarcha maje značeńnie, bo jon — kiraŭnik najvialikšaha ŭ Rasii relihijnaha abjadnańnia, jakoje navat ličyć Ukrainu svajoj kananičnaj terytoryjaj. Maŭčańnie Kiryła nie prosta haniebnaje, jaho možna navat ličyć vajennym złačynstvam. Sprava ŭ tym, što ŭ hetaj vajnie relihijnaja prapahanda i matyvacyja zajmaje asobaje miesca, piša euobserver.com.
Patryjarch i jaho padnačalenyja šmat hadoŭ śćviardžali, nibyta carkva Maskoŭskaha patryjarchata adčuvaje na sabie niejki pieraśled va Ukrainie. Pucin vykarystaŭ raskazy pra heta, kab apraŭdać raźviazvańnie vajny. 21 lutaha ŭ svajoj pramovie pra pryznańnie tak zvanych DNR i ŁNR Pucin raspaviadaŭ, nibyta «Kijeŭ praciahvaje padrychtoŭvać razbureńnie Ukrainskaj pravasłaŭnaj carkvy Maskoŭskaha patryjarchata».
Kirył doŭhi čas vykarystoŭvaŭ padobnuju da pucinskaj rytoryku pra toje, što ruskija i ŭkraincy — heta nibyta adzin narod. Kali Rasija pačała bambić ukrainskija žyłyja damy i špitali, Kirył znoŭ uspomniŭ hetuju ideju.
27 lutaha ŭ svajoj propaviedzi patryjarch uzhadaŭ «ciapierašniuju palityčnuju situacyju ŭ blizkaj nam brackaj Ukrainie» i «złyja siły, što zaŭsiody zmahalisia z adzinstvam Rusi i Ruskaj carkvy». Kirył navat udakładniŭ, što, kali jon prosić Boha «baranić ziamlu Ruskuju ad vorahaŭ źniešnich», pad Ruskaj ziamloj jon maje na ŭvazie «Rasiju, Ukrainu i Biełaruś, i inšyja plamiony i narody». To bok, pakul rasijskija vojski bambiać ukrainskija harady, patryjarch ličyć, što ŭ kanflikcie ŭdzielničajuć nieviadomyja «źniešnija vorahi».
3 sakavika Maskoŭski patryjarchat raspaŭsiudziŭ pa svaich jeparchijach śpiecyjalnuju malitvu ab adnaŭleńni mira. U joj iznoŭ prahučała ideja pra «brackija narody»: uzhadali i sumiesnaje chryščeńnie «ruskich ludziej», i «duch brackaj lubovi». Hety prapahandyscki tekst abaviazali čytać u kožnym chramie Maskoŭskaha patryjarchata — u tym liku u tych, što znachodziacca va Ukrainie.
Usio heta śviedčyć, što patryjarch Kirył padtrymlivaje vajennuju rytoryku Pucina. Praz heta Kirył moža być abvinavačany ŭ aktyŭnym saŭdzielnictvie ŭ vajennych złačynstvach, złačynstvach suprać čałaviečnaści i hienacydzie. Mahčyma, mienavita praz heta ŭsio bolš śviataroŭ Maskoŭskaha patryjarchata va Ukrainie admaŭlajucca ŭzhadvać Kiryła padčas carkoŭnych nabaženstvaŭ.
Prapahanda moža mieć vialiki ŭpłyŭ na chod vajny. Voś čamu ŭ Mižnarodnym pakcie ab hramadzianskich i palityčnych pravach skazana: «Lubaja prapahanda vajny pavinna być zabaronienaja zakonam». I ŭžo isnujuć prykłady kryminalnaj adkaznaści za saŭdzieł ŭ vajennych złačynstvach, złačynstvach suprać čałaviečnaści i hienacydzie.
Ciažka skazać, ci moža takaja adkaznaść čakać patryjarcha Kiryła. Ale navat status duchoŭnaj asoby nie moža harantavać imunitet u vypadku vajennych złačynstvaŭ.
Kamientary