Vieterynar, dziakuje vajskoŭcam, śpić spakojna. Raskazvajem pra novaha ministra sielskaj haspadarki
Bolš za miesiac biełarusy žyli bieź ministra sielskaj haspadarki. A siońnia zamiest Ivana Krupko, jaki prabyŭ na pasadzie amal dva hady, pryznačyli Ihara Bryło. Raskazvajem, što pra jaho viadoma.
Vieterynar z Barysava
Bryło 49 hadoŭ. Jon vypusknik barysaŭskaj siaredniaj škoły № 19, skončyŭ Viciebski vieterynarny instytut.
Pačynaŭ pracu ŭ Barysaŭskaj rajvietstancyi. Potym byŭ hałoŭnym vieturačom miascovaha miasakambinata, hałoŭnym vieturačom Barysava, uznačalvaŭ Smalavickuju brojlernuju ptuškafabryku.
Paralelna skončyŭ Biełaruski dziaržaŭny ekanamičny ŭniviersitet, Akademiju kiravańnia pry prezidencie. Abaraniŭ kandydackuju dysiertacyju, maje zvańnie dacenta.
Pracavaŭ namieśnikam dyrektara na ekśpierymientalnaj bazie ŭ Žodzinie, u «Biełaruśhandli», na Barysaŭskim chlebakambinacie. Paśla dva hady pravioŭ na pasadzie namieśnika staršyni Barysaŭskaha rajvykankama.
U 2013-m staŭ namieśnikam ministra sielskaj haspadarki i charčavańnia, u krasaviku 2021-ha — pieršym namieśnikam ministra.
Fota ŭ majcy Russia i pres-sakratarka, jakaja maciukałasia
Mižvoli Ihar Bryło ŭ 2019 hodzie trapiŭ u skandał. Jon vykłaŭ u Instahramie zdymak, na jakim jon paziruje ŭ majcy «Russia» na barysaŭskim pradpryjemstvie «Zdravuška».
ŚMI źviarnuli ŭvahu na hety vypadak, paśla čaho čynoŭnik zakryŭ svoj akaŭnt. A pres-sakratarka Ministerstva sielskaj haspadarki Zinaida Bieraščenka abmaciukała žurnalista «Našaj Nivy», jaki źviarnuŭsia pa kamientaryj.
Paśla Bieraščenka vybačałasia «za emacyjnaść», ale jaje zvolnili.
Revalucyi nie budzie
U svaich publičnych vystupach Bryło zvyčajna chvaliŭsia dasiahnieńniami biełaruskaj siełskaj haspadarki, adznačaŭ jaje stabilnaść, pryvodziŭ ličby ekspartu. Dy i ŭ pieršym ža kamientaryi na pasadzie ministra jon adznačyŭ:
«Taja tendencyja raźvićcia APK, jakaja idzie ŭ apošnija hady… My, napeŭna, i budziem jaje prytrymlivacca. Niejkich asablivych, revalucyjnych źmienaŭ my rabić nie budziem».
«My śpim spakojna»
Jak i bolšaść čynoŭnikaŭ, paśla pratestaŭ 2020 hoda Bryło nie moh nie vykazacca pra palityčnuju situacyju ŭ krainie.
Mnohija z tych, chto ŭ minułym hodzie pierajšoŭ na inšy bok darohi, užo ŭsio pieraasensavali, uśviadomili pamyłki i viarnulisia, kazaŭ jon.
«Heta adbyłosia tamu, što jany zrazumieli, što było b u hetym chaosie, jaki chacieli ŭ nas zrabić. A heta byŭ by chaos, — zapeŭnivaŭ Bryło. — Tak, i mnie chočacca niešta palepšyć, i ja baču prablemnyja pytańni. Ale ja b chacieŭ ich abmiarkoŭvać z patryjotami svajoj krainy ŭnutry Biełarusi. A mierkavańnie kahości z boku asabista dla mianie — ni pra što».
Taksama jon adznačaŭ, što ahraryi amal nie pratestavali paśla vybaraŭ 2020 hoda. I patłumačyŭ čamu — mahčyma tamu, što ŭ sielskaj haspadarcy nie samyja vysokija zarpłaty, dy i praca nie samaja pryvabnaja, kali paraŭnoŭvać z pracaj u čystych staličnych ofisach.
«Hetyja ludzi, moža być, nie mohuć sabie dazvolić schadzić kudyści ŭ restaran, u niejki spa-centr abo fitnes-centr. Ale hetyja ludzi nasamreč zastalisia viernyja Prezidentu […]. Napeŭna, ludzi bačyli staŭleńnie prezidenta da sielskaj haspadarki, jaho trapiatkoje staŭleńnie, jak jon umieŭ pastavić usim nam zadačy», — kazaŭ Bryło.
Taksama jon dziakavaŭ vajskoŭcam:
«Ja vykažu asabistaje mierkavańnie z nahody vajennych, ludziej, jakija nosiać na plačach pahony. Treba skazać im vialiki dziakuj za toje, što pry ŭsim žadańni kahości razhajdać krainu, jany hetaha nie dazvolili i nie zrabili. Na samoj spravie, adčuvajecca naša siła ŭ dziaržavie. Ja zaŭsiody pavažliva staviŭsia da hetych ludziej, ale ciapier ź niejkim trymcieńniem.
Heta adno. Druhoje, što tyčycca nas. Za biaśpieku, jak ja kažu, jość u nas u krainie kamu adkazvać, i my śpim spakojna».
Čytajcie jašče:
«Nastaŭnik nie pavinien źviartać uvahu na zarpłatu, bo heta paklikańnie». Piać faktaŭ pra novaha ministra adukacyi
Ciapier čytajuć
Pamior były palitviazień Valeryj Cimašenka. Jamu było 42 hady1
Kamientary