Pryznańnie paleścinskaj dziaržavy: ZŠA zastajucca adzinaj siłaj, čyj hołas budzie mieć vyrašalnaje značeńnie

Havoračy pra humanitarnuju katastrofu ŭ Hazie, jakaja praciahvajecca, i asudziŭšy jak Izrail, tak i CHAMAS, prezident Francyi Emanuel Makron zajaviŭ, što «prava pavinna pieravažać nad siłaj».

Kaardynujučy svaje dziejańni ź Vialikabrytanijaj i pry padtrymcy Saudaŭskaj Aravii, jon sprabuje zachavać ideju ab dźviuch dziaržavach, jakaja siońnia bałansuje na miažy źniknieńnia.

Na dumku jeŭrapiejskich lidaraŭ, hetaja daŭno isnujučaja mižnarodnaja formuła miru — adziny šlach da spraviadlivaj, ahulnaj budučyni dla dvuch narodaŭ.

Alternatyvaj, jak zajaviŭ hienieralny sakratar AAN Antoniu Huteryš na kanfierencyi ŭ Ńju-Jorku, było «rašeńnie na karyść adnoj dziaržavy», što aznačaje izrailskaje panavańnie i «padparadkavańnie» paleścincaŭ.

Jon padkreśliŭ, što ništo nie moža słužyć apraŭdańniem dla kalektyŭnaha pakarańnia, hoładu abo jakoj-niebudź formy etničnych čystak.

Izrail u lutaści i pahražaje adkazać.

Jon razhladaje kanfierencyju pa paleścinskim pytańni ŭ AAN — razam z pryznańniem paleścinskaj dziaržavy Vialikabrytanijaj, Francyjaj, Kanadaj, Aŭstralijaj i inšymi krainami — jak uznaharodu dla CHAMAS paśla jaho napadu na Izrail i zachopu zakładnikaŭ 7 kastryčnika 2023 hoda.

Niekatoryja izrailskija ministry chočuć, kab adkazam stała abviaščeńnie ab anieksii častki akupavanaha Zachodniaha bieraha, što nazaŭsiody vyklučyć mahčymaść stvareńnia žyćciazdolnaj paleścinskaj dziaržavy na hetaj terytoryi.

Kirujučaja kaalicyja premjer-ministra Izraila Bińjamina Nietańjachu, u jakuju ŭvachodziać vielmi pravyja dziejačy, što adkryta zajaŭlajuć pra svaju palityku vyhnańnia paleścincaŭ i budaŭnictva na ich terytoryjach jaŭrejskich pasieliščaŭ, maje namier źniščyć ideju stvareńnia dźviuch dziaržaŭ.

Administracyja Donalda Trampa praciahvaje padtrymlivać svajho izrailskaha sajuźnika, adchilajučy dziejańni jeŭrapiejcaŭ i karajučy kiraŭnika Paleścinskaj aŭtanomii Machmuda Abasa, jakomu zabaranili prysutničać na kanfierencyi ŭ Ńju-Jorku, i jon vystupiŭ pa videasuviazi.

Kanfierencyja ŭ AAN i reakcyja administracyi Trampa aznačajuć samy surjozny raskoł pamiž Vašynhtonam i jaho jeŭrapiejskimi sajuźnikami pa pytańni ab tym, jak vyrašyć kanflikt na Blizkim Uschodzie.

Ale jeŭrapiejcy ličać, što ŭ ich nie zastałosia vybaru, uličvajučy situacyju ŭ siektary Haza.

Izrail pierakidvaje ŭ Hazu ŭžo treciuju dyviziju, pry hetym kožny dzień hinuć dziasiatki paleścincaŭ. CHAMAS praciahvaje ŭtrymlivać amal 50 zakładnikaŭ, mnohija ź jakich miortvyja. U toj ža čas na Zachodnim bierazie praciahvajecca pašyreńnie izrailskich pasieliščaŭ i hvałt z boku pasialencaŭ.

Usio heta adbyvajecca praz amal dva hady paśla biesprecedentnaj ataki 7 kastryčnika, i pakul mała prykmiet taho, što dalejšy vajenny cisk prymusić CHAMAS zdacca, jak taho choča Izrail.

Stratehija Makrona — sproba pakazać, što dypłamatyja prapanuje žyćciazdolnuju alternatyvu.

Spačatku nieabchodna damahčysia realnaha spynieńnia vajny ŭ Hazie, a zatym — doŭhaterminovaha rašeńnia ŭ vyhladzie dźviuch dziaržaŭ: izrailskaj i paleścinskaj.

Jeŭrapiejskija krainy śćviardžajuć, što stratehija Izraila paciarpieła niaŭdaču, pryviała tolki da dalejšych pakut hramadzianskaha nasielnictva i padvierhnuła niebiaśpiecy žyvych zakładnikaŭ.

Nie mienš važna, što kanfierencyja AAN taksama prachodziła pad kiraŭnictvam Saudaŭskaj Aravii i pry padtrymcy Lihi arabskich dziaržaŭ.

Francyja śćviardžaje: heta pakazvaje, što padobnaja forma dypłamatyi moža paŭpłyvać na CHAMAS, pakolki klučavyja arabskija krainy, jakija ŭdzielničali ŭ kanfierencyi, ciapier zaklikajuć hrupoŭku razzbroicca i pieradać zbroju Paleścinskaj aŭtanomii, dadajučy, što CHAMAS nie moža pretendavać na viadučuju rolu ŭ budučyni dla paleścincaŭ.

Na dumku Makrona, hety praces stvaraje stymuł dla Izraila i adnačasova pakidaje adkrytymi dźviery dla narmalizacyi adnosin z Saudaŭskaj Aravijaj, čaho daŭno damahajucca Nietańjachu i Tramp.

Rašeńnie pryznać paleścinskuju dziaržavu nasupierak žadańniu Vašynhtona ŭjaŭlaje saboj značnuju dypłamatyčnuju ryzyku.

Hledziačy na Makrona na trybunie AAN, možna było bačyć prezidenta, jaki sprabuje ŭziać na siabie rolu hłabalnaha lidara, jaki sprabuje znajści vyjście z «kašmaru» ŭ Hazie, jak vykazaŭsia hiensakratar AAN, i znajści ahulnuju budučyniu dla izrailcian i palestyncaŭ.

Ale kali kazać pra hrubuju siłu, Makron — nie toj prezident.

Bieź lidarstva ZŠA nie ŭźnikaje takoha ž značnaha cisku, jaki tolki Vašynhton moža akazać na ŭsie baki. I administracyja Trampa praciahvaje adchilać jeŭrapiejski padychod.

Tramp, jak paviedamlałasia, paśla vystupu na siesii Hienasamblei AAN u aŭtorak pavinien byŭ sustrecca z arabskimi lidarami — asobna ad ich pieramovaŭ ź jeŭrapiejcami, jakija prajšli ŭ paniadziełak.

Adsutnaść kaardynacyi pamiž klučavymi krainami ŭzmacniaje adčuvańnie chaosu, u toj čas jak Katar, jaki raniej vystupaŭ pasiarednikam na pieramovach pamiž Izrailem i CHAMAS, pa-raniejšamu admaŭlajecca viartacca da hetaj roli paśla taho, jak Izrail atakavaŭ lidaraŭ CHAMAS na jaho terytoryi.

I Makron, i brytanski premjer Kir Starmier zakranuli temu kałanijalnaj spadčyny svaich krain na Blizkim Uschodzie.

Jany nahadali, jak paśla sychodu Vialikabrytanii z histaryčnaj Paleściny ŭ 1948 hodzie mižnarodnaja supolnaść pryznała dziaržavu Izrail.

Ciapier, pa ich słovach, jany pryznajuć takoje ž prava paleścincaŭ na ŭłasnuju dziaržavu.

Paleścincy radyja pryznańniu z boku jeŭrapiejskich krain, ale taksama razumiejuć, što jany — zvyšdziaržavy minułaha. Ich rašeńni bolš nie ihrajuć toj roli, što raniej.

Stvareńnie paleścinskaj dziaržavy stanovicca realnym tolki ŭ tym vypadku, kali jaho padtrymaje ciapierašniaja zvyšdziaržava — Złučanyja Štaty.

Adnak u prezidenta ZŠA Donalda Trampa nakont hetaha pakul inšyja płany.

• 0
• 1
• 0
• 1
• 0
• 0
• 0
• 0