Adzin z bankaŭ viarnuŭ klijentam amal čverć miljona rubloŭ pierapłaty za kredyty
Hienieralnaja prakuratura Biełarusi paviedamiła, što adzin z bankaŭ pavinien viarnuć klijentam bolš za 226 tysiač rubloŭ pierapłaty za kredyty. Parušeńni vyjavili ŭ kancy 2025 hoda: akazałasia, što bank nie vykonvaŭ patrabavańni hramadzianskaha i bankaŭskaha zakanadaŭstva, a taksama ŭmovy kredytnych dahavoraŭ.
Jak vyśvietliłasia, jašče ŭ krasaviku 2022 hoda bank u adnabakovym paradku źmianiŭ umovy pa kredytach. Jon zamacavaŭ fiksavanuju hadavuju pracentnuju staŭku zamiest raniejšaj pieramiennaj, jakaja składałasia sa staŭki refinansavańnia i dadatkovych punktaŭ. Pry hetym klijentam pra źmieny nie paviedamili.
U prakuratury patłumačyli, što ŭ apošnija hady staŭka refinansavańnia ŭ krainie źnižałasia, tamu i pracenty za kredyty pavinny byli źmianšacca. Adnak bank praciahvaŭ raźličvać ich biez uliku hetaha źnižeńnia, što parušała ŭmovy damoŭ.
U vyniku praviedzienaj pravierki bank zrabiŭ pieraraźlik i viarnuŭ klijentam zališnie vypłačanyja sumy razam ź niaŭstojkaj i kampiensacyjaj za karystańnie čužymi hrašyma. Ahulnaja suma pieravysiła 226 tysiač rubloŭ.
Paviedamlajecca, što ad dziejańniaŭ banka paciarpieli kala paŭtary tysiačy čałaviek, a što heta za bank — nie havorać.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary