U Biełarusi startavali prodažy novaj madeli Lada. Što pa cenach i kolki kaštuje jaje jeŭrapiejski anałah?
Jaje hałoŭny kankurent — biełaruska-kitajski siedan Belgee S50.
U Biełarusi aficyjna startavali prodažy novaj Lada Iskra. Heta madel zajmaje pramiežkavaje źviano pamiž samaj tannaj Granta i bolš darahoj Vesta.
Rasijskaja mašyna z francuzskimi karaniami
Novaja madel «Łady» pabudavanaja na płatformie Renault-Nissan CMF-B, jakaja dastałasia AŭtaVAZu ŭ spadčynu ad supracoŭnictva z Renault. To-bok aŭtamabil stvorany na bazie Dacia (Renault) Logan 3.
Ale praz sychod jeŭrapiejskich aŭtavytvorcaŭ z Rasii ŭ adkaz na ahresiju suprać Ukrainy, AŭtaVAZu daviałosia adkłaści vypusk navinki. U vyniku zamiest maksimalna ŭnifikavanaj madeli z francuzskaj Dacia, rasijanie šmat što pierarablali i zamianiali detalami rasijskaj i kitajskaj vytvorčaści.
Zajaŭlajecca, što było ŭkaraniona bolš za 1000 novych kampanientaŭ, a kala 400 detalaŭ pierapracavana.
U vyniku Iskra vypuskajuć z dvuma typami bienzinavych ruchavikoŭ abjomam 1,6 litra — vaśmikłapanny na 90 k.s. i 16‑kłapanny na 106 k.s. Rasijskaja 5‑stupienčataja karobka pieradač idzie tolki ŭ pary z bazavym 8‑kłapannym ruchavikom. Šaścistupka i aŭtamat (varyjatar) u hetaj «Łady» — kitajskija.
Što pa cenach?
Siedan u kamplektacyi Life pradajecca pa canie ad 42 900 rubloŭ (kala 12 800 jeŭra). Univiersały — ad 51 400 rubloŭ (kala 15 300 jeŭra).
Viersija SW Cross kaštuje ad 56 900, što kala 17 tysiač jeŭra.
Admietna, što jeŭrapiejski anałah «Iskry», jaki padzialaje ź joj adnu i tuju ž płatformu, kaštuje krychu daražej.
Tak, naprykład, u Litvie ceny Dacia Sandero pačynajucca z 15 tysiač jeŭra.
Praŭda, kamplektacyja ŭ Dacia Sandero budzie krychu lepšaja, bo praz razryŭ suviaziaŭ z Renault Lada Iskra pazbaviłasia častki technałohij, nakiravanych na pavyšeńnie ŭzroŭniu biaśpieki.
U Biełarusi ž hałoŭnym kankurentam novaj madeli ad AŭtaVAZ nazyvajuć biełaruska-kitajski siedan Belgee S50, jaki choć i kaštuje krychu daražej za Iskra, ale vyjhraje pa šerahu paramietraŭ.
Kamientary