Na tarhach u Minsku 23 vieraśnia byli pradadzieny tavarnyja znaki biełaruskaj sietki dziciačych kram «Buślik». Pakupcam vystupiła kampanija Lemon Invest, piša Office Life.
Tavarnyja znaki pradali na tarhach za 39 tys. rubloŭ. Znaki niekali vialikaha rytejlera dziciačych tavaraŭ vystavili na tarhi ŭ pačatku hetaha hoda. Tady ŭłaśnik — kampanija «DPM», jakaja ŭvajšła ŭ bankructva — raźličvała pradać 30 tavarnych znakaŭ za 74,2 tys. rubloŭ.
— Maja novaja kampanija vyrašyła vykupić hetyja tavarnyja znaki, kab u «DPM» była mahčymaść pahasić zapazyčanaść pierad rabotnikami handlovaj sietki «Buślik», — rastłumačyŭ Office Life Siarhiej Misiačenka pryčynu takoj pakupki.
— Z samaha pačatku, kali stała jasna, što kramy sietki nie vyratavać, majoj hałoŭnaj metaj było pahasić daŭhi pa zarpłacie, što i było zroblena. Adnak bolej za 30 supracoŭnic kampanii na toj čas znachodzilisia ŭ adpačynku pa dohladzie za dziciem i nie zvolnilisia. Pierad imi nazapasiłasia zapazyčanaść u tym liku i pa vypłatach dapamoh na dziaciej. Ciapier, kali realizujecca majomaść rytejlera, hetyja hrošy pa zakanadaŭstvie iduć banku‑kredytoru, što baluča ŭsprymajecca rabotnikami.
Zaŭvažym, daŭhi pa dapamohach składajuć amal 66 tys. rubloŭ.
Kab chacia b častkova vyrašyć hetuju situacyju, Lemon Invest kupiła tavarnyja znaki «Buślika». Dla hetaha kampanija ŭziała kredyt u Alfa‑Banka.
Jak mienavita buduć vykarystoŭvacca ŭ budučyni hetyja tavarnyja znaki, Siarhiej Misiačenka pakul nie vyrašyŭ.
Kamientary