Stvaralnik saŭndtreku dla World of Tanks adśviatkavaŭ u Minsku svoj razvod
Hrandyjoznaha viasiella ŭ kampazitara i pradziusara Andreja Klimki nie było. Ale adśviatkavać razvod razam z byłoj žonkaj jon vyrašyŭ maštabna — ź viadučym, dydžejami i vielizarnym tortam-sercam.
Žonkaj Andreja Klimki, jaki napisaŭ saŭndtrek da viadomaj hulni World of Tanks, była biełaruskaja błohierka Kryścina Hierasimava. Jany pražyli ŭ šlubie try hady.
Pra toje, jak rychtavalisia da razvodu, para padrabiazna raspaviadała ŭ sacsietkach. Jany śćviardžali, što žartaŭlivy ton dapamahaŭ im lepš pražyvać stres. I kazali, što chočuć prademanstravać usim: spynieńnie šlubu moža być ekałahičnym.
Pačynałasia ŭsio jak va ŭsich: šmat miesiacaŭ abdumvańnia rašeńnia, pachod u ZAHS dy padača zajavy na razvod. U Biełarusi, navat kali i muž, i žonka chočuć raźvieścisia, nie majuć sprečnych pytańniaŭ nakont sumiesnaj majomaści i dziaciej, dziaržava ŭsio roŭna daje im čas na prymireńnie. Andrej i Kryścina vybrali minimalny termin — miesiac. Padaču zajavy para adśviatkavała sumiesnym abiedam u restaranie.
Za adviedzieny miesiac Andrej pa-siabroŭsku vučyŭ Kryścinu vyrašać pobytavyja pytańni — kštałtu samastojna apłačvać kamunalnyja pasłuhi.
Kryścina žartavała, što maštabnaje śviata z nahody razvodu joj nieabchodna, bo na viasielli jana takoha nie atrymała. Sapraŭdy na videa trochhadovaj daŭniny bačna, što cyrymonija była davoli ścipłaja: žanich i niaviesta ŭ ZAHS Leninskaha rajonu pryjšli ŭ paŭsiadzionnym adzieńni.
17 vieraśnia para viarnułasia tudy ž, kab pastavić podpisy ź inšaj nahody. Adzielisia ŭračysta, Kryścina niesła bukiet žoŭtych kvietak, a na vychadzie ich sustrakaŭ muzyka, jaki hraŭ na akardeonie — ščaślivyja raźviedzienyja tančyli.
Dla śviata abrali šykoŭnyja apartamienty ŭ centry stalicy, jakija majuć vychad na dach. Haściej zabaŭlali viadučy i dydžei. Muzyku padabrali tematyčnuju — naprykład, pieśniu «Ja podnimaju tost za svojeho byvšieho» Lusi Čabocinaj.
Zamiest tradycyjnaha dla maładzionaŭ karavaja para jeła hihancki burhier. Nie zabylisia i pra fatohrafa, videohrafa dy ryłsmejkiera. Padarunki novaraźviedzienyja taksama atrymali. A hości žartavali, što nie viedajuć, jak prachodzić pieršaja anty-šlubnaja noč.
U ciesnym kole siabroŭ byłyja muž i žonka ŭračysta źniali piarścionki i padziakavali adno adnamu za sumiesnaje žyćcio. A potym razam razrezali vielizarny tort u formie serca i raźviali ŭ roznyja baki jaho pałavinki jak simvał taho, što kachańnie skončyłasia.
Ź biełaruskich sielebryci raniej svoj razvod hučna adznačali opiernaja śpiavačka Marharyta Laŭčuk i pradziusar Alaksandr Čachoŭski.
«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod22
Kamientary