Čamu futbalisty na čempijanacie śvietu vychodziać na pole ŭ dziravych hietrach
Na čempijanacie śvietu chapaje hałoŭ, emocyj i niečakanych raźviazak. Ale jość jašče adna detal, jakaja kidajecca ŭ vočy hledačam: mnohija futbalisty vychodziać na pole ŭ hietrach z vyrazanymi dzirkami. Navošta jany heta robiać?
Moda na dziravyja hietry, jak raskazvaje vydańnie The Athletic, źjaviłasia jak minimum vosiem hadoŭ tamu i z taho času tolki nabiraje papularnaść. Časam niekalki hulcoŭ adnoj kamandy vychodziać na pole z adnolkava razrezanymi hietrami, niby heta praduhledžana dyzajnam formy. Nasamreč bolšaść takich adtulin futbalisty robiać samastojna pierad matčami.
Pryčyna, jak praviła, vielmi prostaja — kamfort. Sučasnyja futbolnyja hietry zvyčajna vyrablajuć z poliestru. Hety materyjał dobra trymaje formu, nie tak mocna ŭbiraje vilhać i vytrymlivaje vialikija nahruzki. Ale jość i advarotny bok: tkanina moža davoli ščylna ablahać nahu.
Niekatoryja futbalisty ličać, što zanadta tuhija hietry stvarajuć cisk na ikranožnyja myšcy. Kab pazbavicca ad hetaha adčuvańnia, jany vyrazajuć u tkaninie niekalki nievialikich adtulin. Pavodle ich mierkavańnia, heta źnižaje napružańnie ŭ myšcach, palapšaje krovazvarot i dapamahaje paźbiehnuć sutarhaŭ padčas matča.
Akramia fizičnaha kamfortu, svaju rolu adyhryvaje i psichałohija. Spartsmieny tradycyjna vielmi ŭvažliva staviacca da drobiaziaŭ, jakija mohuć upłyvać na ich upeŭnienaść.
Były napadajučy «Viest Chem Junajted» Frenk Nuble ŭ intervju jašče ŭ 2023 hodzie tłumačyŭ heta prostaj formułaj: «Dobra vyhladaješ — lepš siabie adčuvaješ. Lepš siabie adčuvaješ — lepš hulaješ. Hałoŭnaje, kab na poli było jak maha zručniej».
Tamu mnohija futbalisty hatovyja ekśpierymientavać z ekipiroŭkaj u pošukach dadatkovaha kamfortu.
Što kažuć miedyki pra dzirki
Adnak navukovych dokazaŭ taho, što dzirki ŭ hietrach sapraŭdy dapamahajuć palepšyć fizičny stan hulcoŭ, pakul niama. Daśledavańni nie paćviardžajuć ni źnižeńnia ryzyki traŭmaŭ, ni palapšeńnia krovazvarotu dziakujučy takoj praktycy.
Bolš za toje, ź miedycynskaha punktu hledžańnia dla palapšeńnia cyrkulacyi kryvi časta vykarystoŭvajucca jakraz kampresijnyja škarpetki, jakija ščylna ablahajuć nahu. Jany dapamahajuć pamianšać acioki i spryjajuć adnaŭleńniu paśla nahruzak. Tamu śćviardžeńnie, što asłableńnie hietraŭ palapšaje krovazvarot, vyhladaje sprečnym.
Vytvorcy spartyŭnaj ekipiroŭki taksama śćviardžajuć, što sučasnyja hietry raspracoŭvajucca z ulikam patreb prafiesijnych spartsmienaŭ. Novyja materyjały dazvalajuć spałučać tryvałaść i ełastyčnaść, a ŭ kanstrukcyju hietraŭ uklučajucca śpiecyjalnyja zony amartyzacyi, vientylacyi i kampresii.
Pry hetym niekatoryja brendy sapraŭdy robiać hietry bolš ščylnymi, kab jany lepš trymali formu i kab łahatypy zastavalisia dobra bačnymi. Mahčyma, mienavita tamu častka futbalistaŭ adčuvaje dyskamfort i sprabuje vyrašyć prablemu pry dapamozie nažnicaŭ.
Nie ŭsie ŭ futbolnym śviecie vierać u efiektyŭnaść takoha padychodu. Były abaronca zbornaj Anhlii i «Mančester Junajted» Hary Nevił nieadnarazova vykazvaŭ sumnievy nakont nieabchodnaści rezać hietry. Na jaho dumku, prafiesijnyja futbalisty majuć dostup da indyvidualna padabranaj ekipiroŭki, tamu pry žadańni mohuć atrymać hietry patrebnaha pamieru biez dadatkovych madyfikacyj.
Niahledziačy na skieptycyzm śpiecyjalistaŭ, dziravyja hietry praciahvajuć zastavacca častkaj sučasnaha futboła. Pakul futbalisty ličać, što takaja drobiaź dapamahaje im lepš vystupać na poli, moda na hietry ź dzirkami naŭrad ci chutka źniknie.
Ciapier čytajuć
U Vialikaj Miadźviadcy adšukali mahiłu brata Ihnata Damiejki. Pahladzicie, jak spaskudzili carkvu pobač, jakuju naviedvaŭ suśvietna viadomy navukoviec88
Kamientary
a jany ich nažnicami chirak-chirak )