Tenis staŭ adnoj z hałoŭnych novych placovak dla prasoŭvańnia luksavych brendaŭ.
U studzieni biełaruskaja tenisistka Aryna Sabalenka stała tvaram «Hučy». U rekłamnym videa spartsmienka była adzietaja ŭ doŭhuju šaŭkovuju sukienku bežavych i ciomna-karyčnievych adcieńniaŭ z kalekcyi viasna—leta 2026 hoda. Ź sierabrystaj sumačkaj hetaha brendu Sabalenka źjaŭlałasia na ŭručeńni joj prestyžnaj mižnarodnaj premii Laureus World Sports Awards. A na niadaŭnim turniry Italian Open Aryna vyjšła na kort z sumkaj Gucci Paparazzo.
Supracoŭnictva ź pieršaj rakietkaj śvietu stała łahičnym praciaham stratehii italjanskaha modnaha doma. Hety brend, jak adznačaje Financial Times, jašče raniej pačaŭ źviartać uvahu na tenisnych zorak i zrabiŭ staŭku na Janika Sinera — jašče da taho, jak jon vyjhraŭ svoj pieršy turnir «Vialikaha šlema» i staŭ pieršaj rakietkaj śvietu.
Praz hod na Uimbłdonie Siner źjaviŭsia na korcie sa spartyŭnaj sumkaj Gucci, azdoblenaj firmovym łahatypam kampanii. Hety epizod vyklikaŭ vialiki rezanans, bo turnir viadomy svaim strohim dres-kodam i tradycyjaj biełaha adzieńnia.
Hetaja tendencyja achapiła ŭvieś ešałon elitnych brendaŭ, jakija pačali aktyŭna supracoŭničać z tenisnymi zorkami. Uśled za Gucci svaje intaresy ŭ sporcie abaznačyli Louis Vuitton, padpisaŭšy kantrakt z Karłasam Alkarasam, hałoŭnym supiernikam Sinera. Dior abraŭ svaim tvaram kitajskuju zorku Čžen Cińveń. Burberry zaručyŭsia padtrymkaj pierśpiektyŭnaha brytanca Džeka Drejpiera.
Miu Miu vypuściŭ kalekcyju tenisnaha adzieńnia razam z Koka Haŭf i New Balance, a paśla padpisaŭ kantrakt i z samoj amierykanskaj tenisistkaj. Narešcie, Bottega Veneta padpisała italjanca Łarenca Muzieci, jakoha časta paraŭnoŭvajuć z madellu.
Pradstaŭniki Gucci śćviardžajuć, što dla ich heta nie prosta moda na papularny sport. U kampanii nahadvajuć, što jašče ŭ 1970‑ch brend vypuściŭ krasoŭki Tennis 1977 i daŭno vykarystoŭvaje tenisnuju estetyku ŭ svaich kalekcyjach.
Sapraŭdy, piša FT, suviaź pamiž luksam i tenisam nie źjaŭlajecca niečym novym. Takija brendy, jak Lacoste i Ralph Lauren, dziesiacihodździami vykarystoŭvajuć vobrazy hetaha sportu ŭ svaich kalekcyjach, vystupajučy partniorami turniraŭ «Vialikaha šlema» — Roland-Garros, US Open i Uimbłdona, a ŭ vypadku z Lacoste — jašče i apranajučy prafiesijnych hulcoŭ. Rolex taksama nieparyŭna źviazany z tenisam z taho času, jak u 1978 hodzie staŭ aficyjnym chranamietrystam Uimbłdona, a paśla i astatnich troch turniraŭ «Vialikaha šlema».
Adnak apošnija hady tenis staŭ značna papularniejšym jak vid sportu i jak miedyjnaje šou. Spabornictvy «Vialikaha šlema» ciapier rehularna paraŭnoŭvajuć z muzyčnym fiestyvalem Coachella z-za vielizarnych natoŭpaŭ, siarod jakich mnostva znakamitaściaŭ i influensieraŭ. Naprykład, sioletni Australian Open pabiŭ rekordy naviedvalnaści: za try tydni praz bramy Melbourne Park prajšło 1,3 miljona čałaviek.
Rekordnaja naviedvalnaść trybun i rost prahladaŭ na stryminhavych płatformach zrabili tenis vielmi pryvabnaj placoŭkaj dla luksavych brendaŭ. Kali raniej modnyja damy aścierahalisia sportu, bajučysia stracić status «vysokaha stylu», to ciapier u industryi ŭsio čaściej havorać pra toje, što mienavita spałučeńnie sportu i mody budzie vyznačać budučyniu raskošy.
Dadatkovym faktaram stała źmiena łandšaftu na rynku spartyŭnaha adzieńnia. Tradycyjnyja hihanty, takija jak Nike i Adidas, usio bolš aryjentujucca na masavaha spažyŭca, a kultavyja tenisnyja marki minułaha — Fila, Sergio Tacchini i Ellesse — pastupova hublajuć svaju aktualnaść. U vyniku luksavyja brendy atrymali mahčymaść zaniać hetuju nišu i pačali aktyŭna farmavać novy vobraz sučasnaha tenisa.
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!8
Kamientary