Z-za rostu cen na naftu moža padaražeć i tannaje adzieńnie z mas-markietu

Dahetul aksijoma rytejłu hučała prosta: kali ŭ ekanomicy ŭsio drenna, pakupnik idzie ŭ dyskaŭntery. Ale, jak piša The Financial Times, vajna ŭ Iranie i inflacyjny cisk u Jeŭropie źmianili praviły hulni.

Pryčyna ŭ tym, što kanflikty takoha maštabu bjuć nie tolki pa nastrojach spažyŭcoŭ, ale i pa sabiekošcie vytvorčaści. Praktyčna ŭsie elemienty łancužka pastavak, źviazanyja z naftaj, daražejuć. Naprykład, z pačatku vajny košt marskich pieravozak pamiž Šanchajem i Raterdamam vyras prykładna na 20%, a avijapieravozki pamiž Paŭdniova-Uschodniaj Azijaj i Jeŭropaj — na čverć.

Asabliva ŭraźlivymi stanoviacca kampanii, jakija aktyŭna vykarystoŭvajuć poliester — adzin z klučavych materyjałaŭ industryi «chutkaj mody» (fast fashion). Kala 70% vydatkaŭ na jaho vytvorčaść zaležyć ad naftapraduktaŭ. Tamu rost cen na naftu prykładna na 40% za apošni miesiac užo pryvioŭ da padaražańnia poliefirnych vałoknaŭ bolš jak na čverć.

Pakul što situacyja nie adbiłasia ŭ poŭnaj miery na finansavych vynikach. Naadvarot, apošni hod dla šerahu modnych rytejleraŭ byŭ davoli prybytkovym. Naprykład, H&M paviedamiła pra rost vałavoj maržy na 1,6 pracentnaha punkta. Pry hetym amal uvieś hety rost tłumačycca dvuma faktarami. Pavodle acenak analitykaŭ, tanny poliester daŭ kala 0,8 pracentnaha punkta da prybytkovaści, a źnižeńnie cen na dastaŭku — jašče 0,6. Razam heta 1,4 z 1,6 punkta rostu.

Ale hety efiekt moža chutka źniknuć. Brytanskaja sietka Next užo papiaredziła, što rost cen na naftu pačnie adbivacca na sabiekošcie, u tym liku praz padaražańnie poliesteru, užo ŭ druhoj pałovie hoda. Analityki taksama ličać, što ŭ H&M ciapierašni «plus» ad tannaj syraviny moža pieratvarycca ŭ «minus» užo ŭ nastupnym hodzie.

Stupień zaležnaści ad nafty roźnicca pamiž kampanijami. Brendy siaredniaha siehmientu, takija jak H&M, Next abo Inditex (uładalnik Zara), vykarystoŭvajuć poliester prykładna ŭ čverci svajoj pradukcyi. Pry hetym H&M zajaŭlaje, što ŭvieś ich poliester — pierapracavany, što robić jaho vytvorčaść enierhajomistaj, ale krychu mienš zaležnaj ad cen na naftu.

Zusim inšaja karcina ŭ siehmiencie ultratannaj mody. U Boohoo kala pałovy pradukcyi — heta poliester, a ŭ Shein jaho dola pieravyšaje 80%. Mienavita hetyja kampanii najbolš uraźlivyja da rostu vydatkaŭ na syravinu.

Pavialičyć

Kali sabiekošt praciahnie raści, rytejlery buduć vymušanyja pavyšać ceny. Next užo dapuskaje taki scenar, kali vajna zaciahniecca bolš čym na try miesiacy. Adnak tut uźnikaje novaja prablema: popyt na rynku stanovicca ŭsio bolš niaroŭnym.

Ekanamisty prahnazujuć, što zabiaśpiečanyja spažyŭcy praciahvajuć tracić, u toj čas jak mienš zamožnyja skaračajuć vydatki. U takich umovach tannyja brendy mohuć apynucca ŭ składanaj situacyi — im ciažej pierakłaści rost vydatkaŭ na pakupnikoŭ.

Kali raniej poliester byŭ sposabam zekanomić, to siońnia jon pieratvarajecca ŭ ciažar, jaki moža pryvieści da taho, što biźnies-madeli brendaŭ tannaj mody pačnuć «razychodzicca pa švach» adnymi ź pieršych.

Akramia taho, ahulnaje paharšeńnie ekanamičnaj situacyi moža pryvieści da źnižeńnia popytu ŭ cełym. U vyniku spažyŭcy buduć nie stolki «pierachodzić na tannaje», kolki prosta kuplać mienš.

• 2
• 0
• 0
• 0
• 0
• 0
• 0
• 0