U Kitai prezientavali pieršy ŭ śviecie samachodny ŭnitaz, jaki moža pieramiaščacca pa domie
Kali zvyčajnyja robaty pryvoziać ježu abo prybirajuć padłohu, to novaja kitajskaja raspracoŭka vyrašyła bolš dalikatnuju zadaču. Rabatyzavany ŭnitaz samastojna pieramiaščajecca pa domie, reahuje na hałasavyja kamandy i aŭtamatyčna ačyščajecca paśla vykarystańnia.
Pryłada, jakuju sami raspracoŭščyki nazyvajuć pieršaj u śviecie samachodnaj prybiralniaj, atrymała nazvu Xiaoban — heta čytajecca «Siaabań», što možna pierakłaści jak «Maleńki spadarožnik». Jak piša Daily Mail, prezientacyja navinki adbyłasia ŭ pačatku červienia na Šanchajskaj mižnarodnaj vystavie tavaraŭ dla pažyłych ludziej, dapamožnych srodkaŭ i reabilitacyjnaj miedycyny.
Kiravać robatam možna z dapamohaj pulta dystancyjnaha kiravańnia ź vialikimi knopkami abo hałasavymi kamandami. Pry hetym sistema raspaznavańnia hołasu pracuje ŭ aŭtanomnym režymie, tamu karystalnik nie zastaniecca ŭ składanaj situacyi, kali raptam źniknie Wi-Fi.
Paśla atrymańnia kamandy ŭnitaz samastojna nakiroŭvajecca da karystalnika. Dla navihacyi jon vykarystoŭvaje łaziernyja i ultrahukavyja čujniki, jakija dazvalajuć składać kartu pamiaškańnia i abychodzić pieraškody. Raspracoŭščyki adznačajuć, što dla hetaha nie patrabujucca kamiery, što dapamahaje zachoŭvać pryvatnaść karystalnikaŭ.
Paśla vykarystańnia robat prapanuje šerah funkcyj, jakija zvyčajna sustrakajucca ŭ sučasnych japonskich i kitajskich razumnych prybiralniach. Siarod ich padmyvańnie ciopłaj vadoj, sušeńnie pavietram i dezinfiekcyja ultrafijaletam.
Asobnaja ŭvaha nadadziena baraćbie z pachami. Pryłada abstalavanaja sistemaj niejtralizacyi pachaŭ z vykarystańniem śpiecyjalnaj pieny i filtra z aktyvavanym vuhalem.
Paśla zaviaršeńnia pracedur robat viartajecca da svajoj dok-stancyi. Jana padklučajecca da chatniaj kanalizacyi, što dazvalaje aŭtamatyčna vydalać adchody. Kali ž pa niejkaj pryčynie Xiaoban nie moža dabracca da stancyi, jon zdolny samastojna aparažnić reziervuar u zvyčajny ŭnitaz.
Paśla hetaha sistema zapuskaje aŭtamatyčnuju ačystku. Dla dezinfiekcyi vykarystoŭvajucca strumieni vady pad ciskam i ŭltrafijaletavaje vypramieńvańnie.
Stvaralniki Xiaoban śćviardžajuć, što hałoŭnaja zadača raspracoŭki — palehčyć žyćcio ludziam, jakija majuć patrebu ŭ dohladzie, i źnizić nahruzku na rabotnikaŭ sacyjalnaj śfiery.
Adnak u sacyjalnych sietkach mnohija karystalniki ŭspryniali navinku z humaram. Niekatoryja pažartavali, što hałoŭnymi klijentami stanuć nie piensijaniery, a amatary kampjutarnych hulniaŭ, jakija nie chočuć adychodzić ad ekrana. Inšyja pačali fantaziravać pra vykarystańnie samachodnaha ŭnitaza ŭ jakaści srodku pieramiaščeńnia pa domie.
U Kitai Xiaoban užo pastupiŭ u prodaž. Jaho cana składaje kala 29 tysiač juaniaŭ, abo prykładna 4300 dalaraŭ ZŠA. Pakul što pryłada dastupnaja tolki na kitajskim rynku: kampanija-vytvorca pra płany vyvieści samachodny ŭnitaz na rynki inšych krain pakul nie paviedamlaje.
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych2121
Kamientary