Mierkavańnie. Čakać česnych vybaraŭ ad Karpienki nie varta. I voś čamu

Ihar Karpienka i tak byŭ u hetaj sistemie «ministram pa vybarach». Pad jaho kiraŭnictvam nastaŭniki składali śpisy vybarščykaŭ, siadzieli ŭ kamisijach i «ličyli» hałasy, jon prapanoŭvaŭ i ŭzhadniaŭ kadry ŭ hetaj «stratehičnaj» śfiery. Dośvied arhanizacyi vybaraŭ u jaho byŭ jašče z 2010-ha, kali jon uznačalvaŭ Minskuju haradskuju vybarčuju kamisiju. Za što potym trapiŭ u sankcyjny śpis ES. 

Heta čałaviek absalutna addadzieny Łukašenku, jamu jon abaviazany ŭsim.

Da svajho ŭźlotu Karpienka byŭ deputatam, potym dosyć niezaŭvažna siadzieŭ u minskim vykankamie. Pakul nie zdaryłasia dziŭnaje. Sabraŭšysia siłami, staryja sakratary CK kampartyi BSSR pajšli da Łukašenki z dakładam ab sumnym losie kamunistyčnaj partyi, jakaja vymirała i mieła patrebu ŭ enierhičnym načalniku.

Jany prasili ŭ kiraŭniki partyi kahości z administratyŭnych rabotnikaŭ, jaki moh by ažyvić rabotu. Čytaj — administratyŭnym mietadam udychnuć žyćcio. Tak, u 2012-m hodzie Łukašenka pryznačyŭ Karpienku. 

Jak «staršynia partyi» toj staŭ čaściej hučać, čaściej dekłaravać idei, jakija nie-nie, dy j dalatali navierch da Łukašenki, źviartali ŭvahu. Praz čatyry hady Karpienku pryznačyli ministram adukacyi. 

Ministerskaja dziejnaść prypała na ciažkija časy — u škole vučyŭsia Mikałaj Łukašenka. Kožny hod vyśviatlałasia, što niešta nie toje — to nie taja kłasičnaja litaratura, to nie taja historyja, to nie taja bijałohija. 

Ad Karpienki nie było čutno ni adnaho słova suprać. Pry čym ni razu. Treba novyja padručniki? Dyk jany ŭžo hatovy! Načalnik kryvicca ad słova «prahramisty»? Skarocim nabor! Treba pierapisać historyju? Pierapišam! 

Ale finalnaja i hałoŭnaja pravierka adbyłasia ŭ 2020-m, kali Karpienka razam ź siłavym błokam zajmaŭsia zabieśpiačeńniem vybaraŭ. 

U kiraŭniki CVK jaho rychtavali jašče da minułych vybaraŭ. Karpienka sabraŭ nieabchodnyja ŭ hetaj sistemie rekamiendacyi, ale pryznačyć jaho ŭ ekstremalnych umovach Łukašenka nie rašyŭsia. 

Karpienka vyhladaŭ idealnaj kandydaturaj dla źmieny Jarmošynaj. Jaje namieśnikaŭ nichto nie viedaje, i dośviedu ŭździejańnia na rozumy vialikich kalektyvaŭ jany nie majuć. A Karpienka — fihura. 

Imavierna, možna było b niedzie pobač razhladać i kiraŭnika prafsajuzaŭ Ordu, jaki taksama vierny, taksama pracuje ź ludźmi. Ale toj celić u kiraŭniki Administracyi prezidenta i na CVK raźmieńvacca b nie staŭ sam. 

• 0
• 0
• 0
• 0
• 0
• 0
• 0
• 0