Jeŭrapiejski bank rekanstrukcyi i raźvićcia bolš nie budzie finansavać biełaruski pryvatny biznes? Tłumačym nastupstvy
Jeŭrapiejski bank rekanstrukcyi i raźvićcia płanuje spynić finansavańnie novych prajektaŭ u pryvatnym siektary Biełarusi. Letaś arhanizacyja ŭžo pierastała vydavać hrošy dziaržpradpryjemstvam. Što budzie, kali biznes pazbaviać kredytaŭ?
Pra namiery JEBRR paviedamiŭ Devex. Raniej struktura kazała, što budzie bolš pilna sačyć za vydačaj hrošaj pryvatnym biełaruskim prajektam. Kab harantavać, što jany nie padtrymlivajuć kampanii, źviazanyja z uradam.
Da vybaraŭ JEBRR pavialičvaŭ inviestycyi ŭ Biełaruś. Tak, u 2019-m jon vydzieliŭ krainie 390 miljonaŭ jeŭra.
«Heta dastatkova salidnaja suma. Kaniečnie, nie ŭsio tam išło na pryvatny siektar, bo da 2020 hoda JEBRR pracavaŭ i ź niejkimi hramadskimi, infrastrukturnymi prajektami — tyja ž darohi, vodakanały.
Akramia hetaha jon niejki čas pracavaŭ navat ź dziaržpradpryjemstvami, zrabiŭšy dla Biełarusi vyklučeńnie ŭ svaich padychodach. I paśla padrychtoŭki niekalkich pradpryjemstvaŭ da pryvatyzacyi vyśvietliłasia, što pryvatyzavać ich nichto nie źbirajecca», — kaža akademičny dyrektar BEROC Kaciaryna Barnukova.
Asnoŭnaja prablema našaha biznesu — niedachop finansavańnia. U nas praktyčna niama fondavaha rynku, dobrych inviestycyjnych kampanij.
«Navat naša bankaŭskaja sistema nie zusim umieła pracavać z pryvatnymi kampanijami. Joj bolš zvykła było vieści spravy z bujnymi dziaržaŭnymi. I kredyty JEBRR, jakija časta vydzialilisia tym ža bankam na kredytavańnie małoha i siaredniaha biznesu, dazvalali raźvivać hety kirunak.
Dziakujučy hetamu banki navučylisia pracavać z pryvatnym biznesam, zrazumieli, što heta moža być prybytkova, — zaŭvažaje ekśpiert. — JEBRR staraŭsia ŭdzielničać u prajektach, jakija mieli važnyja nastupstvy dla raźvićcia samoj finansavaj sistemy.
Jon davaŭ hrošy tamu ž fondu «Zubr Kapitał», kab jon inviestavaŭ ich u inšyja kampanii».
Siarod tych, kaho padtrymlivaŭ JEBRR, — «Kronaspan», Modus Group, «Siervaluks», «Miła», «Jeŭrahandl», PandaDoc. Arhanizacyja davała nie tolki hrošy, ale i kansałtynhavuju padtrymku, što dapamahała kampanijam stać lidarami na rynku.
Što budzie ciapier? Faktyčna mały i siaredni biznes zastaniecca całkam zaležny ad bankaŭskaha finansavańnia, bo inšaha prosta niama. Prablema ŭ tym, što bankam časta byvaje niedastatkova ŭłasnych srodkaŭ.
«Važnaja reč — JEBRR davaŭ hrošy na prajekty, jakija rynkavyja siły nie zaŭsiody byli hatovy padtrymać. Naprykład, pa zialonym finansavańni. Usio zialonaje finansavańnie, jakoje było ŭ Biełarusi, išło praź mižnarodnyja prajekty.
Ciapier my budziem mienš padrychtavany da vialikaj zialonaj novaj ździełki, jakuju ŭvodzić Jeŭrasajuz i jakaja stavić novyja patrabavańni da ŭsich tavaraŭ, što buduć impartavacca tudy. Atrymlivajecca, finansavańnia na vykanańnie hetych patrabavańniaŭ u nas niama.
Dla zamiežnych inviestaraŭ heta niesumnienna jašče adzin sihnał. Mnohija vykarystoŭvali apraŭdańnie, što jany pracujuć ź biełaruskim pryvatnym siektaram, bo i JEBRR ź im pracuje. Tak, dla inviestaraŭ z azijackich krain hetyja rečy nie pryncypovyja, na ich źmieny nie paŭpłyvajuć. Ale jeŭrapiejskija — a heta tyja, chto prynosić z saboj novyja technałohii, novuju jakaść mieniedžmientu — u čarhovy raz zadumajucca, — pieraličvaje nastupstvy Kaciaryna Barnukova. —
Časta zamiežnyja inviestary, kali prychodzili ŭ krainu, raźličvali na sufinansavańnie ad jeŭrapiejskich instytutaŭ. Ciapier jany atrymać jaho nie zmohuć.
Našy pryvatnyja pradpryjemstvy buduć mienš pryvabnymi dla inviestaraŭ. Dla apošnich było pakazčykam: kali niejkaja kampanija pracavała ź JEBRR, značyć jana prajšła pravierki, pracesy ŭ joj naładžany, usio adbyvajecca prazrysta i efiektyŭna. Zaraz hetych harantyj niama».
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary