«Pazbaŭlajuć mahčymaści abaraniacca. Užo adrazu b nas pryhavaryli. Navošta hety fars». Što piša Cichanoŭski maci z turmy
Maci Siarhieja Cichanoŭskaha atrymała 20 kastryčnika list ad syna z turmy, u jakim jon piša pra adchileńnie jahonaj advakatki Natalli Mackievič, što pazbaŭlaje jaho mahčymaści abaraniacca ŭ sudzie. List byŭ napisany 13 kastryčnika.
Radyjo Svaboda pryvodzić frahmient lista palitviaźnia.
«Pryvitańnie, mama! Jak spravy? Daŭno tvaich listoŭ užo nie bačyŭ. U mianie ŭsio pa-staromu. Sud užo chutka zakončycca. Ty ŭžo, napeŭna, viedaješ, što adchilili majho advakata Natallu Mackievič, jakaja ad samaha pačatku zajmałasia majoj spravaj (kala 500 dzion) i pavinna była nieŭzabavie vystupić na sprečkach u sudzie i zajaŭlać dokazy ŭ maju abaronu. Ale heta ŭžo, napeŭna, ličycca, złačynstvam u nas u krainie. Akramia taho, čto sud zakryty i prachodzić u SIZA, kab nichto nie zmoh daviedacca praŭdu, to jašče i pazbaŭlajuć mianie mahčymaści abaraniacca, adchilajučy majho hałoŭnaha abaroncu…
Dyk užo adrazu b nas pryhavaryli. Navošta hety fars. Kamu hetaja bačnaść patrebna? Nichto i tak nia vieryć u hetyja sudy. Bieražy zdaroŭje».
Sud nad Siarhiejem Cichanoŭskim, Iharam Łosikam, Mikołam Statkievičam, Uładzimiram Cyhanovičam, Dźmitryjem Papovym i Arciomam Sakavym idzie ŭ zakrytym režymie ŭ budynku homielskaj turmy z 24 červienia. Advakaty dali padpisku ab nievydavańni, tamu pra akaličnaści pracesu ničoha nie viadoma. Usim šaści fihurantam spravy pahražaje da 12—15 hadoŭ pazbaŭleńnia voli. Im inkryminujuć «masavyja biesparadki», «raspalvańnie sacyjalnaj varožaści» i inšyja ciažkija artykuły Kryminalnaha kodeksu.
Usie fihuranty spravy ŭžo bolš jak hod u SIZA.
«Druhi raz pazbaŭlajuć advakata». Baćka Mikoły Dziadka raskazvaje, što adbyvajecca pa spravie syna
Ad advakackaj dziejnaści adchilili Jaŭhiena Pylčanku. Viktar Babaryka zastaŭsia biez advakataŭ
Ciapier čytajuć
Dziadok patłumačyŭ, čamu vyzvalili mienavita tych palitviaźniaŭ, kaho vyzvalili31
Kamientary