Vosiem prablemnych miescaŭ u domie: ci viedajecie vy, jak pravilna prybirać?

Myćcio ruk, anuč i pracoŭnych pavierchniaŭ u patrebny čas źjaŭlajecca klučavym dla zachavańnia hihijeny. Adnak kožny čaćviorty čałaviek ličyć, što heta niavažna, papiaredžvajuć daśledniki.

Pravilnaja i svoječasovaja ŭborka moža źmienšyć pašyreńnie infiekcyj i ŭstojlivaść da antybijotykaŭ.

Akramia taho, na dumku navukoŭcaŭ, «zanadta čystym» vaš dom być nie moža.

Zhodna z dakładam RSPH, časta ludzi błytajuć takija paniatki, jak brud, mikroby, čyścinia i hihijena.

U daśledavańni, u jakim udzielničali za 2000 čałaviek, 23% ličyli, što dzieci pavinny padviarhacca ŭździejańniu škodnych mikrobaŭ, kab umacavać svaju imunnuju sistemu.

Adnak aŭtary spravazdačy adznačajuć, što heta — «patencyjna niebiaśpiečnaje pierakanańnie», jakoje moža pryvieści da ŭźniknieńnia niekatorych niebiaśpiečnych infiekcyj.

Zatoje, kažuć ekśpierty, ludziam varta zasiarodzicca na ŭborcy kankretnych miescaŭ u kankretny čas, navat kali jany vyhladajuć čystymi — dla taho, kab spynić raspaŭsiud škodnych mikrobaŭ.

Jakija «prablemnyja miescy» dla hihijeny?

• padrychtoŭka i apracoŭka praduktaŭ charčavańnia
• ježa rukami
• vykarystańnie prybiralni
• kašal, čchańnie i smarkańnie
• čystka i myćcio «brudnych» anuč i adzieńnia
• dohlad za chatnimi žyviołami
• sartavańnie i vyvaz śmiećcia
• dohlad za členam siamji ź infiekcyjaj

Myćcio ruk asabliva važna paśla apracoŭki ježy, karystańnia prybiralniaj, kašlu, čchańnia, dahladu za chatnimi žyviołami i chvorymi, havorycca ŭ dakładzie.

Ačystka kuchonnych pavierchniaŭ i apracoŭčych došak nieabchodnaja paśla padrychtoŭki syrych praduktaŭ, takich jak miasa i ptuška, abo pierad padrychtoŭkaj buterbrodaŭ i zakusak.

Taksama rekamiendujecca myć anučy i ščotki paśla myćcia imi zabrudžanych pavierchniaŭ.

Padłohi i mebla mohuć vyhladać brudnymi, ale jany zvyčajna ŭtrymlivajuć mikroby, jakija nie niebiaśpiečnyja dla zdaroŭja.

Jak pravilna vydalać bakteryi?

Myćcio pavierchniaŭ i posudu ciopłaj mylnaj vadoj vydalaje bakteryi, vymyvajučy ich u kanalizacyju.

Jakija srodki vykarystoŭvać?

Isnuje try asnoŭnyja katehoryi srodkaŭ, kožnaja ź jakich maje svaje funkcyi.

• myjnyja srodki — čyściać pavierchniu i vydalajuć tłušč, adnak nie zabivajuć bakteryi.
• dezinfiektanty — zabivajuć bakteryi, ale nie pracujuć efiektyŭna na pavierchni, pakrytaj tłuščam abo bačnym brudam.
• dezinfikujučyja srodki abo antysieptyki — možna vykarystoŭvać jak dla ačystki, tak i dla dezinfiekcyi. Spačatku vykarystoŭvajcie takija srodki dla ačystki pavierchni, vydaleńnia zabrudžvańniaŭ i tłušču, a zatym naniasicie na čystuju pavierchniu dla dezinfiekcyi.

Važna taksama ŭvažliva čytać instrukcyju, kažuć ekśpierty.

Dla ačystki pavierchniaŭ paśla hatavańnia ježy zamiest anuč lepš vykarystoŭvać papiarovyja ručniki. Heta abaronić kuchonnyja anučy ad zabrudžvańnia škodnymi bakteryjami.

Što kažuć ekśpierty?

Prafiesar Sali Błumfiłd z Łondanskaj škoły hihijeny i trapičnaj miedycyny kaža, što hramadskaść pavinna viedać roźnicu pamiž hihijenaj i čyścinioj.

«U toj čas jak uborka — heta vydaleńnie brudu i mikrobaŭ, hihijena aznačaje ačyščeńnie ŭ tych miescach i ŭ toj čas, kali heta treba — i pravilnym čynam — kab razarvać łancuh infikavańnia padčas hatavańnia ježy, karystańnia prybiralniaj, dohladu za chatnimi žyviołami i h.d.».

Prafiesar Liza Akierli, ekśpiert pa pytańniach hihijeny charčavańnia i člen praŭleńnia ŭ Karaleŭskim tavarystvie achovy zdaroŭja, kaža: «Być na vulicy i hulać ź siabrami, siamjoj i chatnimi žyviołami — vydatna dla kantaktu z «dobrymi bakteryjami» i stvareńnia zdarovaha mikrabiomu, ale taksama važna, kab ludzi nie błytali rečy. Heta nie pavinna pieraškadžać dobraj hihijenie».

«Metaskiravanaja hihijena ŭ peŭny čas i ŭ vyznačanym miescy — chutki i dziejsny sposab praduchileńnia infiekcyi, jaki adnačasova nie pazbaŭlaje vas kantaktu z «dobrymi bakteryjami», ad jakich karyść dla vašaha arhanizma, — kaža Akierli.

«Pravilnaja hihijena doma i ŭ paŭsiadzionnym žyćci dapamahaje pamienšyć ryzyku infiekcyi, źjaŭlajecca žyćciova važnaj dla abarony našych dziaciej i źnižeńnia cisku na sistemu achovy zdaroŭja. I maje vielizarnuju rolu ŭ baraćbie z ustojlivaściu da antybijotykaŭ», — dadaje jana.

• 0
• 0
• 0
• 0
• 0
• 0
• 0
• 0