Zajavy na ŭčorašniaj naradzie akazalisia nia prosta rytaryčnymi fihurami: Łukašenka źniaŭ z pasadaŭ Šejmana dy Niavyhłasa. Piša ŭ svaim błohu Alaksandar Kłaskoŭski.
Alaksandar Łukašenka źniaŭ z pasadaŭ dziaržsakratara Rady biaśpieki Viktara Šejmana dy kiraŭnika svajoj administracyi Hienadzia Niavyhłasa. Tak što hroznyja zajavy na ŭčorašniaj naradzie akazalisia nia prosta rytaryčnymi fihurami.
Kadravaja rašučaść aficyjnaha kiraŭnika lišni raz śviedčyć, nakolki ŭzrušyŭ jaho vybuch la steły. Nia dziva, bo heta stała najmacniejšym udaram pa ŭsioj mitalahiemie stabilnaści.
Zvyš taho, Łukašenku peŭna niepakoić i prablema vidavočnaha nieprafesijanalizmu ŭ siłavych strukturach, bo jany ž zaklikanyja nadziejna abaraniać najvyšejšaje načalstva ad nadzvyčajnych zdareńniaŭ.
Ale reč nia tolki ŭ vybuchu, miarkujuć analityki. Tak, na dumku Valera Karbaleviča, prynamsi adstaŭka Šejmana naśpiavała daŭno. Ekspert źviazvaje heta ź pierafarmatavańniem ułady. Tak, zaznačaje jon, usio bolšuju moc nabiraje syn prezydenta Viktar Łukašenka.
Adnak nia varta śpiašacca z vysnovami pra kaniec karjery Šejmana, jaki zarabiŭ reputacyju niepataplalnaj fihury.
U razbory palotaŭ paśla vybuchu adčuvajecca značnaja dola pijaru: voś, bačycie, prezydent nie zvažaje navat na staroje siabroŭstva! Razam z tym, daŭni prezydencki (jašče z časoŭ baraćby za samaje vysokaje kresła) paplečnik moža jašče dobra pasłužyć. Adzin z varyjantaŭ — ambasadar u dalokim Karakasie. Tam u biełaruskaj ułady ŭžo jość važkija intaresy.
Kamientary