Kaliści bikini-strynhi ličylisia adzieńniem dla samych śmiełych. Siońnia ž hety minimalistyčny kupalnik možna ŭbačyć paŭsiul — ad marskich kurortaŭ da miascovych azior. Raźbirajemsia, čamu samy adkryty plažny ŭbor raptam staŭ mejnstrymam i što za hetym staić.
Jak piša The Guardian, jašče niadaŭna aholenyja jahadzicy na plažy byli normaj chiba što ŭ Brazilii ci na papularnym realici-šou «Vostraŭ kachańnia». Ale hetym letam usio źmianiłasia. Minijaciurnyja kupalniki stali sapraŭdnym chitom, i ŭbačyć ich možna nie tolki na soniečnych uźbiarežžach, ale i ŭ miascovych akvaparkach i na bierahach našych rek i azior.
Trend, jaki pačaŭsia na podyumach i ŭ instahramie, siońnia zamacavaŭsia ŭ mas-markiecie. U asartymiencie Zara, H&M, Calzedonia možna znajści dziasiatki varyjantaŭ, a ŭ internet-kramach prapanujuć sotni madelaŭ.
Viadoma, nie abyšłosia i biez znakamitaściaŭ: u strynhach źjaŭlajucca madel Chajdzi Kłum, śpiavačka Nikol Šerzinhier i aktrysa Safija Vierhara, a śpiavačka Lizzo ŭžo daŭno źjaŭlajecca ich addanaj prychilnicaj.
«Heta ž prosta cieła». Čamu žančyny vybirajuć strynhi?
Dla mnohich dziaŭčat adna z hałoŭnych pieravah — idealny zahar bieź biełych pałos ad płavak. «Nie budu chłusić, spačatku było strašnavata», — dzielicca 29-hadovaja Viktoryja, jakaja ŭpieršyniu nadzieła taki kupalnik padčas adpačynku ŭ Italii.
«Ja bačyła ich paŭsiul i maryła pasprabavać. A potym padumała: heta ž prosta jahadzicy. Mužčyny nosiać malusieńkija płaŭki, u jakich usio vidać, dyk čamu ja nie mahu? Da taho ž heta vielmi zručna».
Hetaja maleńkaja revalucyja na plažach naśpiavała daŭno. Jašče ŭ 2023 hodzie The New York Times pisała, što ŭsio bolš žančyn prytrymlivajucca fiłasofii «čym mienš, tym lepš», kali havorka idzie pra plažnaje adzieńnie. Ciapier ža pytańnie «čamu ŭsie bikini stali strynhami?» hučyć usio čaściej.
«My ŭvajšli ŭ novuju eru ŭsprymańnia cieła — bolš adkrytuju i ekspresiŭnuju, — tłumačyć dacent Univiersiteta Saŭthiemptana, jaki zajmajecca daśledavańniem mody. — Ludzi kažuć: «Heta majo cieła, i ja budu pakazvać jaho tak, jak chaču. Kali dla hetaha treba nasić vopratku, jakuju hramadstva ličyć nieprymalnaj, ja budu heta rabić».
Fešn-ekśpierty adznačajuć: pakaleńnie Z mienš zaležyć ad «praviłaŭ pryvabnaści», što patrabavali chavać «niedachopy». Kupalniki stali vypuskać u šyrokaj liniejcy pamieraŭ i aryjentavacca na raznastajnaść fihur.
Alija Uiłkinsan, zasnavalnica luksavaha brenda kupalnikaŭ Ôsalé, padkreślivaje:
«Žančyny roznych formaŭ i pamieraŭ z upeŭnienaściu vybirajuć bolš śmiełyja fasony. Heta častka šyrejšaha kulturnaha zruchu ŭ bok bodzipazityvu i samavyjaŭleńnia».
Kult jahadzic i ŭpłyŭ pop-kultury
Jość i inšyja pryčyny papularnaści strynhaŭ. Sacyjołah Rabierta Sasateli ličyć, što moda doŭhi čas imknułasia padkreślić jahadzicy, bo hetaja častka cieła ličycca vielmi pačućciovaj, ale nie źviazanaj z repradukcyjaj.
«Jana asacyjujecca vyklučna z zadavalnieńniem, tamu jaje demanstracyja ŭsprymajecca jak simvał svabody i raźniavolenaści», — kaža eskpiert.
Hetaja moda prasočvajecca nie tolki na plažach, ale i ŭ kabinietach płastyčnych chirurhaŭ, dzie raście papularnaść niebiaśpiečnaj pracedury — brazilskaha liftynhu jahadzic. Imknieńnie da idealnych form stała sapraŭdnaj fitnes-manijaj.
Kali ŭ 2000-ch usie maryli pra płoski žyvot i nasili džynsy ź nizkaj pasadkaj, to siońnia fitnes-metaj numar adzin stali pruhkija jahadzicy. Treniroŭki dla hetaj častki cieła stali adnymi z samych papularnych u spartyŭnych załach. I całkam łahična, što paśla miesiacaŭ prysiadańniaŭ sa štanhaj chočacca prademanstravać vynik.
Adnak jość i bolš krytyčny pohlad. Niekatoryja ekśpierty źviazvajuć hety trend z praniknieńniem parnahrafičnaj estetyki ŭ kulturu.
«Hety styl pryjšoŭ z pornaindustryi, dzie aktrysy, kali i apranutyja, to ŭ mikraskapičnyja bikini ci bializnu, — tłumačyć Šon Koŭł. — Ludzi pierajmajuć hetuju estetyku, časam navat nie ŭśviedamlajučy jaje vytokaŭ». Papularnaść realici-šou kštałtu «Vostrava kachańnia» (Love Island), dzie ŭdzielniki demanstrujuć svaje cieły, kab pryvabić partniora, tolki ŭzmacniaje hety efiekt.
Ad zabaron da svabody
Niahledziačy na toje što siońnia bikini-strynhi ličacca žanočym adzieńniem, ich vytoki — u mužčynskich naściehnavych paviazkach. Sučasnuju formu ŭ 1970-ch prapanavaŭ dyzajnier Rudzi Hiernrajch u adkaz na rašeńnie haradskoha savieta Łos-Andželesa, jaki zabaraniŭ nahatu na hramadskich plažach.
Sprečki vakoł hetaha kupalnika nie ścichajuć i siońnia. U niekatorych haradach Aŭstralii i ZŠA ich zabaranili ŭ hramadskich basiejnach, a ŭ Vialikabrytanii ad naviedvalnic adnoj ź sietak basiejnaŭ patrabujuć nasić «kupalniki zakrytaha kroju».
Ale navat tam, dzie zabaron niama, nie ŭsie hatovyja da takoj adkrytaści.
«U mianie jość adzin taki kupalnik, ale ja nadzieła jaho tolki raz, kali my z mužam adpačyvali na pryvatnaj vile, — pryznałasia žurnalistam 33-hadovaja Rebieka. — Mnie zdajecca, heta zanadta seksualizavana i niedarečna, naprykład, na siamiejnym adpačynku. Dajcie mnie lepš płaŭki z vysokaj talijaj, jakija ŭsio prykryvajuć».
Urešcie, pryčyna viartańnia strynhaŭ moža być vielmi prostaj. Jak kaža sacyjołah Sasateli, moda cykličnaja.
«Dla tych, kamu siońnia 15-20 hadoŭ, strynhi nikoli nie byli ŭ modzie. A kali industryja pra niešta zabyvaje, heta možna viarnuć — i heta stvaraje adčuvańnie navizny».
Takim čynam, siońniašni bum na bikini-strynhi — heta składany kaktejl z bodzipazityvu, fitnes-kultury, upłyvu miedyja i prostaha žadańnia mody ździvić nas čymści «novym», što nasamreč źjaŭlajecca dobra zabytym starym.
Ciapier čytajuć
Biełarusy ŭ sacsietkach aburajucca, što dekretnicam nibyta płaciać bolš, čym tym, chto chodzić na pracu4
Biełarusy ŭ sacsietkach aburajucca, što dekretnicam nibyta płaciać bolš, čym tym, chto chodzić na pracu
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii11
Kamientary