Lavončyk prakamientavaŭ abvinavačańni Siarhieja Cichanoŭskaha, što jon nie choča płacić za videa ź Mielnikavaj
Kiraŭnik inicyjatyvy ByHelp prakamientavaŭ śćviardžeńni Siarhieja Cichanoŭskaha ab tym, što nibyta isnuje videazapis, jaki paćviardžaje znachodžańnie Anžaliki Mielnikavaj na voli. Pa słovach Alaksieja Lavončyka, jamu sapraŭdy dasyłajuć takija videa, ale ŭsie jany albo fejki, albo trochsiekundnyja videa, jakija niemahčyma vieryfikavać.
Redakcyja Reform.news źviarnułasia da Alaksieja Lavončyka z prośbaj prakamientavać zajavu Siarhieja Cichanoŭskaha ab isnavańni videa, jakoje dakazvaje znachodžańnie na voli źnikłaj śpikierki Kaardynacyjnaj rady. Cichanoŭski śćviardžaŭ, što aŭtary videa chočuć atrymać uznaharodu za dokaz.
«Mielnikava, hrošy… Siabry, nie viedaju. Ja ź Mielnikavaj nie znajomy, jakija hrošy taksama nie viedaju. Ale ja mahu skazać, što da mianie chłopcy źviarnulisia, pakazvali videa, što Mielnikava na voli, niejki tam čałaviek abiacaŭ 20 000 ci to jeŭra, ci što za infarmacyju pra Mielnikavu. Dva tydni jon maŭčyć, mnie listavańnie skidali. Kali jon admaŭlajecca ad svaich słoŭ, hety čałaviek, nie hatovy płacić za infarmacyju, jakuju jon kaža — 20 000. Ja nie pamiataju navat proźvišča. Kali admaŭlajecca, značyć, daviadziecca apublikavać heta videa i hetyja pieramovy. Čałaviek prosta nie adkazvaje za svaje słovy. Moža, jamu i nie treba. Jany i tak viedajuć, dzie Mielnikava i dzie hrošy. Ja nie viedaju. U mianie pra heta nie pytajciesia. Ja, adno što, mahu hetaje pytańnie trymać na kantroli», — zajaviŭ 18 žniŭnia ŭ svaim strymie na Youtube Siarhiej Cichanoŭski.
Alaksiej Lavončyk paćvierdziŭ, što atrymlivaje roznyja videa z udziełam Mielnikavaj.
«Nam dasyłajuć kuču videa, ale bolšaja častka ź ich — heta mantaž staryzny. Ja reahuju tolki ŭ tych vypadkach, kali liču, što mahu adnaznačna paćvierdzić chacia b niejkuju pierśpiektyŭnaść i sapraŭdnaść. Niekatoryja chočuć hrošy napierad, a videa potym», — patłumačyŭ kiraŭnik ByHelp.
Na dumku Lavončyka, aŭtary takich videa pavinny prykłaści namahańni.
«Kali ŭ ludziej jość sapraŭdnaje videa, fota ci niešta jašče, jany pavinny sami dakazać jaho sapraŭdnaść — nu ci chacia b dać mnie dastatkova faktury dla pravierki. Pakul nichto z tych, chto niešta dasyłaŭ, hetaha nie zrabiŭ», — skazaŭ aktyvist.
Jon paćvierdziŭ, što na jaho vychodzili ludzi (jany spasyłalisia na Cichanoŭskaha), jakija sprabavali pradać fota i videa, na jakich nibyta — Mielnikava paśla źniknieńnia.
«Mnie nie dasyłali ničoha, na padstavie čaho možna było b chacia b ź minimalnaj stupieńniu ŭpeŭnienaści śćviardžać, što Mielnikava znachodzicca ŭ Biełarusi. Pakul što mnie dasyłali abo mantaž staryzny, abo adkrytyja fiejki, abo zusim karotkija klipy, abo słoŭnyja śćviardžeńni ab tym, što takija videa isnujuć», — raspavioŭ Alaksiej.
Alaksiej Lavončyk jašče raz nahadaŭ umovy, pry jakich budzie vypłačana ŭznaharodžańnie za infarmacyju ab Mielnikavaj.
«Nahadvaju taksama, što ŭznaharoda moža być vypłačanaja tolki i vyklučna za materyjały, jakija možna pravieryć i jakija dakładna paćviardžajuć, dzie znachodzicca Mielnikava ŭ apošni čas. Sam pa sabie fakt najaŭnaści materyjałaŭ, dzie fihuruje Mielnikava, ale jakija niemahčyma vieryfikavać, nie stanie padstavaj dla vypłaty ŭznaharody. Davier — štuka ŭzajemnaja», — reziumavaŭ jon.
Raniej zasnavalnik BY_HELP Alaksiej Lavončyk abjaviŭ zbor na ŭznaharodu za dakładnuju infarmacyju ab losie źnikłaj śpikierki Kaardynacyjnaj rady Anžaliki Mielnikavaj. Pa jahonych słovach, jon damoviŭsia z donaram, jaki padvoić lubuju sumu ŭznaharody, sabranuju biełarusami. Na dadzieny momant suma ŭznaharodžańnia składaje 10 000 jeŭra.
Ciapier čytajuć
Pamior narodny artyst Biełarusi Jarasłaŭ Jeŭdakimaŭ — vykanaŭca chitoŭ «Začarovanaja maja» i «Fantazior»10
Kamientary