Byłaja kiraŭnica štaba Cichanoŭskaj u zachapleńni ad kruizu pa narviežskich fijordach. Kolki kaštuje taki adpačynak?

Byłaja načalnica pieradvybarnaha štaba Śviatłany Cichanoŭskaj, Maryja Maroz razam ź joj źjechała ŭ Litvu ŭ žniŭni 2020 hoda. Jana ŭznačaliła fond «Kraina dla žyćcia», ale paśla adyšła z palityki. Raniej jana raskazvała, što ŭ Polščy zajmajecca biznesam razam z mužam.

Žančyna maje svoj jutub-kanał, u jakim bolš za 5000 padpisčykaŭ i zvyš 310 videa. Niadaŭna Maryja raskazała pra siamiejnaje padarožža na kruiznym łajniery.

Pa słovach Maroz, siarod jaje znajomych šmat ludziej, chto maje vopyt padarožžaŭ na kruiznych łajnierach na roznych napramkach. Jana taksama maryła ździejśnić takoje padarožža i zahadzia zabraniravała vaśmidzionny kruiz na łajniery MSC Poesia pa fijordach Narviehii.

«Pa fakcie vaśmi dzion niama. Apošni dzień — pračynaješsia, paśniedaŭ — i ŭsio, užo vychodziš. Atrymlivajecca siem dzion, siem načej», — zaŭvažaje žančyna.

U padarožžy razam z Maryjaj byŭ jaje muž, małodšaja dačka i jašče adzin darosły čałaviek. Kruiz pačaŭsia ź niamieckaha horada Varniemiunde. Viartańnie taksama było ŭ hety horad.

Pavialičyć

Jak tłumačyć Maroz, jany z mužam śpiecyjalna vybrali hety niamiecki prymorski horad:

«U nas mašyna — elektramabil Tesla, i nam značna tańniej dabracca da kropki adpraŭleńnia łajniera na mašynie, čym, naprykład, na samalocie.

Kali adpraŭlacca z Ryma ci jašče adniekul, to dalacieć tolki na adnaho čałavieka niedzie 100 jeŭra i nazad viarnucca 100 jeŭra, to atrymlivajecca 200 jeŭra na čałavieka. Nas čaćviora. Voś i ličycie. A tak my zaradžali mašynu, i ŭ nas usiaho, moža, 200 jeŭra na tudy-nazad atrymałasia, moža, navat i tańniej».

Kajuta

Pa słovach žančyny, jany imknulisia ekanomić, tamu abrali varyjant z unutranaj kajutaj, jakaja nie maje voknaŭ.

Maryja raspaviadaje, što spačatku bajałasia, što ŭ takoj kajucie budzie dušna, ciesna dla čaćviarych, što łožki vyjaviacca niazručnymi. Asabliva jaje niepakoiła toje, što adzin dvuchspalny — stacyjanarny, a dva inšyja — adkidnyja, «jak u ciahniku»:

«Ja bačyła na malunkach, i heta mianie krychu biantežyła. Plus kajuta maleńkaja. Dumaju, nu jak my tam budziem usie źmiaščacca? Akazałasia, usio nastolki zručna i kamfortna, łožki supier».

Pavialičyć

Servis i ježa

Maryja adznačaje, što jana sa svaimi blizkimi nie čakała, što kruiz im nastolki spadabajecca.

«My dastatkova šmat padarožničajem, u nas jość z čym paraŭnać. Byli i ŭ hatelach z usio ŭklučana, ale ŭ hateli ty lažyš na adnym miescy. A tut u ciabie i ŭsio ŭklučana, i sam hety pryhožy łajnier, i absłuhoŭvańnie, i ŭ kajutach kožny dzień prybirajuć, i ŭsie vielmi vietlivyja».

Asabliva žančyna adznačaje ježu:

«Supier smačna kormiać. Ježa prosta na luby hust — ci ty viehan, ci miasajed, lubiš pastu, picu, usio, što žadaješ, ledź ci nie 24 hadziny na 7 dzion na tydzień. Usio heta ŭklučana. (…) Samy kajf ad hetaha kruizu — heta ježa».

Žančyna zaŭvažaje, što jany nie brali pakiet napojaŭ, jaki ŭklučaje piva, vino i kavu.

Maryja raskazvaje, što na łajniery było dva varyjanty charčavańnia: restaran i bar-bufiet. U restaranie treba było rabić zamovu i čakać, pakul pryniasuć stravy. A ŭ bufiecie dziejničaŭ pryncyp šviedskaha stała. U vyniku jany štodnia chadzili mienavita ŭ bufiet.

«Pa ŭzroŭni absłuhoŭvańnia, stolki było sadaviny, raznastajnaj ježy, nie było jašče ŭ nas ni ŭ adnym hateli all inclusive», — zapeŭnivaje Maroz.

Zabavy

U rasparadžeńni haściej byŭ adkryty basiejn, džakuzi, štoviečar jany mahli pahladzieć zabaŭlalnuju prahramu.

Pavialičyć

«Za čas pieramiaščeńnia my naviedvajem teatr, prosta supierpradstaŭleńnie kožny dzień, niešta novaje. My ŭsie biehli ŭ hety teatr jak pa raskładzie hladzieć šou, bo vielmi kruta zroblena», — zhadvaje Maryja i ŭ toj ža čas zaŭvažaje:

«Mahčyma, našamu dziciaci nie chapała niejkaj animacyi. Tam była animacyja, ale jana niejkaja vielmi takaja siarednieńkaja. Jana schadziła adzin raz, druhi raz, potym jana ŭžo bolš nie pajšła».

Harady i vakolicy

Padarožža pralahała pa troch krainach — Hiermanii, Narviehii i Danii. Asablivaje zachapleńnie ŭ Maryi vyklikaŭ horad Bierhien. Jaho jana nazvała «prosta kazačnym haradkom».

«Ja vam vielmi raju hety haradok. Jon nievierahodna pryhožy. Idzieš i bačyš tam takuju kolkaść maleńkich niejkich kazačnych elemientaŭ. Domiki aformleny, kožnaja vułačka, kožnaja prystupka. Nu prosta estetyčnaje zadavalnieńnie ad hetaha horada.

Mnie skazali znajomyja, što jakraz u Bierhienie jość vielmi kłasnyja sekand-chendy, i što tam možna niejki ŭnikalny posud kupić, niejkija [jašče] rečy. I my taksama naviedali niekalki sekand-chendaŭ, i adzin byŭ prosta supierzalikovy».

Pavialičyć

Košt padarožža

Maryja nie nazvała, kolki jana zapłaciła za svoj kruiz, ale pakazała prykład padobnaha kruizu na nastupny hod. Jana ŭniesła dadzienyja pra svaju siamju — troje darosłych i adno dzicia — i atrymała raźliki na lipień 2026 hoda.

Košt zaležyć ad typu kajuty: unutranaja, z aknom, z bałkonam ci śjuta. Samyja tanny varyjant na čatyroch čałaviek — $4367 z ulikam padatkaŭ i partovych zboraŭ, ale biez Wi-Fi i karty napojaŭ. Kab atrymać i ich, treba budzie zapłacić za ŭsiu kampaniju $5760.

Pavialičyć

Maryja zaŭvažaje, što košt budzie raści pa miery nabližeńnia daty płanujemaha padarožža.

Maroz miž spravaj zhadała, što źjaŭlajecca ŭdzielnicaj płatformy InCruises — pa sutnaści heta piramida, jakaja vysmoktvaje hrošy z karystalnikaŭ, pakul tyja narešcie nie zrazumiejuć, što ich padmanvajuć.

Adnak Maryja praciahvaje płacić servisu pa 100 dalaraŭ na miesiac, spadziejučysia, što ŭ budučyni zmoža apłacić bonusnymi bałami pałovu svajho nastupnaha kruiza.

U hety raz starych bonusnych bałaŭ u jaje — pa vypadkovym supadzieńni — nie chapiła, tamu daviałosia apłačvać poŭny košt.

Ahulnaje ŭražańnie

«Kłasna, što my ŭziali kruiz. Nam było tańniej źjeździć u Narviehiju pa fijordach u kruiz, tamu što na mašynach tam vielmi-vielmi doraha. I parkoŭki, i ježa», — kaža Maryja.

Jana adznačaje, što jany sami nie abiedali ŭ haradach, a voś znajomyja zamovili prosty abied — sałat, harnir, kavałačak miasa i kavu — i zapłacili 75 jeŭra za čałavieka. Dla siamji z čatyroch čałaviek heta akazałasia b vielizarnaja suma. I načleh u Narviehii šalona darahi.

«A tut my śniedajem sytna, vychodzim na bierah, ceły dzień hulajem pa pryhožych haradach i viartajemsia na łajnier, i ŭ nas taki dom na vadzie. (…) Heta hatel na vadzie, i jon pierasoŭvajecca, i ty prosta kajfuješ i atrymlivaješ i novy horad kožny dzień, i vieś servis», — davodzić Maroz.

«Kažuć, što heta nie samy kłasny kruiz, što jon taki vielmi taki siarednieńki, što łajnier stary, ale nam usio vielmi-vielmi spadabałasia, — zaŭvažaje Maryja i zapeŭnivaje: — Adnaznačna pajedu jašče».

• 18
• 1
• 5
• 19
• 1
• 0
• 1
• 5