Biełarusy na polskim «Stadyjonie kultury»: N.R.M., lalečny teatr i sieladcy z burakami

180‑tysiačny polski horad Žešuŭ pa kolkaści nasielnictva abhaniaje Baranavičy i niamnoha adstaje ad Babrujska. Adnak padčas minułych vychodnych jon prytuliŭ «Stadyjon kultury» — maštabny kulturnicki fiestyval, padobny da jakoha ciažka ŭjavić navat u Minsku.

Ideja «Stadyjona kultury» naradziłasia jašče letaś. Tady jaho zładzili dla kulturnickaha abmienu pamiž Polščaj i Ukrainaj napiaredadni Jeŭra-2012. Ideja pryžyłasia, i sioleta fiestyval było vyrašana paŭtaryć, ale ŭžo z bolšym razmacham — arhanizavać adrazu try fiestyvali pad ahulnaj nazvaj «Uschod kultury». Biełaruś nie zastałasia na ŭzbočynie, a ŭziała ŭ fiestyvali aktyŭny ŭdzieł.

Muzyka

Uračystym adkryćciom fiestyvalu staŭ vialiki kancert na haradskim stadyjonie Žešuva. Na adnoj scenie vystupili sabralisia viadomyja vykanaŭcy i kalektyvy: Zakopower, SunSay, Julija Marceł, Alina Arłova, Rykarda Parasoł, hurt Coma, saksafanist Džymi Cienar ź Finlandyi, azierbajdžancy Alim Kasimaŭ i jaho hurt razam z palakami Voo Voo. Chedłajnierami viečara staŭ niamiecki hurt Guano Apes. Biełaruś na kancercie pradstaŭlali muzyki hurtu N.R.M.

Kancert byŭ arhanizavany takim čynam, što na scenie adčanasova prysutničali vykanaŭcy z Polščy razam z pradstaŭnikami inšych krainaŭ. Pitu Paŭłavu i kampanii ŭ susiedzi pa scenie dastaŭsia polski rok-hurt Myslovitz. Usie muzyki pieraapranulisia ŭ załatyja skafandry, kab vykanać pieśniu «Pramień», a hledačam razdali vializnyja kavałki załatoj falhi. Padčas vystupu N.R.M. i Myslovitz stadyjon, całkam zapoŭnieny ludźmi, razvarušyŭsia i aktyŭna zatančyŭ, choć biełarusaŭ na kancercie było niašmat: stadyjon viała adhuknuŭsia na pytańnie «ci jość tut biełarusy?»

Uvachod na mierapryjemstvy «Uschoda kultury» byŭ biaspłatnym dla ŭsich. Na ŭvachodzie — niastrohi dahlad i nijakich kamieraŭ śpiecsłužbaŭ, što zdymajuć absalutna ŭsich, chto nabližajecca da ramak mietałašukalnikaŭ.

Kidałasia ŭ vočy adsutnaść palicejskich — paradak zabiaśpiečvała niaznačnaja kolkaść vietlivych achoŭnikaŭ, mnostva ludziej u invalidnych vazkach, jakija pryjšli pasłuchać kančert. Uražvaŭ i vielmi jakasny huk. A adsutnaść ideałahična zaćvierdžanaj papsy na mierapryjemstvie, finansavanym ź dziaržbiudžetu ŭvohule moža padacca niedaśviedčanamu biełarusu fantastykaj.

Teatr

Aktyŭnymi byli biełarusy i ŭ teatralnaj halinie «Uschodu kultury». Hrodzienski abłasny teatr lalek adkryŭ dramatyčnuju siekcyju pastanoŭkaj «Viasioły cyrk». Na śpiektakl pryjli baćki i ich dzieci. I ty i druhim śpiektakl pryjšoŭsia daspadoby — heta było vidać pa dziciačych uśmieškach i pa śmiechie, jaki napaŭniaŭ zału.

U faje teatra tym časam prachodziła vystava lalek z Hrodna, jakaja taksama karystałasia papularnaściu i zakryłasia tolki pozna ŭviečary ŭ niadzielu — apošni dzień «Uschoda kultury».

Jašče adnoj premjeraj fiestyvalu stała pjesa «Pakajoŭki» u režysury hałoŭnaha režysiora Hrodzienskaha abłasnoha teatra lalek Aleha Žuhždy. Žuhžda, darečy, źjaŭlaŭsia i kurataram tetralnaj častki fiestyvala Drama Way.

Kuchnia

Arhanizatary paličyli, što daviedacca pra kulturu peŭnaj krainy niemahčyma, nie pakaštavaŭšy miascovych stravaŭ. Dasiahnieńni biełaruskaj hastranomii pradstaviŭ miascovy restaran češskaj kuchni.

Možna było zamović sałatu ź sieladcoŭ i burakoŭ, chaładnik, «carskija» blinčyki z łasosiem ci hałubcy. Na desiert — «Minski» kieks.

Supracoŭniki restarana, u jakim hatavali biełaruskija stravy, paviedamili «NN», što jany nie vybirali, kuchniu jakoj krainy buduć pradstaŭlać, ale biełaruskija stravy, asabliva chaładnik ź blincami, karystajucca papularnymi siarod naviedvalnikaŭ.

«Stadyjon kultury» — tolki pačatak

Sioleta arhanizatary «Uschodu kultury» nie abmiežavalisia adnym fiestyvalem u Žešuvie.

Z 25 pa 29 vieraśnia ŭ Biełastoku projdzie druhi i vielmi nasyčany etap kulturnickaha forumu pad nazvaj «Inšaje vymiareńnie». Arhanizatary abiacajuć, siarod inšaha, što padčas fiestyvalu adbudziecca pakaz pjesy Paŭła Pražko «Majtki», a taksama vystup etna-trya «Trojca» i polska-biełaruskaha kalektyvu, jakija śpiavajuć narodnyja pieśni z Paleśsia, pakaz modaŭ ad biełaruskich dyzajnieraŭ, prezientacyja pracaŭ mastaka Alesia Puškina.

Zavieršyć «Uschod kultury» forum pad nazvaj «Intehracyi-Miedyacyi», jaki projdzie z 1 pa 6 kastryčnika ŭ Lublinie.

• 0
• 0
• 0
• 0
• 0
• 0
• 0
• 0