Нарнійскія прыгоды на краі свету
Хронікі Нарніі: Скаральнік золку (The Chronicles of Narnia: The Voyage of the Dawn Treader)
ЗША, 2010, каляровы, 112 хв.
Рэжысёр: Майкл Эптыд
Ролі выконваюць: Джорджы Генлі, Скандар Кейнс, Бен Барнс, Уіл Паўлтэр, Гэры Суіт, Тэры Норыс
Жанр: Фэнтэзі паводле кнігі К.С.Льюіса
Адзнака: 6 (з 10)
Эдмунд, Люсі і іхні стрыечны брат Юстас трапляюць у Нарнію — на карабель «Скаральнік золку», які адпраўляецца на край казачнага свету. Героі мусяць адшукаць сем лордаў і спыніць зялёны туман, што нішчыць людзей.
«Хронікі Нарніі» Майкла Эптыда — трэція казачныя прыгоды ў краіне, дзе пацукі і мінатаўры балбочуць, дзеці — каралі і прынцэсы, а дзівосы на кожным кроку. Эдмунд і Люсі — не ўпершыню ў Нарніі, затое іхні брат, злюка і шкоднік — не чакаў для сябе прыгодаў. Ягоным выхаваннем зоймецца маленькі пацук з вялікім сэрцам, уся каманда карабля — і чароўныя сілы.
У фільме — нябачныя карлікі-аднаступы, падступныя гандляры рабамі, злы зялёны туман, залаты цмок (і па сумяшчальніцтве — Юстас на выхаванні). Плешчуцца ў водах наяды, страшная марская змяя атакуе карабель.
Майкл Эптыд — годны рамеснік, які фэнтэзі не псуе, але і завялікіх чараў у стужку не дадае. Затое хрысціянскія алюзіі ў гэтай карціне найбольш відавочныя. Каб перамагчы зло — трэба змагацца з ім ва ўласных душах. Зялёны туман — д’ябальскае спакушэнне. Ну, а леў Аслан сам прапануе героям здагадацца, кім ён ёсць у рэальным жыцці.
Непыхлівая, прыгожая казка для ўсёй сям’і.
Цяпер чытаюць
Ваяр з Беларускага добраахвотніцкага корпуса: Я жыў у ружовай бурбалцы2
Каментары