Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі

Як стала вядома «Нашай Ніве», у сярэдзіне ліпеня амаль адначасова — з розніцай у два дні — падаліся на банкруцтва дзве вядомыя ў вузкіх колах кампаніі: ААТ «Інтэхнабуд інвест» і ААТ «ЗаслаўльБудІнвест». 

У першай кампаніі непагашаны перад крэдыторамі доўг — 74 тысячы, у другой — 503 тысячы рублёў. 

Цэнтральныя фігуры гэтых узаемазвязаных кампаній — прадпрымальнік Глеб Вайноўскі і ў мінулым прафесійны хакеіст і, да нядаўняга часу, гулец каманды Лукашэнкі Сяргей Шыткоўскі. 

У перыяды эканамічных уздымаў для таго, каб атрымаць зямлю пад забудову ў сталіцы, самай прастой дарогай было падпісаць рашэнне ў Лукашэнкі з дапамогай гэтак званага «хода» — блізкага да яго спартсмена, лепш за ўсё хакеіста. Такім чынам хакеісты станавіліся трошкі яшчэ і забудоўшчыкамі, а пасрэдныя бізнэсмены — буйнымі сталічнымі дэвелаперамі. У прынцыпе, саюз Шыткоўскага і Вайноўскага цалкам адпавядае такой катэгарызацыі.

Для праварочвання схемы не патрабаваўся нават вялікі стартавы капітал: па сутнасці, будаўніцтва фінансавалі дольшчыкі, якія неслі свае ці банкаўскія грошы яшчэ на этапе катлавана. 

Такіх пар на рынку склалася нямала. Вось і Вайноўскі з Шыткоўскім у 2018 годзе угаварылі Лукашэнку выдаць ім некалькі ўчасткаў пад забудову ў сталіцы, а ў якасці платы за шчодрасць павінны былі пабудаваць Лыжны манеж за будынкам Вярхоўнага суда на вуліцы Арлоўскай.

Меркавалася, што плошча аб'екта складзе 23 тысячы квадратных метраў. Унутры будзе круглы год падтрымлівацца мінусавая тэмпература, каб забяспечыць работу лыжнай трасы на некалькіх узроўнях, спускі для снаўбордаў, коўзанкі і гэтак далей. 

Павялічыць

Як можна меркаваць, дазвол на пачатак будаўніцтва жыллёвых комплексаў па сталічнай вуліцы Чыгуначнай быў наўпрост звязаны з пачаткам будаўніцтва манежа, але гэтага не здарылася: пляцоўку за Вярхоўным судом толькі абнеслі плотам, падагналі пару экскаватараў і для выгляду вырылі троху ям. Але не больш за тое.

Фінансаваць будаўніцтва комплексу бізнесмены збіраліся, відавочна, у большай ступені з грошай дольшчыкаў — пры цане на квадратны метр у Мінску ад $900 (на этапе катлавана) у 2019-м, тых 115 тысяч квадратных метраў, якія задумалі пабудаваць Шыткоўскі з Вайноўскім, хапіла б на некалькі лыжных манежаў. Але па відавочных сацыяльна-палітычных прычынах на момант, калі была гатовая дакументацыя, правярнуць схему так, як яна працавала да 2020‑га, не атрымалася.

Узнікла патавая сітуацыя, якая развязалася так: у 2024-м участак за Вярхоўным судом забралі ўлады. Участак пад забудову па Чыгуначнай, на месцы знесенага заводу «Сантэхдэталь», як можна меркаваць, таксама адабраны — замест анансаванага ЖК «Белыя Сады» там з'явіцца іншы, «Казахстанскі квартал», які будуе іншы забудоўшчык, а кватэры прапануюць чым, хто ў чарзе. 

Таксама Сяргей Шыткоўскі знік з ростара зборнай Лукашэнкі па хакеі. 

• 2
• 0
• 15
• 2
• 0
• 1
• 0
• 0