«Ён сапраўды дапамог украінскай арміі». Ва Украіне запусцілі насмешлівы флэшмоб пра Макса Каржа
Нечаканы ажыятаж вакол асобы беларускага спевака Макса Коржа пачаўся пасля публікацый украінскага актывіста і блогера Сяргея Сцярненкі ў сацсетцы Threads. Ён апублікаваў некалькі паведамленняў, у якіх сцвярджаў, што Корж нібыта дапамагаў УСУ. Гэта выклікала моцны водгук ва ўкраінскай аўдыторыі і ператварылася ў здзеклівы флэшмоб.
Сяргей Сцярненка, вядомы сваімі вострымі медыйнымі кампаніямі супраць прарасійскіх і апалітычных знакамітасцяў, спачатку апублікаваў лаканічны пост «Макс Корж», і дадаў да гэтых слоў смайлік поціску рукі.
Гэта імгненна справакавала лавіну каментарыяў, дзе карыстальнікі пачалі іранізаваць, нібыта артыст таемна перавёў увесь свой ганарар украінскім вайсковым фондам. А праз некалькі гадзін Сцярненка падкінуў у агонь яшчэ дроўцаў, апублікаваўшы наступнае: «Так, ён сапраўды дапамог украінскай арміі».
З падачы Сцярненкі ў інтэрнэце пачалі масава з’яўляцца жарты, мемы і паведамленні пра тое, што спявак нібыта пералічыў грошы на падтрымку УСУ. Некаторыя карыстальнікі нават называлі меркаваныя сумы ахвяраванняў і спасылаліся на «пацвярджэнні», хоць ніякіх афіцыйных доказаў або заяў самога Коржа пра такія данаты не было.
З цягам часу частка карыстальнікаў прыйшла да высновы, што гэта быў толькі тролінг або своеасаблівы сацыяльны эксперымент, які паказаў, наколькі хутка неправераная інфармацыя можа распаўсюджвацца ў сацыяльных сетках.
Штуршок гэтаму своеасабліваму флэшмобу быў зададзены нядаўнім канцэртам Макса Каржа ў Стамбуле. Падчас выступлення ў фан-зоне былі заўважаныя людзі са сцягамі Украіны, Расіі, Беларусі і іншых краін, а таксама з лозунгам F*ck politics. Гэта выклікала вострую рэакцыю ў інтэрнэце: адны лічылі гэта заклікам не змешваць музыку і палітыку, іншыя ж раскрытыкавалі такія жэсты ва ўмовах вайны.
Пазіцыя самога Макса Каржа адносна вайны ва Украіне ўжо неаднаразова выклікала спрэчкі. Пасля пачатку поўнамаштабнага ўварвання Расіі ва Украіну ён выступіў супраць вайны і заклікаў да спынення гвалту, аднак частка ўкраінскай грамадскасці лічыць, што яго пазіцыя недастаткова выразная, бо ён не робіць рэгулярных палітычных заяў і працягвае выступаць для рускамоўнай аўдыторыі ў розных краінах.
Перад гэтым падобны флэшмоб ва ўкраінскіх сацсетках прынёс істотныя праблемы ўкраінскай спявачцы Ані Лорак, якая пасля пачатку поўнамаштабнай вайны Расіі супраць Украіны і неабходнасці вызначыцца са сваімі сімпатыямі выбрала расійскі бок і працягнула зарабляць грошы, выступаючы ў Расіі.
Калі ва ўкраінскіх сацсетках сталі распаўсюджвацца чуткі пра нібыта фінансавую падтрымку з боку Лорак украінскага войска, частка расійскіх карыстальнікаў успрыняла іх як праўду.
На гэтым фоне расійскія дзяржаўныя органы пачалі праверку выканаўцы, а ў некалькіх гарадах былі адмененыя яе канцэрты. Улады і частка грамадскасці ў Расіі абвінавацілі спявачку ў нібыта недастаткова выразнай пазіцыі адносна вайны ва Украіне. Пры гэтым публічных доказаў таго, што Ані Лорак сапраўды пералічвала грошы на падтрымку УСУ, прадстаўлена не было — гэта проста прыдумана.
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5757
Каментары
Чалавек не можа два словы звязаць нават на рускай мове, а вы нешта хочвце ад яго.