У Крыме мясцовыя скардзяцца не толькі на дэфіцыт паліва, але і прадуктаў
З крам на акупаваным Крымскім паўвостраве знікаюць базавыя прадукты. Пасля ўдараў па лагістычных вузлах і сухапутным шляху ў Крыме пачаўся востры паліўны крызіс, які ланцуговай рэакцыяй выклікаў панічныя чаканні сярод насельніцтва, а следам і дэфіцыт прадуктаў на паліцах.
Паліўны крызіс выклікаў перабоі з дастаўкай тавараў і справакаваў спажывецкі ажыятаж. Як заўважыла выданне «Агентство», жыхары Сімферопаля і Севастопаля пачалі масава скардзіцца ў мясцовых чатах на нястачу базавых прадуктаў харчавання.
Паведамленні ў мясцовых чатах паказваюць, што праблемы назіраюцца з цукрам, грэчкай, макаронай, рысам, соллю, мукой, алеем.
Мясцовыя паблікі паведамляюць пра наступныя факты, што ў буйных гандлёвых сетках цалкам або часткова зніклі цукар і танныя крупы — людзі літаральна «змятаюць» тавары скрынямі.
У крамах пачалі з'яўляцца таблічкі з папярэджаннямі пра жорсткія абмежаванні: напрыклад, выдаваць не больш за 3 кг цукру, грэчкі і рысу ў адны рукі.
У сімферопальскім гіпермаркеце «Ашан» на паліцах засталіся толькі дарагая соль і рэшткі грэчкі пад уласным брэндам крамы.
Пакуль перабоі з прадуктамі не носяць татальнага характару на ўсім паўвостраве — жыхары некаторых гарадоў (Феадосіі, Бахчысарая) паведамляюць, што асабіста пустых паліц не бачылі, але ўжо чытаюць пра гэта ў сацсетках.
Тым не менш, праблема з дастаўкай прадуктаў і паліва нарастае, паколькі абяцанні акупацыйных уладаў нармалізаваць лагістыку пасля паспяховых удараў украінскіх дронаў пакуль застаюцца толькі на паперы.
Сёння стала вядома, што праз удар па Чангарскім мосце рух па ім у бок Крыма перакрыты.
Каментары